Luki 13
13
Bi nàʔami fàli wàlá bi kùu
1Lǎli bee wonijanna ni syɛ́ɛnbèle pèle maa pye yaà, àmɛɛ Pilati da Galile tári wóbèle pèle sìsyaan nyáʔami lè pe sárigaw sìsyaan ni, a poro kéeli bee joo n tɛ̀ɛn Zyezu na. 2A wi be yari: «Amɛɛ Galile tári wóbèle bee da wɔʔɔ n kùu lè nya, gee bee na lé yele gi sɔ̀ngí n jo poro be kapeegèle kpéʔele n sɔ̀lɔ Galile tári wòolo myɛ na láà ba mɛ̀ɛ́? 3Mii si a gi joo yele ma, ànbée ban gi nyɛ í. Kàjáa yele ga pye yele ga kàdoʔo wáa yele kapeegèle ma í, yele myɛ a wɔ́ɔ ba kálagi. 4Wàlá àmɛɛ Silowe#13:4 Silowe: Silowe maa pye Zyerusalɛmi kèyabigaa. kpaatɔnɔgi da too syɛ́ɛnbèle kɛɛ ní kɔrɔtaanri na n be kpóo lè, a yele i gi sɔ̀ngí lé n jo bele bee pe da kapeegèle kpéʔele n sɔ̀lɔ syɛɛnsanbèle myɛ na be pye lè Zyerusalɛmi ni láà ba mɛ̀ɛ́? 5Mii si a gi joo yele ma ànbée ban gi nyɛ í. Kàjáa yele ga pye yele ga kàdoʔo wáa yele kapeegèle ma í, yele myɛ a wɔ́ɔ ba kálagi.»
Děsyaantiinaa-sìnzangi kàseele
6A wi níì kàseeli naa wáa níì jo: «Nànwaa maa děsyaantiige cɔ́rɔ wi ɛrɛzɛn séʔe ni. A wi kɔ́ɔ̀ kári bi sa yasanra caa gi ni. Wi si ga sáà yafyɛn nyaa yaà í. 7A wi ɛrɛzɛn sefalaw pye: ‹Wéle, ki yɛ̀ʔɛlɛ taanri wi wee níyɛɛlɛ, àmɛɛ mii maa tíigi naa ma lè n ba ni yasanra caa gi ni, mii si ga kɔ́ɔ̀ yafyɛn nyaa gi ni í. Gi kpúmɔn mi cáan. Amɛɛ gi kòro lè ni tári nyɔʔɔrɔ nya, nyàʔá gee bee a nyɔɔ?› 8A ɛrɛzɛn sefalaw wi yari: ‹Ni kàfɔlɔ, ki yaʔa gbɛnʔɛnɛ ki níyɛɛlɛ kwɔ́ɔ, mii si tári purɔ gi taana, si kariga le yaà. 9Ki ga baa san, koro a pɔ́rɔ. Kapye koro ban í, mɔ a náa gi kpúmɔn bi cáan.› »
Zyezu n tàn yáama láʔa cewaa na cândɛnɛgi canʔa ni
10Zyezu maa ni syɛ́ɛnbèle tama sérikpaagaa ni Zyefubèle cândɛnɛgɛ canʔa ni. 11Wéle, cewaa maa pye yaà, a màdeo yaamaa félege cáan wi na, a wi kùru n kòro nya n baa taa yɛ̀ʔɛlɛ kɛɛ ní kɔrɔtaanri. Wi a tée gbǎn sánʔana bi sín nyáana í. 12Lǎli ni Zyezu wi nyaa lè, a wi wi yeri níì wi pye: «Cɔlɔɔ mɔ, mɔ n syɔɔ mɔ yáami ma.»
13A wi kɔ́yi taʔa céw na, a wi fala n sánʔana n sín ní i Kolocɔlɔɔ kpɔ̀ʔɔrɔ́. 14#Yir 20:9-10; Làlw 5:13-14 A gi si sérikpaagi kàfɔlɔ bɛɛn gbanʔama àmɛɛ Zyezu yáaw pɔʔɔ lè cândɛnɛgi canʔa ni, a wi gi joo syɛ́ɛnmi ma níì jo: «Syɔɔn n yɛlɛ waa báara canya kɔrɔni fúngo ni, gee bee na yaa maa cányi bee ni ye ba ra poori, ki ga yɛlɛ gi pye cândɛnɛgi canʔa ni í.»
15A Kàfɔw wi yari: «Yele syɛɛnjóotɛɛyi siin joofɔɔlɔ, yele myɛ nibin nibin o yele nǐyi, ní yele jòfanibèle sánʔana kàtoyi ni n sa ni kaangi ti i gbo cândɛnɛgi canʔa ni ì? 16Amɛɛ si céw naa nyɛ lè Abirahami yòdaʔagaa, á Sutanaw wi pwɔɔ n yaʔa fwɔɔ yɛ̀ʔɛlɛ kɛɛ ní kɔrɔtaanri fúngo ni, a yele jo lé ki ga yɛlɛ pe yapwɔɔri bee sánʔana wi na cândɛnɛgi canʔa ni í?» 17Lǎli ni wi dee bee joo lè, a fɛ̀ɛ́ri wi kasiitun-nyɛ́nbèle myɛ taa, a syɛ́ɛnmi myɛ i fundaanra kpéʔele wi kakpolojǎnyi myɛ kéele na.
Mutaridi tíigi pìifalila kaseele
(Mat 13:31-32; Mar 4:30-32)
18A Zyezu níì gi joo níì jo: «Nyàʔá Kolocɔlɔɔ fǎngi déè wíri? Ba nyàʔá ní mii a gi tímana? 19Ki i nyɛ àmɛɛ mutaridi tíige piifalila nyɛ, lee syɔɔn láa lè n sáà lùgu wi nángwɔɔw ni. A li fìin ní i leegi n baa pye tiige. A féjɛɛngèle ba ni kòró ki káganyi na.»
Levéw kàseele
(Mat 13:33)
20A wi níì jo: «Nyàʔá ní mii a Kolocɔlɔɔ fǎngi tímana? 21Ki i nyɛ àmɛɛ cɔlɔɔ gáà búru míimɛ yalenyɛnyɛ taanri#13:21 yalenyɛnyɛ taanri: Yalenyɛnyi naa taanri búru míimɛ i nyɛ cúlobéle toko ní kpɔrigɔ félege. kíri lè, níì levé le bi ni, a wi cariga n pi myɛ foro.»
Tɛ̀ɛjeepili
(Mat 7:13-14,21-23)
22Zyezu maa ni kèkpoloyi ní kèpiigèle myɛ nyaari ni sɔ̀lɔ́ nibin nibin ni syɛ́ɛnbèle tama ni syée Zyerusalɛmi ma. 23A syɔɔnwaa sáà wi pye: «Ni kàfɔlɔ, bele pe a syɔɔ lè, bele bee a pye lé syɛ̀ɛnnɛ cɛɛri yagana láà?» A wi be pye: 24«Mii a gi joo yele ma ki n yɛlɛ ye ŋàʔana kányɛʔɛ ni ye jée tɛɛ̀jeepili ni. Níì cán syɛ̀ɛnnɛ saʔa a ba ra kanmaa caa si jo poro a jée, pe fanʔa si a taa í. 25Lǎli ni kpáagi fɔ́lɔ ga kɔ́ baa yìri n kɔ̀rigi tɔ́n lè, á yele baa yére kàfugi na ni kɔ̀rigi kólo níì jo: ‹Kàfɔw! Ki múgu wolo ma!› Wi a yele yari: ‹Mii ga yele kàban-yìrigi cán í.› 26Lǎli bee ni yele a séli bàā gi nyuu si jo: ‹Wolo maa pínɛ ni líi ní i gbo ní mɔ ní, mɔ si i syɛ́ɛnbèle tama wolo kàlari-kóloyi ni.› 27#Ŋún 6:9 Wi a gí joo yele ma si yele yari: ‹Mii ga yele kàban-yìrigi cán í. Yele kakolobyebèle myɛ, ye núngo mii taana.› 28#Mat 22:13; 25:30 #Mat 8:11-12Lǎli ni yele ga baa Abirahami, ní Izaaki, ní Zyakɔbi, ní kanyaajoobèle myɛ nyaa Kolocɔlɔɔ fǎngi ni lè, bi gi taa pe n yele wáa kàfugi na, lǎli bee ni yele a ra nyaan sáā gǎngèle kúru. 29Syɛ́ɛnbèle pèle a kɔ́ ba yìri canʔafolomɔ ma, ní canʔajeemɛ, ní solomɔkulo kàbangi, ní wòrogulo kàbangi na bi ba tɛ́ɛn da líi Kolocɔlɔɔ fǎngi ni. 30#Mat 19:30; 20:16; Mar 10:31 Ye wéle, kàdoʔo ma syɛ́ɛnbèle pèle a ba pye yɛʔɛ̀ ma, yɛʔɛ̀ ma wóbèle pèle si pye kàdoʔo ma.»
Zyezu fun-yáagi Zyerusalɛmi kéeli na
(Mat 23:37-39)
31Lǎli bee wonijanna ni a Farisibèle pèle pan n baa wi pye: «Ki n yɛlɛ mɔ í núngo nɛɛ naa bàā syée tɛɛgaa nikwɔɔ ma, níì cán Herodi i caa bi mɔ kpóo.»
32A wi be yari: «Yaa syée ye sa sɔ́rigi bee pye: ‹Mii i naa ni màdebèle nɛnɛ ni yirigi syɛ́ɛnbèle ni, ní i yáabèle poori níjanʔa, ní nyɛ̀ʔɛna, candaanri wógi na ki a kwɔ́ɔ.› 33Koro ní ki myɛ ní ŋàʔanaga gii fwɔɔ mii í da tánʔani kpéʔele níjanʔa, ní nyɛ̀ʔɛna, ní nyɛ̀ʔɛnagwɔɔ. Níì cán pe a gbǎn kanyaajoowaa kpóo tɛɛgaa ni í, kapye Zyerusalɛmi ni ban í.
34Zyerusalɛmi, Zyerusalɛmi, mɔ wee wi kanyaajoobèle kúu lè, ní i bele wábagi ní kàdɛnɛri ní, bele be tungu mɔ ma lè, làrigēle saʔa ni mii maa ni caa bi mɔ piibèle kpóʔoro àmɛɛ gònɔɔ gáà wi gòpiigèle kpóʔoro lè wi fókaanyi láara ni, yele si ga fɔ̀lɔ í. 35#Ŋún 118:26; Zyer 22:5 Wéle, yele kpáagi n kòro yele ma wowaʔa ní. Mii si a gi joo yele ma, yele a tée ní mii nyaa í, bi taa lǎli í ba nan yele í gi joo si jo: ‹Wee wi maa lè Kàfɔw mɛ́ʔɛ na, ki n yɛlɛ dùbaw í pye wi ma.› »
Currently Selected:
Luki 13: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
