Luki 14
14
Zyezu n yaaɔ pɔʔɔ
1Zyezu maa jée Farisibèle syɛɛnkpɔɔwaa kpaʔa ni cândɛnɛgi canʔa ni bi sa lìi, a be i wi kɔ̀rɔsíi. 2Wéle, nànwaa maa pye wi yɛʔɛ̀ ma ní céfɛɛrɛ ní, 3a Zyezu làlwaw sɛ́bɛwelebéle ní Farisibèle yíbe níì jo: «A gi yɛlɛ lé syɔɔn í yaaɔ pɔʔɔ cândɛnɛgi ni láà, wàlá ki ga yɛlɛ í?» 4A be pyèri. A Zyezu kɔ́gi taʔa wi na n wi pɔʔɔ, níì wi tórigo. 5#Mat 12:11 Koro kàdoʔo ma a wi be pye: «Wìí wi naa yele ni, wi pyà ga too kɔ̀lɔ́ ni wàlá wi nɔ̀ɔ yoo, wi a wári kári bi sa wi yirige kɔ̀lɔ́w ni cândɛnɛgi canʔa ni í?» 6Pe ga gbàn n yafyɛn taa n joo kéeli bee ni í.
Tɛɛ̀tɛ́nɛgɛ nyɛ́nɛ-wòlogánma lǎli ni pe mɔ yeri lè
7A Zyezu ga gi nyaa àmɛɛ syɛɛn-yeribèle yɛʔɛ̀ ma tɛɛ̀tɛ́nɛyi nyɛ́nɛ ni wòló lè, a wi kàseelaa wáa be ma níì jo: 8#Kàs 25:6-7 «Wàa ga mɔ yeri cèpɔrigɔ liile na, ki ga yɛlɛ mɔ í sa tɛ́ɛn yɛʔɛ̀ ma tɛɛ̀tɛ́nɛgaa ni í, ki n yɛlɛ mɔ í da fɛ̀ɛgí si gi cán wàa a gbǎn kpɔ́ʔɔ sɔ̀lɔ mɔ na, á be wɔ́ɔ̀ wee bee yeri. 9Wee wi yele myɛ siinw yeri lè, wi ga sáà nan mɔ na níì mɔ pye: ‹Mi tɛɛ̀tɛnɛgi naa kaan nǎnw naa ma,› lǎli bee ni mɔ a sa tɛ́ɛn kàdoʔo ma tɛɛ̀tɛ́nɛgi ni fɛ̀ɛrɛ wóo ní. 10Kàjáa pe ga mɔ yeri, mi sa tɛ́ɛn kàdoʔo ma tɛɛ̀tɛnɛgi ni, koro ga pye mɔ yerifɔw ga pan wi ba mɔ pye: ‹Ni tàannyɛnnɛ, da syée mi sa tɛ́ɛn yɛʔɛ̀ ma.› Lǎli bee ni mɔ a kpɔɔmɔ taa mɔ suliinyɛnbèle myɛ nyɛ́nɛ na. 11#Mat 23:12; Luk 18:14 Níì cán syɔɔn o syɔɔn wi wiyɛɛ gbɔ́ʔɔgi lè, pe a ba wee bee cɛ́rɛ. Wee si wi wiyɛɛ jɛ́rɛgi lè, pe a ba wee bee kpɔ́ʔɔ.»
12Koro kàdoʔo ma wee wi da Zyezu yeri lè lìíli na, a wi wee bee pye: «Mɔ ga cángi lìile sɔʔɔ wàlá yébiligi wólo, mɔ a kɔ́ mɔ taannyɛnbèle yeri í, wàlá mɔ laayirinyɛnbèle yoo, mɔ narigbaagi wòolo yoo, mɔ ketɛ́nɛnyɛnbèle yoo, be lè lɔ́ri fɔ̀ɔlɔ, jàngó pe wɔ́ɔ kɔ́ mɔ yeri lìilaa na bi mɔ wógi sìndɛʔɛ lúrugo mɔ ma í. 13Kàjáa mɔ ga lìigbɔɔlɔ sɔʔɔ, mi foomɔfɔbèle yeri ní tɔvanayi fɔ̀ɔlɔ ní, n fàra syɛɛnmɔngɔbèle ní fúunbèle na. 14Mɔ a ba dùba taa, àmɛɛ gi nyɛ lè bele bee fánʔa a gbǎn taa bi mɔ wógi sìndɛʔɛ lúrugo mɔ ma í. Mɔ wógi sìndɛʔɛ si a ba lúrugo mɔ ma syɛɛnsinbèle cânnyán-yìrige na.»
Lìigbɔɔli kàseele
(Mat 22:1-10)
15Amɛɛ suliibèle bee wàa syɛ́ɛnri bee lóʔo lè, a wi jo: «Syɔ́ɔnwee wi a lìi Kolocɔlɔɔ fǎngi ni lè, wee bee i nyɛ dùba pyà!»
16A Zyezu wi pye: «Nànwaa maa yébilige lìigbɔɔlɔ sámaga n sɔʔɔ cangaa níì syɛ̀ɛnnɛ saʔa yeri. 17A làriliili ga nan, a wi wi falipyewaa tórigo wi syɛɛn-yeribèle kurugo níì jo wi sa be pye: ‹Yaliiri n sámaga n kwɔ́ɔ, yaa maa ye ba lìi.› 18A pe myɛ sa ni wi nyɛ́ɛri níì jo wi poro kpàraco. Wozeliw maa jo: ‹Mii n seʔe syɔɔ, ki n yɛlɛ mii í kári sa gi wéle. Mii i mɔ nyɛ́ɛri mi sa wi pye wi mii kpàraco.› 19A wee jo: ‹Mii n nìpɛɛribéle kagunɔ syɔɔ, mii i syée sa ra fála da wéle ní be ní. Mii i mɔ nyɛ́ɛri mi sa wi pye wi mii kpàraco.› 20A wee jo: ‹Mii n cɔlɔɔ pɔri tɔ́ɔliw ni, gee bee na mii a gbǎn taa kári yaà í.› 21A falipyew lúru n kári n sáà gee bee joo wi kàfɔw ma. Lǎli bee ni a kpáagi fɔ́lɔ fúngo tanʔa, a wi wi falipyew pye: ‹Da syée kelekele kěgi kadàlaya ní kàlari-kóloyi na mi sa foomɔfɔbèle ní tɔvanayi fɔ̀ɔlɔ yeri, n fàra fúunbèle ní syɛɛnmɔngɔbèle na maa maa.› 22A cɛɛri ga pye a falipyew pan n baa jo: ‹Ni kàfɔlɔ, gee mɔ da joo lè, mii n sáà gi kpéʔele, koro ní ki myɛ ní kpáagi ga sèʔê nyìn í.› 23A kàfɔw níì falipyew pye: ‹Da syée kogboloyi, ní tɛɛsùluyi sɔ́lɔgɔmɔ ni mi sa syɛ́ɛnbèle ŋàʔana paa maa koro ga pye mii kpáagi í ba nyìn. 24Mii a tɔ̀nɔ́ gi joo yele ma, syɛ́ɛnbèle bee mii da yeri lè, bele bee wàa nibin a tée mii yébiligi lìile laala bi wéle í.› »
Gee syɔɔn yɛlɛ bi foro lè si pye pìitamaɔ
(Mat 10:37-38)
25Syɛɛnnɛʔɛmɛ maa taʔa Zyezu na ni nyaari ní wi ní, a wi fíige ni nyuu ní be ní níì jo: 26#Mat 10:37 «Syɔ́ɔnwee faala wi ga pan mii ma lè, kapye wi ga mii kéeli yaʔa a li wi dɛ́nɛ n sɔ̀lɔ wi tóow, ní wi nɔ́ɔw, ní wi céw, ní wi pìíbèle, ní wi senyɛnnǎnbèle, ní wi senyɛnjebèle wólo na í, ní wɔ́ɔ̀ mii kéeli yaʔa a li wi dɛ́nɛ n sɔ̀lɔ wiyɛɛ na í, wee bee a gbǎn pye mii pìitamaɔ í. 27#Mat 10:38; 16:24; Mar 8:34; Luk 9:23 Syɔ́ɔnwee ga pye lè wi o wi tiimaa tiiparigi lée ni maa mii kurugo í, wee bee a gbǎn wɔ́ɔ pye mii pìitamaɔ í. 28Níì cán wìí wi naa yele ni, wi ga ni caa bi kpaataʔaga faan, wi a tɛ́ɛn bi gi faanlɔri tímana gbɛnʔɛnɛ í, jàngó bi gi cán kapye woro wáliw n nɛʔɛ n yɛlɛ bi gbǎn gi faan í? 29Kapye koro ban í, wi ga gi kàpɔɔnw le, wi si ga gbàn n gi kwɔ́ɔ í, ki nyaafɔbèle myɛ a ra wi tɛ́ʔɛ, 30sáā gi nyuu si jo: Nǎnw naa si zǐn kpáagi naa kàpɔɔn le, wi fanʔa si ga taa gi na bi gi kwɔ́ɔ í. 31Ba fànʔafɔwìí wi yaà, kapye wi i syée sa kapɛɛnnɛ kpúmɔn ní fànʔafɔwaa nikwɔɔ ní, wi a tɛ́ɛn bi gi tímana gbɛnʔɛnɛ í, jàngó bi gi cán kapye woro ní wi kapɛɛnkpumɔnbèle selebingéle kagunɔ a sa fànʔa taa bi gbǎn wee jáa wi maa woro ma lè ní wi wóbèle selebingéle kɛɛ ní í? 32Kapye wi fanʔa o gi na í, lǎli ni wee bee sèʔé i nyɛ lè tɛɛ̀leelige ni, wi a tundunbéle tun pe sa kapɛɛnni sàala caa wi ma. 33Kánmi bee na yele wee ga pye lè, wi ga kàdoʔo wáa yáriri myɛ ma di nyɛ wi ma lè í, wee bee a gbǎn pye mii pìitamaɔ í.
Sólomi tàanma bi kwɔ́ɔ lè
(Mat 5:13; Mar 9:50)
34«Sólomi n nyɔɔ, kàjáa bi tàánmi ga kwɔ́ɔ, nyàʔá ní syɔɔn a bi sámaga bi ní tɛ́nɛ? 35Pi a yarigaa nyɔɔ tári na í, pi a wɔ́ɔ kárigi wólo nyɔɔ í, fwɔɔ pe bi wáa kàfugi na. Líiweele ga pye wee na lè, wi wi líiyi cáan waa lúro.»
Currently Selected:
Luki 14: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
