Luki 15
15
Bàpuuniw ní wi nyaani
(Mat 18:12-14)
1 #
Luk 5:29-30
Wálisyɔɔbèle ní kapeebyebèle myɛ maa ni nùuní Zyezu na jàngó bàā wi syɛ́ɛnri lúro. 2A Farisibèle ní làlwaw sɛ́bɛwelebéle i wi sànʔá níì jo: «Nǎnw naa i kapeebyebèle sámagi ni có, ní wɔ́ɔ i líi ní be ní.»
3A Zyezu kàseeli naa wáa be ma níì jo: 4«Bàala dabata ga pye yele wàa ma á wàa nibin pùuni, wi a bǎbèle dabata nibin fɔ̀n yaʔa yaà sìnbirigi ni sáā syée wobuuniw kurugo bi sa ra wi caa, fwɔɔ bi taa sa wi nyaa ì? 5Wi ga sáà wi nyaa, wi a wi láa taʔa pwɔ́ɔgi na ní fundaanra ní. 6Wi ga baa nan kpaʔa na, wi a wi tàannyɛnbèle ní wi kètɛ́nɛnyɛnbèle yeri bi kpóʔoro si be pye: ‹Ye ba fundaanra kpéʔele ní mii ní. Níì cán mii bǎw wi da pùuni lè, mii n sáà wi caa n nyaa.› 7Mii a gi joo yele ma, kánmi bee na gi nyɛ kapye kapeebyeo nibin n kàdoʔo wáa wi kapeegèle ma, fundaanra a kpéʔele nyɛ̀ʔɛni na wee bee kéele na bi sɔ̀lɔ syɛɛnsinbèle dabata nibin fɔ̀n kéele na, bele be nyɛ lè pe màko o nyɛ bi kàdoʔo wáa be kapeegèle ma í.
Wálifiiw wálipile pùununɔ ní li nyaani kéele
8«Ba cewìí wi nyɛ, wálifiio wálipiigéle kɛɛ ga pye wi ma á làa nibin pùuni, wi a fètinni le sáā kpáagi pée bàā li sámagi da caa, fwɔɔ bi taa bi sa li nyaa í? 9Wi si ga li nyaa, wi a wi tàannyɛnbèle ní wi kètɛ́nɛnyɛnbèle yeri bi kpóʔoro be nyɛ lè cébèle, si be pye: ‹Ye ba fundaanra kpéʔele ní mii ní. Níì cán mii wálifiiw wálipile li da pùuni lè, mii n li caa n nyaa.› 10Mii a gi joo yele ma, kánmi bee na gi wɔ́ɔ i nyɛ kapye kapeebyeo nibin n kàdoʔo wáa wi kapeegèle ma, fundaanra a pye Kolocɔlɔɔ tundunbèle ma nyɛ̀ʔɛni na.»
Jaafɔw pùununɔ ní wi nyaani kéele
11A Zyezu níì jo: «Jaafɔɔlɔ siin maa pye nànwaa ma nànbēle. 12A cɔnɔvɔw kɔ́ɔ̀ be tóow pye: ‹Abaa, gee mii a kɔ́ ba taa lè mɔ kɔ́rigi ni, mii lɛɛli kaan mii ma.› A tofɔw wi lɔ́ri myɛ lɛɛ be na. 13A canya cɛɛri ga kwɔ́ɔ, a cɔnɔvɔw wi kɔ́rigi lɛɛlɛ láa n kári kùleelile ni n sáà ki myɛ nyɔʔɔrɔ yaà kanɔnʔɔri, ní yatoolɛɛri na. 14Lǎli ni wi lɔ́ri myɛ lìi n kwɔ́ɔ lè, a kateekpɔʔɔ baa too tári bee na, a fɔ̌ngi too wi na. 15Lǎli bee ni a wi sáà wiyɛɛ daʔa tári bee wówaa na, a woro wi tórigo wi séyi ma níì jo wi sa ra gbòyooro nàʔá yaà. 16Wi maa ni sɔ̀ngí tiisanree gbòyoori líi lè, woro a ra dee bee tàa líi da tíngi, syɔɔnwaa faala si ga tàa kaan wi ma í. 17Amɛɛ sícilimɛ kɔ́ɔ̀ jée wi ni lè, a wi jo: ‹Falipyebèlē saʔa si zǐn i nyɛ mii tóow ma ni líi ni fɔ̀rɔgí a tàa i kòró, mii si tɔ̀nɔ́ ba kùu lé nya kateegi kɔ́yɔ ni? 18Mii a yìrí da syée mii tóow ma bi sa wi pye: Abaa, mii n kapeele pye nyɛ̀ʔɛni#15:18 nyɛ̀ʔɛni: Mɔ ga lóʔo tɛ́ɛgi naa ni nyɛ̀ʔɛni, Kolocɔlɔɔ na be nyɛ. Mi wɔ́ɔ mi vɛrisew 21 wéle. na, ní wɔ́ɔ̀ li pye mɔ na. 19Ki ga yɛlɛ pe ní da mii yiri mɔ jáa í. Mi mii láa àmɛɛ mɔ falipyewaa nyɛ lè.› 20Níì fala n yìri ni syée wi tóow ma.
N wi yaʔa tɛɛ̀leelige ni, a wi tóow wi wéle n nyaa, a wi nyínimi wi taa, a wi fala n fàn n sáà wi wáa n mígi níì wi syɔɔnri syɔɔnri. 21A jaafɔw wi pye: ‹Abaa, mii n kapeele pye nyɛ̀ʔɛni na, ní wɔ́ɔ̀ li pye mɔ na, ki ga yɛlɛ pe ní da mii yiri mɔ jáa í.› 22Koro ní ki myɛ ní a tofɔw gi joo wi falipyebèle ma níì jo: ‹Ye sa burojǎngi láa gee gi nyɔɔ yi myɛ na lè, yaa maa kelekele ye ba le wi na, yé vèʔeo le wi kabeli na, yé wɔ́ɔ ye taʔalaya le wi tɔ́lɔyi na, 23yáā maa ní sǐnmi náapiige ní ye ba gi kpóo, wo sámaga wo lìi, wáā fundaanra kpéʔele. 24Níì cán mii jáaw naa maa kùu, wi si n nyán n pye sìi na. Wi maa pùuni, mii si n wi nyaa níìgēle.› A be fala n séli ni fundaanra kpéʔele.
25Wi pìiseliw si maa pye ségi ma. Amɛɛ wi yìri yaà ni maa lè n ba ni nùuní kàcooli na, a wi i kɔ̀nʔɔri kpúmɔnmɔ lúro. 26A wi falipyewaa yeri n baa yíbe jàngó bi gi cán gee gi yaà lè. 27A wee bee wi pye: ‹Jo mɔ cɔnɔw wi pan yaà. A mɔ tóow si baa sǐnmi náapiige cò n kpóo, àmɛɛ wi lúru n pan woro ma lè wonyíɔn ní.› 28A wi fúngi tanʔa wi na, wi ga fɔ̀lɔ bi jée kàcooli ni í. A tofɔw yiri n baa wi kɛɛlɛ. 29A wi wi tóow pye: ‹Wéle, mii i fála mɔ ma nlaa yaà yɛ́ɛgèle naa myɛ ni, mii ga kɔ́ɔ̀ mɔ kéelaa faala cée nyáana í. Koro ní ki myɛ ní mɔ ga kɔ́ɔ̀ sikepiige kaan mii ma koro ga pye mii í fundaanra kpéʔele ní mii tàannyɛnbèle ní í. 30Kàjáa mɔ jáawee wi mɔ lɔ́ri láa n sáà kálagi nànjaacebèle na lè, a woro ga pan, a mɔ baa sǐnmi náapiige cò n kpóo wi na!› 31A tofɔw wi pye: ‹Dóō, mɔ i naa ní mii ní làrigèle myɛ ni, mii yáriri myɛ i nyɛ mɔ wóro. 32Ki si n yɛlɛ waa kɔ̀nʔɔ́ wáā fundaanra kpéʔele, níì cán mɔ cɔnɔw naa maa kùu, wi si n nyán n pye sìi na. Wi maa pùuni, wo si n níì wi nyaa.› »
Currently Selected:
Luki 15: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
