HLIMI 22

Abrahamu wí ma kondo mà yaʔa bì Isake fara we sraʔá

1Ki kaʔa ke kruʔu ma, Nyɛʔɛlɛ à li Abrahamu po mòo wele. Li daʔá yo wí ma mà yo: «Abrahamu!» Wɔ̀ɔ syɔ mà yo: «Mí ŋa.»

2Nyɛʔɛlɛ à li Abrahamu po we: «Ma ma pyɔ kpe, ŋa wí na ma glanʔa Isake we. Ma kɛri wa klo la ni pé na yeri Moriya ge. Ma yɔɔ fara wa na ma sraʔá hoʔo woo wa angolo là na la mi bi yà dyɛʔɛ má na ge.»

3Ki kpɛntoʔo na, Abrahamu wɔ̀ɔ bâ jɛ fan mà wi aconʔo pa wa wi sofɛnlɛ na le mà wi tungɔɔ najɛɛ syɛn co ní wi pyɔ Isake nì we. Wi dá kɛnhɛnrɛ jaʔabu da nì wí bi yà sraʔá hogo mà kpe na sye wa deʔe ga na Nyɛʔɛlɛ li da jɛʔɛ́ wí na ge. 4Wlɛrɛ tanriwoʔo na, Abrahamu wɔ̀ɔ wi yɛʔɛ̀ jrɛʔɛ mà wele wa wi yɛʔɛma ní mà deʔe nya wa leʔe ga na wi dáa sye ge. 5Abrahamu wɔ̀ɔ kí yo wi tungɔɔ ma be mà yo: «Ye kò naʔamɛ sofɛnlɛ nì le. Mì nì najɛ ní wó bi hɛnʔɛrɛ wa yɛʔɛma ni bi yà Nyɛʔɛlɛ kpɔʔɔ le, Ki kruʔu ma pa wo hru bì ban yè krugu.»

6Abrahamu wɔ̀ɔ kɛnhɛnrɛ kpe mà ti pa wi najɛ Isake ma we da nì pé bi yà sraʔá hogo we. Wiì ma kwɔʔɔ co ní kpele nì le. Pe syɛnmu à pe plɛn na tanri na sye. 7Isake wi dáa nyu wi to Abrahamu nì we mà yo: «Na to.» Wɔ̀ɔ syɔ mà yo: «Mí ŋa.» Isake wɔ̀ɔ wí po: «Kwɔʔɔ ní kɛnhɛnrɛ nì pí ba, di mbyɔ wí nyɛ hanbe ŋa wó bi ya fara sraʔá bùu hogo ge?»

8Abrahamu wɔ̀ɔ yo: «Na pyɔ, Nyɛʔɛlɛ lí bi yà mbyɔ kala tyonri le lì yɛ ŋa wó bi yà fara sraʔá ge.» Pe syɛnmu à pe plɛn na tanri na sye. 9Nyiŋi ga na pe da gaâ no wa deʔe ga na Nyɛʔɛlɛ li da jɛʔɛ́ wí na ge, Abrahamu wɔ̀ɔ sraʔá farahaʔa hanri mà kɛnhɛnrɛ pa waʔa na mà wi pyɔ Isake pwɔ we mòo pa wa sraʔá farahaʔa yugu na wa kɛnhɛnrɛ na de. 10Ki kruʔu ma, Abrahamu wɔ̀ɔ wi kyɛʔɛ yrigi mà kpele kpe jango bì wi pyɔ konli we.

11Ki nyiŋi na, Bajegɔ Nyɛʔɛlɛ li mlɛŋɛ wɔ̀ɔ ko wa nyɛʔɛlɛ na le ma Abrahamu yeri mà yo: «Abrahamu! Abrahamu!» Wɔ̀ɔ yo: «Mí ŋa.»

12Mlɛŋɛ wɔ̀ɔ wí po: «Mò gá ma kyɛʔɛ haʔala bì maʔa pyɔ na we. Mò gá yraʔa kà hanri wí na kpo. Mɛjɛn mí maʔa cɛn ŋaŋa ni mà yo má na fyaʔa Nyɛʔɛlɛ na le. Ki kala na mɛ ìn diʔi ce bí ma pinigbele kan le na ma.»

13Abrahamu wɔ̀ɔ wi yɛʔɛ̀ jrɛʔɛ mà wele mà mbapɔlɔ wa nya wi nyɛŋɛɛ ké ma panri wí na wa tipibi pa gbogbolo ni. Abrahamu wɔ̀ɔ ki mbapɔlɔ co mà bɔ́ɔ̀ fara sraʔá hogo woo wi pyɔ wi nolo ni le.#22:1-13 ma wèle wa Ebr 11:17-19 ni wè. 14Abrahamu wɔ̀ɔ yele kan ki deʔe na naʔa yeri Bajegɔ Nyɛʔɛlɛ Yire.#22:14 Bajegɔ Nyɛʔɛlɛ Yire: Na ma loʔo Yire Bajegɔ Nyɛʔɛlɛ, ki na po pé yo: Wa Bajegɔ Nyɛʔɛlɛ li angolo na le, wò Fɔlɔ wí bi baʔa tyonri. Kiì kɔsɔ na fɔ mà bâ no alaʔa na pé naʔa nyu ma yo: Wa Bajegɔ Nyɛʔɛlɛ li angolo na kí bi yà jonri.

15Bajegɔ Nyɛʔɛlɛ li mlɛŋɛ wɔ̀ɔ ko wa nyɛʔɛlɛ na le mà Abrahamu yeri ki syɛnwoʔo na 16mà yo: «Mí bi nà klan domi na na, Bajegɔ Nyɛʔɛlɛ à li yo ban. Mɛjɛn má ma ki woʔo ga hanri mɛɛ ki ce ná ma ma pinigbele na le, 17mí bi frɛmɛ kan má ma bì ma kluʔu pii nyɛʔɛ be nɛ pa ŋoŋoo nyɛ gee wa namuru ni de bì pe nyɛʔɛ pe po nɛ pa nyugbɔmo tanla tanyrɛʔɛ nyɛ ge. Pé bi baa pe bɛnfɛɛ jin be.#22:17 ma wèle wa Ebr 6:13-14 ni wè.

18Mí bi frɛmɛ kan klòʔo hɛɛn pè bɛfu ma naʔa tra na de ma kluʔu pii pe kala na le, mɛjɛn má ma na kayoʔo kpɔʔɔ ge.»#22:18 ma wèle wa Gal 3:16; Pit 3:25 ni wè.

19Abrahamu wi gâ hru mâ kɛri wi tungɔɔ krugu be kɔ, à pe yâ blɛn mà jɛ na sye Bɛrisyeba ni we, mɛjɛn Abrahamu wi da glɛ́n wa Bɛrisyeba wiì ni.

20Ki kaʔa ke kruʔu ma, à pe báʔà yo Abrahamu kan we mà yo: Welé, Milika wí ma pii pèè he nabii kpo ma conlo Nahɔri ma we. 21Utisi wí nyɛ pikplɛɛ. Busi wɔ̀ɔ po wi conlo. Kemuwɛli wí nyɛ Aramu wi to, 22Kesedi nì, Aso nì, Pilidasyi nì, Jidlafu nì, ní Betuwɛli nì. 23Betuwɛli wɔ̀ɔ Hrebɛka he. Milika wi pii natanri bee wi dá he Abrahamu wi conlo Nahɔri ma we pee bɛ. 24Wi yejɔ ŋa pe dáa yeri Hrewama wii fanna wɔ̀ɔ Tebasyi he, ní Gahamu nì, ní Tahasyi nì, ní Maaka nì.

Currently Selected:

HLIMI 22: NLK10

Highlight

Copy