HLIMI 23

Abrahamu wí ma fanʔa syɔ Sara woʔo

1Sara wi dá da yɛʔɛ́ too noli ní yɛʔɛ́ nasyɛn, àʔa po wi nyuwyeʔe yɛʔɛ́ kè bɛfu wi. 2Sara wi dá gu wa Kiriyati Ariba, ga kí nyɛ wa Ebron, Kana klo ni le. Abrahamu wɔ̀ɔ bâ Sara wi kùʔù kaʔa tyonri mà kpele wi kùʔù na ge. 3Ki kruʔu ma, Abrahamu wɔ̀ɔ jɛ kpó tanla mà bâ yo Ɛti wi pii ní be mà yo: 4«Mí nyɛ nabonŋo naʔa ye klo ni le. Ye fanʔa kà kan ná ma jango bì na kpoo le wi jɛ̀ be na yɛʔɛ na ge.»

5Ɛti wi pii à pe Abrahamu po we: 6«Ma lòʔó wo ma, wò fɔlɔ. Má nyɛ hɛn kpangbanŋa naʔa wò kpafoʔo ni ge. Ma ma kpo le wa wò fanra ni de. Ma kà fara. Nà ma kpo le wa hɛn ŋa fanʔa ni tɔʔɔ, wòo ki ce.»

7Abrahamu wɔ̀ɔ jɛ ma bâ kunbiʔi kán be klo li hɛɛn tanla be be Ɛti pii pe yɛʔɛ̀ ma ge. 8Maʔa yo pé ma ma yo: «Nàʔa po yé maʔa ta bì na kpo le jango wi jɛ̀ be na yɛʔɛ̀ na ge, ye lòʔó ná ma, ye Efron nyɛri na kan, ŋa Tisowari pyɔ we. 9Wi Makpela ŋglɛnwyeʔe ga kan nà ma kí nyɛ be wi kere kanla na mâ po wi woʔo ge, wiʔi kan ná ma gbejanra na jango ki krɛ̀ʔɛ̀ mì na kuwama deʔe naʔa yè kpafoʔo ni ge.»

10Efron wi dá bo be klɛnhaʔa Ɛti wi pii pe kpafoʔo ni mà po Ɛti pyɔ wà wi. Wɔ̀ɔ Abrahamu po we Ɛti wi pii pè bɛfu pe yɛʔɛ̀ na ní hɛɛn bee ní pé na jin wa ki kàʔà ki goyɛʔɛ na ge. 11«Ayo, na fɔlɔ. Ma lòʔó ná ma. Mí bi ki kere da kan de ma ma, ní ŋgɛnwyeʔe ga nì kí nyɛ wa ti nî ge. Mí bi pi kân má ma na klo pii pe yɛʔɛ̀ na. Ma ma kpoo le we.»

12Abrahamu wɔ̀ɔ kunbiʔi kán be ki klo hɛɛn pe yɛʔɛ̀ na, 13màʔa yo Efron ma we ki klo hɛɛn pe yɛʔɛ̀ na mà yo: «Ma lòʔó ná ma, mí na ma fɛn, ma na yaʔa bì kere ti fwɔʔɔ ton mà ma bì na kpo le we.»

14Ki nyiŋi na Efron wɔ̀ɔ Abrahamu po we: 15«Na fɔlɔ, ma lòʔó ná ma. Tra da tí bi gban bí bo too ticɛrɛ kpo waafiʔi na. Tí bi nyaʔa no, tí ba wo wa wò na ge? Ma ma kpoo le we.» 16Abrahamu wɔ̀ɔ loʔo Efron ma mà ki gbejanra no tonli màʔa kân Efron ma we Ɛti wi pii pè bɛfu pe yɛʔɛ̀ na. Wi dá ki too ticɛrɛ tonli yawafɛɛ gbejanra tonlimi pomo na mà ti kân wí ma. 17Efron wi kere da ti dá bo wa Makpela ní Mamire wi yɛʔɛ̀ ma ge. Ki kere yoo ŋglɛnwyeʔe yoo ba pi dá bo wa, tiri tì bɛfu ní da ti dá bo wa kere ni, ní ti kanŋaa ní. 18Pì bɛfu à pi krɛʔɛ Abrahamu wi wobo Ɛti wi pii pe yɛʔɛ̀ na ní pè bɛfu ní bee pe dáa jin wa kàʔà ki goyɛʔɛ na ge.

19Ki kruʔu ma Abrahamu wɔ̀ɔ wi cɔ Sara le wa ŋglɛnwyeʔe ga ní wa Makpela kere ni kí nyɛ Mamire tanla. Ki na po pé yo Ebron wa Kana klo ni le. 20Kere nì, ní ŋglɛnwyeʔe ní à pi klɛn mà Abrahamu wiì kan mà po wi kuwama ba wi dá da Ɛti wi pii ma be.

Currently Selected:

HLIMI 23: NLK10

Highlight

Copy