YOHANE 6

Kuighutija vantu viku visano

(Mat. 14:13-21; Mrk. 6:30-44; Luk. 9:10-17)

1Nyuma ya ivyo Yesu akatonga sela ila ya bahari ya Galilaya, niyo ya Tiberia. 2Na luvungano lubaha vakamratera, kila vevonie maluvengo erongiie vawaji. 3Yesu naye akakwea he ntuvi, akaikaa si uko hamwe na varateri vakwe. 4Na Pasaka, msi m’baha wa Vayuda, wekiho hafuhi. 5Aho Yesu ekivusha meso akwe akavona luvungano lubaha vekiza hakwe, akamti Filipo, “Tuzorire hi mikate nesa ava vale?” 6Na icho ekitetie kwa kutamghesha; ambu ye mwenye ekimanyije cho eneketa. 7Filipo akamgharusha, “Mikate ya dinari maghana meri teivafika iti kila mmwe avone neri kadori du. 8Mmwe wa varateri vakwe, Andrea mjinawe Simioni Petro, akamti, 9“Aha hena m’bwange ena mikate misano ya ngano na samaki mbiri, mira ivi ni kini he vantu vajinki sa ava?” 10Yesu akati, “Ikajani vantu si.” Hala hantu hekina mani mangi. Vantu va kiume vakaikaa si, vose ni sa viku visano. 11Niho Yesu akaghuha ila mikate, akaanjela, akavaghavia vala veikae si; nirehuvo na jila samaki, sa vuntu veenda. 12Navo vekinaghute, akavati varateri vakwe, “Vunganyani vibendo vyeshele, hasikete cho cheteka.” 13Niho vakavivunganya, vakaizuja vikapu ikumi na viri, vibendo vya mikate misano ya ngano vyeshele hala vekila. 14Niho vala vantu vekinavone lula luvengo eketie, vakati, “Kididi uu niye ula mroti eza he ii si.”

Yesu etonga mpisoni, evata wanga he mpombe

(Mat. 14:22-27; Mrk. 6:45-52)

15Ingeri Yesu ekinamanye iti veenda kuza kumgura iti vamghoshe mfumwa, akanyyembeluka, akatonga kangi he ntuvi ye mwenye. 16Hekinaswe varateri vakwe vakasea he bahari; 17vakaingia he ngilawa vakavoka kukelanya bahari kutonga Kapernaumu. Naho kija chakenja kugwa, neri Yesu tekinavafikia. 18Na bahari nayo ikavoka kunyavurika vuntu vwa nkungu mbaha yefefeta. 19Niho vetonja ngilawa yavo kiringanyo cha maili ntatu nne, vakamvona Yesu ekivata wanga he bahari, ekizengelela he ngilawa; vakafoleka. 20Naye akavati, “Nimi, musifoleke.” 21Niho vakaenda kumghuhia na he ngilawa; hala indi ngilawa ikafika he lila isanga hantu vekitonga.

Vantu veenda luvengo

22Msi wa keri luvungano veimuke sela ya bahari vakavona iti tehena ngilawa ingi uko, esire mwe; kangi iti Yesu teingie he ila ngilawa hamwe na varateri vakwe; mira varateri vakwe vetongie vo venye. 23Mira hakaza ngilawa jingi kufuma Tiberia mhaka hafuhi na hala hantu veliie mikate, igheri lila Mfumwa aanjelila. 24Niho luvungano vekinavone iti Yesu teho uko, neri varateri vakwe, vakaingia he ngilawa vo venye, vakatonga Kapernaumu vekimwenda Yesu. 25Aho vekinamvone sela ila ya bahari, vakamti, “Rabi, we wezie rini aha?”

Kijo cha nkalamo

26Yesu akavagharusha, akati, “Kididi, kididi, nimutio, Unywi munienda, si hala mwevonie luvengo, mira ni kila mwelie ila mikate mukaighuta. 27Musibinukie kijo chekondika, mira kijo cheneikaa mhaka he nkalamo ya kae na kae; echo Mwana wa Mntu enemuinka, ambu uo niye Vava eye Mrungu.” 28Niho vakamti, “Tughende ze nesa tuidime kuronga ndima ja Mrungu?” 29Yesu akagharusha, akavati, “Ii niyo ndima ya Mrungu, mumwitikije ula etumiwe niye.” 30Vakamti, “Ni luvengo ani ra waronga, nesa tuluvone tukuitikije? Uronga ndima ani? 31Vavava vetu vekie mana uko nyika, sa vuntu cheandikwe: ‘Ekivainkie kijo cha uko wanga nesa vale.’” 32Yesu akavati, “Kididi, kididi, nimutio, Mose siye ekimuinkie kijo kila cha uko wanga, mira Vava wangu emuinka unywi kijo cha idi chefuma uko wanga. 33Ambu kijo cha Mrungu ni kila chesea kufuma uko wanga na kuinka si ii nkalamo.” 34Niho vakamti, “Mfumwa, misi yose utuinke icho kijo.” 35Yesu akavati, “Mi nimi kijo cha nkalamo; ye eza hangu tekasikie nza neri, na ula eniitikija tekazesika nkiru narini. 36Mira nekimuvwirire iti mwenivonie mira temuniitikije. 37Vose Vava eninka veneza hangu; na kila ye eza hangu sikamtaghe na nze neri. 38Ambu mi siseie kufuma uko wanga iti nironge mikundire yangu, esire mikundire ya ula enitumie. 39Na mikundire ya ula enitumie ni ii, iti he vala vose eninkie nisiretesha neri mmwe, mira nimvushe he vefwie msi wa mkengelejo. 40Ambu mikkundire yakwe Vava ni ii, iti ye emrereha Mwana na kumwitikija ye, akete nkalamo ya kae na kae; nami ninemvusha he vefwie msi wa mkengelejo.”

41Niho Vayuda vakadunkunyika, kila etie, “Mi nimi kijo cheseie kufuma uko wanga.” 42Vakati, “Uu siye Yesu, mwana Yosefu, eye twemmanyije vavee na mlala wavo? Iki eti ze uu, ‘Netesea kufuma uko wanga?’” 43Niho Yesu akagharusha, akavati, “Musidengerete venye kwa venye. 44Tehena mntu eidima kuza hangu ekisajutwa ni Vava enitumie; nami ninemvusha he vefwie msi wa mkengelejo. 45Cheandikwe he varoti: ‘Na vose veneoka vechejijwe ni Mrungu.’ Heicho ula esikia na kukucheja he Vava, eza hangu. 46Si iti hena ye anamvona Vava, esire ula efumie ha Mrungu; uo niye emvonie Vava. 47Kididi, kididi, nimutio, Ye eitikija ena nkalamo ya kae na kae. 48Mi nimi kijo cha nkalamo. 49Vavava venyu velie mana uko nyika; vakafwa. 50Iki ni kijo cheseie kufuma uko wanga, iti mntu akile asirefwa. 51Mi nimi kijo chena nkalamo cheseie kufuma uko wanga; mntu ekila icho kijo enekalama kae na kae. Na kila kijo mi nenekifunya ni mwiri wangu, he vuntu vwa nkalamo ya si ii.”

52Niho Vayuda vekanana venye na venye vekiti, “Uu mntu eidima ze kutuinka mwiri wakwe tuule?” 53Niho Yesu evati, “Kididi, kididi, nimutio, Mwekisala mwiri wa Mwana wa Mntu, na kunwa sakame yakwe, temuna nkalamo yeho he unywi. 54Ye ela mwiri wangu na kunwa sakame yangu ena nkalamo ya kae na kae; nami ninemvusha he vefwie msi wa mkengelejo. 55Ambu mwiri wangu ni kijo cha idi, na sakame yangu nichanwa cha idi. 56Ye ela mwiri wangu na kunwa sakame yangu eikaa hemi; nami niikaa heye. 57Sa vuntu Vava mwenye moo enitumie mi, nami nina moo he Vava; nirehuvo ye enila eneketa moo hemi. 58Iki nicho kijo cheseie kufuma uko wanga; si sa vuntu vavava velie vakafwa; mira ye ela kijo icho enekalamaa kae na kae.” 59Viteto ivyo evitetie he sinagogi, hala ekicheja uko Kapernaumu.

Varateri vena matatanyi

60Niho vantu vajinki he varateri vakwe vekinasikie, vakati, “Mburi ii ni nkuji, ni ani eveiwe kuisikia?” 61Yesu akatwarija he ngoro yakwe, iti varateri vakwe vedunkunyikia icho kiteto, akavati, “H’ii! kiteto icho kimuhosha? 62Kineoka ze, mwekinevona Mwana wa Mntu ekikwea na uko hantu ekiho kivoko? 63Mpeho niyo yekalamija, mwiri teuveiwa kintu; viteto ivyo namuvwira ni mpeho, kangi ni nkalamo. 64Mira hena va kumwe he unywi vesiitikija.” Ambu Yesu ekiremanya too kuvoka iti ni vani vesiitikije, na ni ani enemrengeha. 65Akati, “He vuntu vwa icho nemuvwirire kuti tehena mntu eidima kuza hangu esiteghenjwa ni Vava wangu.”

Petro ezumira iti Yesu ni Kristo

66He vuntu vwa ivyo vajinki he varateri vakwe vakahunduka na nyuma, vesiretonjanya naye kangi. 67Niho Yesu akavati, vala ikumi na veri, “H’ii! na unywi muenda kutonga?” 68Niho Simoni Petro akamgharusha, “Mfumwa, tutonge hakwe ni? We una viteto vya nkalamo ya kae na kae. 69Na uswi twaitikija, kangi twamanya iti we niwe Ezerire wa Mrungu.” 70Yesu akavagharusha, “H’ii! mi simmusaghure unywi ikumi na veri, na mmwe wenyu ni mrenge?” 71Ekimteta Yuda, mwana Simoni Iskarioti; ambu uo niye enemrengeha; naye ni mmwe wa vala ikumi na veri.

Currently Selected:

YOHANE 6: CHSUNT67

Highlight

Copy