YOHANE 7
7
Yesu na vajinawe
1Nyuma ya ivyo Yesu ekitonga uko Galilaya; tezeenda kutonga kangi Yudea, ambu Vayuda vekienda kumkoma. 2Na ula msi m’baha wa Vayuda, msi wa vubanda, wekiho hafuhi. 3Niho vandughu vakwe vakamti, “Vuka aha utonge Yudea, nesa varateri vako navo vaveiwe kuvona ndima jako wejironga. 4Ambu tehena mntu eronga mburi kwa mpiso, naye mwenye eenda kumanyika. Wekiketa mburi iji, huvo kuvonyeshe he si ii” 5Ambu neri vandughu vakwe tevekimwitikije. 6Niho Yesu akavati, “Igheri langu lesinafika; mira igheri lenyu liho misi yose. 7Si ii teiidima kumuvihiwa unywi; mira mi inivihiwa, kila mi neitetia vuonwa iti ndima javo ni mbivi. 8Kweani engaunywi he uo msi m’baha; mi sinate kukwea he uo msi m’baha; ambu igheri langu telifika.” 9Naye ekinakenje kuvavwira ivyo, akakuikarira du uko Galilaya.
10Vandughu vakwe vakanakenje kukwea kutonga he uo msi m’baha, niho naye akakwea, si he kukufunyirija mira kwa mpiso. 11Niho Vayuda vkamwenda he ula msi m’baha, vakati, “Eho hio?” 12Hakaketa madunkunyiko mangi he llula luvungano vuntu vwakwe. Va kumwe vakati, “Ni mntu wedi.” Na vangi vakati, “Si huvo, mira eisha mavungano.” 13Mira tehena emlangie boo, kila vekivafoleka Vayuda.
Yesu echeja uko Yerusalemu iti efumie ha Mrungu
14Hekifika ghati na ghati ya ula msi m’baha, Yesu akakwea akaingia he Nyumba ya mtaso, akacheja. 15Vayuda vakamaka vekiti, “Uu eidime ze kuketa icha naye esisomie?” 16Niho Yesu akavagharusha, akati, “Michejire yangu si yangu mwenye, mira ni ya ula enitumie. 17Mntu ekikunda kuronga mikkundire yakwe, enemanya mburi ja ila michejire iti ifuma ha Mrungu, kana iti mi niteta vyangu mwenye du. 18Ula eteta vyakwe mwenye du, eenda ngazo yakwe mwenye; mira ula eenda ngazo ya ula emtumie, uo ni wa idi, neri heye tehena makombere. 19H’ii! Mose temuinkie myomongwa? mira tehena neri mmwe wenyu eigurisha myomongwa. Hanini mweenda kunikoma?” 20Luvungano vakagharusha, “Oo! utena mpepo! Ni ani eenda kukukoma?” 21Yesu akagharusha, akavati, “Mi nerongie ndima mwe na unywi vose muimaka. 22Mose akimuinkie kitavani; mira si iti kifuma he Mose, mira he vazima; na unywi mutavana mntu msi wa sabato. 23Heicho kakicha mntu etavanwa msi wa sabato, nesa myomongwa yakwe Mose isirekondika, hanini mi mwenisikia oro kila nebandije mntu pere msi wa sabato? 24Musikulahire vuntu mwevona, lahani mlaho wa idi.”
25Vantu kumwe va Yerusalemu vakati, “H’ii! Uu siye vekimwenda iti vamkome? 26Kave eteta boo, neri tehena cho vemvwira! Hangi kive ava vabaha vemanyije nezo iti uu niye Kristo? 27Mira uu twemanyije hantu efuma naho; mira Kristo ekineza tehena emanya hantu efuma.” 28Niho Yesu akateta na wanga he nyumba ya mtaso, ekicheja, ekiti, “Mi mwenimanyije, na uko hantu nefuma mwehamanyije; neri sikuzire mi mwenye; mira ula enitumie ni wa idi, unywi mwesimmanyije. 29Mi nemmanyije kila nefuma hakwe, naye niye enitumie.” 30Niho vakaenda kumgura; mira tehena mntu erongie mkono, ambu saa yakwe yasanafika. 31Vantu vajinki he luvungano vakamwitikija; vakati, “Kristo ekineza, ngea eneronga maluvengo mangi kuvecha aa uu earonga?” 32Vafarisayo vakasikia luvungano vekidunkunyika huvo vuntu vwakwe; niho vabaha va vatasi na Vafarisayo vakatuma vandima vamgure.
33Niho Yesu akati, “Heshele kakenda kadori nerena na unywi; niho nenetonga he ula enitumie. 34Munenienda neri temukanivone; hantu mi neho unywi temuidima kuza.” 35Niho Vayuda vakatiana, “Uu eneyoa hi uswi tusivone? Kana etatonga he mzariko wa Vagiriki na kuvacheja Vagiriki? 36Ni kiteto ani icho etetie, ‘Munenienda neri temukanivone; kangi, hantu mi neho unywi temuidima kuza?’”
Mpombe ya nkalamo
37Ingeri msi ula wa kukenjija, ula msi m’baha ewo m’bahisha, Yesu akaimuka akateta na wanga ekiti, “Mntu ekisikia nkiru, naze hangu anwe. 38Eniitikija mi, sa vuntu maandiko etetie, myeta ya mpombe yena moo inefuma heye.” 39Icho kiteto ekitetie he mburi ya Mpeho, eye vala vemwitikija venezamwinkwa; ambu Mpeho tekinazi, ni hala Yesu esekinakazwa. 40Niho vakumwe he luvungano vekinasikie ivyo viteto, vakati, “Cha kididi uu niye ula mroti.” 41Vakumwe vakati, “Uu niye Kristo.” Vangi vakati, “Hamao, Kristo efuma Galilaya? 42Iandiko telitetie iti, ‘Kristo efuma he lukolo lwakwe Davidi, na kufuma Betlehemu, ula muzi Davidi ekikaa?’” 43Niho heketa kughavanyika he luvungano vuntu vwakwe. 44Va kumwe vakaenda kumgura, mira tehena mntu emrongie mkono iti amgure.
45Niho vandima vakavaswia vabaha va vatasi na Vafarisayo. Navo vakavati, “Hanini mwekisamwete?” 46Vandima vakagharusha, “Narini tehena mntu anateta sa vuntu uu eteta.” 47Niho Vafarisayo vakavagharusha, “Hama na unywi mwaishika? 48He vabaha ni ani emwitikije, kana he Vafarisayo? 49Mira luvungano ava vesimanyije myomongwa vararwa.” 50Nikodemo akavati, (naye ni ula ekifikie hakwe kae, ambu ni mmwe wavo): 51“Hamao! myomo yetu imlaha mntu esinarongasikijwa na kumanya cho eketa?” 52Vakagharusha, vakati, “Hama! we nawe wefumie Galilaya? Enda unevona iti uko Galilaya tehefuma mroti.”
Mche egurirwe ekishinda
[ 53Vakaghotoka, mntu na kaa hakwe.
Currently Selected:
YOHANE 7: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
