LUKA 14
14
Mwenye safura ebanjiiwe msi wa sabato
1Aho ekinaingie he nyumba mwe ya mntu mmwe he vabaha va Vafarisayo msi wa sabato iti ale kijo, vakamrindija. 2Aho mozya heye hekina mntu ena vuwaji vwa safura. 3Yesu akagharusha, akavati varemanya myomongwa na Vafarisayo, “Hamao, ni chedi kubanja mntu msi wa sabato kana hai?” 4Vo vakahuja. Akamgura, akam’banja, akamwaghanya atonge. 5Akavati, “Ni ani ghati he unywi, kakicha ng’ombe yakwe kana njoe yakwe, yagwa he kisima, esikaikweje hala indi na ere msi wa sabato?” 6Navo teveidime kumgharusha kintu neri.
Kukuduisha na kuora
7Akavavwira vala verarikwe kisoma, aho ekinavone sa vuntu vesaghura vichumbi vya mozya, ekiti, 8“Wekirarikwa ni mntu he mlondolo, usiikae si he kichumbi cha mozya; usiche herarikwe mntu ena shima kukuvecha we, 9hakaza ula emurarike, we naye, na kukuti, ‘Mvokeje uu!’ Niho ukavoka kuhunduka na nyuma na masoni. 10Mira wekirarikwa, tonga ereikaa si hantu ha nyuma, nesa ula ekurarike ekiza akuti, ‘Mbwiaa, vecha na mozya;’ niho weneketa shima mozya ya vantu vose veikae si hamwe nawe. 11Ambu ye ekukweja, enesejwa; na ula ekuseja, enekwejwa.”
12Akamti ula emrarike, “Wekihareha kijo cha hemsi kana cha chahemagheri, usivaitange vambwie vako, neri vandughu vako, neri mbari yako, neri vala mwetujanye vena mari; nesa vasirekurarika nawe kikaoka mariho. 13Mira wekihareha mbao, vaitange vakiva, virema, veholoje na matuntu; 14nawe unela vwedi, ambu avo tevena cha kukuriha; mira unererihwa uko he kuvuka kwa vefwie kwa venye kitea.”
Mfwanano wa mbao mbaha
15Niho mmwe wa vala veikae si he kijo hamwe naye ekinasikie ivyo, akamti, “Mrela vwedi ni ula enela kijo he vufumwa vwa Mrungu.” 16Akamti, Mntu mmwe ekiharehe mbao mbaha, akararika vantu vajinki, 17akatuma mzoro wakwe saa ya kijo avavwire vala verarikwe, ‘Nzoni, ambu vyose vyakenja kuringanywa.’ 18Vakavoka vose mmwe mmwe kuenda misuire kwa madunganyo mamwe. Wa kuvoka akamti, ‘Nezorire mghunda, kinitara nitonge nireurereha; nikusemba unishighie.’ 19Ungi akati, ‘Nezorire ng’ombe jozi sano, nitonga kurajighesha; nikusemba inishighie.’ 20Ula ungi akati, ‘Naghuha mwai, nicho chegha nesiidima kuza.’ 21Ula mzoro akatonga, akamwukulila mzuri wakwe ivyo vintu. Niho ila mwenye nyumba akasikia oro, akamti mzoro wakwe, ‘Fuma fia, utonge he nzia mbaha na ndori ja hw muzi, urevaete vakiva, venye virema, matuntu na veholoje.’ 22Mzoro akamti, ‘Mfumwa, ivyo weniazere vyakenja kuharehika, mira hata iki herena hantu heshele.’ 23Mfumwa akamti ula mzoro, ‘Fuma na nze, utonge he barabara ba he mihaka, uvasingirije vaingie, nyumba yangu iizue. 24Ambu nimutio, He vala verarikwe, tehena neri mmwe enesagha mbao yangu.’”
Gharama ya kuoka mrateri
25Aho mavungano majinki vekiraterana naye, akagharuka akavati, 26“Kakicha mntu ekiza hangu, mira ekisamvihiwa vavee, na mlala wavo, na mche wakwe, na mwanawe, na vajinawe na varumburye, yee, hata naye mwenye, teidima kuoka mrateri wangu. 27Mntu wowose esitika msalaba wakwe na kuniratera, teidima kuoka mrateri wangu. 28Ambu ni ani he unywi, kakicha eenda kujenga mnara, esirongaikaa si na kutara gharama, iti ena ya kuukenjija? 29Asireherwa kuukenja anavoka msingi, vantu vose veuvona vakavoka kumsola, 30vekiti, ‘Mntu uu evokie kujenga esina nzinya ya kuukenja.’ 31Kana hena mfumwa ani, ekienda kutonga kuomana na mfumwa ungi, esirongaikaa si na kuchila, iti, ye na vantu viku ikumi, eneidima kuzana na ula enemzia na vantu viku makumi meri? 32Kakicha evona iti teidima, etuma mmondo ula mntu ereho hae, kuenda vyo vyeneete mporere. 33Nirehuvo, kila mmwe wenyu esishigha vyose ena navyo, teidima kuoka mrateri wangu. 34Munyu ni kintu chedi; mira kakicha munyu wakondika, ugerwa ni nesa ukoe? 35Teuve he isanga neri kwa m’buta; vantu veutagha noko nze. Ena masikio a kusikiia nasikie.”
Currently Selected:
LUKA 14: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
