LUKA 15
15
Igonji letekie
(Mat. 18:12-14)
1Niho vareghuha kodi vose na vabanu vakamzia iti vamsikije. 2Vafarisayo na vaandiki vakadughunyika, vekiti, “Mntu uu eghuhia vabanu, kangi ela navo.”
3Akavavwira mfwanano uu, ekiti, 4“Ni ani henyu ena magonji ighana, imwe lekimtekera, esikashighe ala makumi kenda na kenda sakeni, akaratera lila letekie mhaka ekilivona? 5Naye ekikenja kulivona, eliveka he vituro vyakwe ekiizihirwa. 6Ekifika kaa hakwe, eitanga vambwie vakwe na vala etujane navo, ekivati, ‘Izihirwani hamwe nami, ambu nakenja kuvona igonji langu lekitekie.’ 7Nimutio, nirehuvo heneketa kuizihirwa uko wanga vuntu vwa m’banu mmwe echwa mti, kuvecha vuntu vwa venye kitea makimi kenda na kenda chesivatara kuchwa mti.
Shilingi yetekie
8“Kana ni mche ani ena shilingi ikumi, ekitesha mwe, esiasha taa na kuhaghia nyumba, na kuendisha mhaka aivone? 9Ekikenja kuivona, eitanga vambwie vakwe na vala etujanye navo, ekivati, ‘Izihirwani hamwe nami, ambu navona ila shilingi yetekie.’ 10Nimutio, nirevwo vuntu heneketa kuizihirwa he malaika va Mrungu, vuntu vwa m’banu mmwe echwa mti.”
Mwana etekie
11Akati, “Mntu mmwe ekina vana veri; 12ula mdori akamti vavee, ‘Vava ninka ifungu la mari lenitera!’ Akavaghavia vintu vyakwe. 13Hesinavecha misi mingi, ula mwana mdori akavunganya vyose, akazoka isanga la hae; uko akakonda mari yakwe kwa kumelemeleta. 14Ekikenja kula vyose, he lila isanga hakaingia nzota mbaha, ye naye akavoka kuoka msovu. 15Akatonga, akakuguranya na mntu mmwe wa lila isanga; uo akamtonja he mghunda wakwe kurisha nguve. 16Akadomwadomwa ni mirangi, iti nanga ekuighusha na ala masesa eliwa ni nguve, neri tehena mntu emunkie kintu. 17Ekinaganye he ngoro yakwe, akati, ‘Vandima vakwe vava ni vangahi vela kijo na kuimija, nnami aha nifwa nza. 18Ninevuka nitonge hakwe vava wangu, nimti: Vava, nateshanya uko wanga na hewe; 19tekinifwenye kuitangwa mwanao kangi; unighoshe du sa mmwe wa vandima vako.’
20Akavuka akatonga he vavee. Ereho cha hae, vavee akamvona, akamsikiwa vwasi, akamsarira, akamshashata, akam’bwita mno. 21Ula mwana akamti, ‘Vava, neteshanye uko wanga na hewe; tekinifwenye kuitangwa mwanao kangi.’ 22Mira vavee akavati vazoro vakwe, ‘Eteni fia suke yedi mumdoke, kangi mumgere mpete he kichaa, na viratu he maghu; 23eteni na ndama ila yenorire muikome; na uswi tule na kuizihirwa; 24ambu uu mwana wangu ekifwie, iki avuka, ekitekie, iki avoneka.’” Vakavoka kubigha mng’aro.
25Ula mwana m’baha ekiho he mghunda, aho ekiza, ekifika hafuhi na kaa, akasikia maizii a nyimbo na kuvina. 26Akaitanga mzoro mmwe, akamvwija, ‘Haketa ni aho?’ 27Akati, ‘Mndughu wako aza, na vaveo akamkomia ndama yenorire, ambu amvona wa erewedi.’ 28Akasikia oro, akasua kuingia. Vavee akafuma, akamsembereka. 29Akamgharusha vavee, akati, ‘Rereha, ni miaka mingahi ii nanakutumikia, neri narini sinakonda iazero lako, mira mi tunaninka neri katangina niizihirwe na vambwie vangu; 30mira uu mwanao elie vintu vyako hamwe na vareshinda, ekinaze, ye wamkomia ndama yenorire.’ 31Akamti, ‘Mwanawa, we misi yose uho hamwe nami, na vyose nena navyo ni vyako. 32Kangi kitara kuizihirwa na kubigha mng’aro, ambu uu mndughu wako ekifwie, iki avuka; ekitekie, iki avoneka.’”
Currently Selected:
LUKA 15: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
