LUKA 8

Vache vekimpipirikia

1Ekikenaja akajunguluka he mizi na vumuzi, ekibirikira na kuamberija Mburi Yedi ya vufumwa vwa Mrungu; na vala ikumi na veri vekiho hamwe naye 2Na vache vasiku vekina mpepo mbivi na mawaji, vakabanjwa. Navo ni Maria Magdalena, efumiwe ni mpepo mfungate, 3ne Yoana mche wakwe Kuza mnjama wakwe Herode, ne Susana, na vangi vajinki, vekimpipirikia na mari javo.

Mfwanano wa mhandi

(Mat. 13:1-9; Mrk. 4:1-9)

4Luvungano lubaha lwekinazomane, na vala vefuma he kila muzi vekimzia, akateta kwa mifwanano, 5“Mhandi efumie kutonga kurahanda mbeu jakwe, naye aho ekijihanda, ja kumwe jikagwa hafuhi na nzia, jikavatwa na madeghe a wanga akajila. 6Jingi jikagwa he mrarabwe; jekivoka kueha jikaoma, kwa kusova mdusunya. 7Jingi jikagwa ghati he mivwa, na mivwa ikaehijanya najo, ikkajibandanya. 8Jingi jikagwa he msau wedi, jikaeha, jikagera ighana ighana.” Aho ekiteta ivyo, akavusha izii na wanga, ekiti, “Ye ena masikio a kusikiia, nasikie.”

Mhererejo wa mfwanano wa mhandi

(Mat. 13:10-23; Mrk. 4:10-20)

9Varateri vakwe vakamvwija, “Uo mfwanano, nikwo kuti ze?” 10Akati, “Unywi mweinkiwe kumanya mpiso ja vufumwa vwa Mrungu, mira vangi ni kwa mifwanano, nesa vekirereha vasivone, na vekisikia vasitwarije. 11Uo mfwanano nikwo kuti huvu: Mbeu ni kiteto cha Mrungu. 12Vala veho nzieni ni vala vesikie, vekikenja, Shetani akaza akavusha icho kiteto he ngoro javo, vasireitikija vakakia. 13Na vala veho he mrarabwe, ni vala vekisikia, veghuhia icho kiteto na kuizihirwa; navo vesina miji, veitikija ikenda idori, na igheri la kugheshwa, vesongera. 14Na jila jegwie he mivwa, ni vala vesikie, na he mitongire yavo vakabandanywa ni mabinuko a mari, na luizihiro lwa kimwiri, vasikuje kintu neri. 15Na jila ja he msau wedi, ni vala vesikia kiteto na ngoro jedi jerongeke, vakakigurisha; niho vakagera ntunda kwa kugumirija.

Ifundisho la taa

(Mrk. 4:21-25)

16“Tehena mntu easha taa, ekikenja akaifinikira na kintu, kana kuivika vwisini; mira eivika wanga he kivandiko, nesa vala veingia vavone kianga chayo. 17Ambu tehena kintu chevesike chesikarefunukurwa; neri chevisiwe chesikaremanyika na kufumirira boo. 18Rerehishani ra sa vuntu mwesikia; ambu ula ena kintu eneinkwa, na ula esina kintu, eneghumbwa hata kila edunganya iti ena.”

Vundughu vwa idi

(Mat. 12:46-50; Mrk. 3:31-35)

19Mlala wavo na vandughu vakwe valamswia, vasiidime kumfikia vuntu vwa luvungano. 20Akaukulilwa iyo mburi, akatiwa, “Mlala wenyu na vandughu vako veimuke uko nze, veenda kuvonana nawe.” 21Akavagharusha, akati, “Mlala wetu na vajinawa, ni ava vesikia kiteto cha Mrungu na kukironga vwo.”

Yesu ebohia nkungu

(Mat. 8:23-27; Mrk. 4:35-41)

22Msi mmwe he misi ila, akaingia he ngilawa, ye hamwe na varateri vakwe, akati, “Natukelanye sela ila yya bahari.” Vakakweja matanga. 23Aho vekitonga, akashinjia lughohe. Hakaza nkungu mbaha he bahari, ngilawa ikavoka kuizua mpombe, vakafikiwa ni mpwasi. 24Vakamswia, vakamvusha, vekiti, “Mfumwa, Mfumwa! YTuho he kutetka!” Akavuka, akabohia nkungu na mkushiko wa mpombe, vikahuja, hakahoa do. 25Akavati, “Mwitikijo wenyu uohi?” Vakafoleka, vakamaka, vekiteta vo venye na venye, “Ni ani uu, etetia nkungu na mpombe vimsikie?”

Kubanjwa Mgerasi ena mpepo

(Mat. 8:28-34; Mrk. 5:1-20)

26Vakafika mbaimbai ya isanga la Vagerasi, heyoyane na Galilaya. 27Aho ekisea he ngilawa, akazana na mntu mmwe wa ula muzi, ena mpepo; misi mingi tekidoka suke, neri teikaa kaa, esire uko he mbira. 28Ekinamvone Yesu, akalonza, akagwa si mozya heye, akateta na izii ibaha, ‘Nina ni nawe Yesu Mwana wa Mrungu eho uko wanga? Nikusemba, usinirishe vwasi.” 29Ni hala eazere ila mpepo mbivi ifume he ula mntu, ambu egurirwe niyo kantu kajinki, kangi ekirindwa he kichungo, echungiwe na minyororo na pingu, akachwa vila vichungo; nzinya ya ila mpepo ikamdindisha noko nyika. 30Yesu akamvwija, “Izina lako niwe ani?” Akamti, “Izina langu nimi Legioni;” ambu eingiwe ni mpepo nyingi. 31Jikamsemba iti asijiazere kufuma na kutonga uko he nkoma. 32Hekina ifio la nguve nyingi jekila he ntuvi; jikamsemba iti ajikundije jiingie hejo. Akajikundija. 33Mpepo jikafuma he ula mntu, jikaingia he nguve. Lila ifio likahurumuka he kijevu, likaingia he bahari, jikafwa kwa mpombe. 34Varisha vekivona icho cheketike, vakatonja ila mburi ikagisha he mizi na he mighunda. 35Vantu vakafuma, vakatonga kurarereha icho chevoneke, vakamswia Yesu, vakamvona ula mntu efumiwe ni mpepo eikae si he maghu akwe Yesu, edokie suke, ena na kucha; vakafoleka. 36Na vala vevivonie, vakavagaiya vuntu ula egurirwe ni mpepo ebanjijwe. 37Luvungano lwa vantu va isanga la Vagerasi leho mondo na mondo, vakamsemba iti avuke havo, ambu vagurwa ni kipea; niho akakwea he ngilawa, akahunduka. 38Ula mntu efumiwe ni mpepo akamsemba iti amkundije vatonjanye naye; mira ye akamwaghanya ekiti, 39“Hunduka na kaa hako, urebirikira he muzi wose, vila vibaha eketiwe ni Yesu.”

Mwana wa kibora wakwe Yairo evushwa he vefwie, kubanjwa kwa mche egavuka

(Mat. 9:18-26; Mrk. 5:21-43)

40Yesu ekinahunduke, luvungano lukamghuhia na kuizihirwa, ambu vose vekimwinda. 41Rereha, hakaza mntu mmwe eitangwa Yairo, naye ne m’baha wa sinagogi, akagwa he maghu akwe Yesu, akamsemba iti aingie he nyumba yakwe; 42ambu mwanawe wa kibora ere mmwe, ena miaka ikumi na miri, eho efwa. Na hala ekitonga, mavungano vakamsisima.

43Na mche mmwe ekigavukana hantu ha miaka ikumi na miri, [ekenjije mari yakwe yose he kuvainka vaghanga,] asivone mntu eidime kum’banja, 44akamzia nyuma, akakunta mlingo wa suke yakwe; hala indi kugavukana kwakwe kukahakana. 45Yesu akati, “Ni ani anikunta?” Vantu vose vekinakane, Petro hamwe na vala vena naye, akamti, “Mfumwa, ni ulu luvungano lwekujunguluke ne kukusisima.” 46Yesu akati, “Hena mntu enikuntie, ambu navona iti nzinya janifuma.” 47Ula mche akivona iti teidima kukuvisa, akaza ekizingiza, akagwa mozya hakwe, mozya he vantu vose, akamgaiya cheshighie ekimkunta, na sa vuntu ebanjijwe hala indi. 48Akamti, “We mwana wa kiche, mwitikijo wako wakukija; tonga na mporere.”

49Echeriteta huvo, hakaza mntu efuma he kaa ya ula m’baha wa sinagogi, akamti, “Mwama wako wa kibora akenja kufwa; usimrishe Mcheji vwasi.” 50Mira Yesu ekinasikie huvo, akamgharusha, “Usifoleke, itikija du, naye enebanjwa.” 51Ekinafike he ila nyumba tekundije mntu kuingia hamwe naye, esire Petro ne Yohane ne Yakobo, na vavee ula mwana na mlala wavo. 52Na vantu vose vekiia na kumwelila; akati “Musiie, uu mwana tefwie, eteshinjia lughohe du.” 53Vakamseka haiwa, ambu vemanyije iti akenja kufwa. 54Akamgura mkono, akateta na izii ibaha, ekiti, “We m’bora, vuka!” 55Muho wakwe ukamhundukia, akaimuka hala indi; akaazera ainkwe kijo. 56Vamoghi vakwe vakamaka haiwa, mira akavasuja iti vasiremvwire mntu icho cheketike.

Currently Selected:

LUKA 8: CHSUNT67

Highlight

Copy