MATAYO 17
17
Kukoranyika fwani
(Mrk. 9:2-13; Luk. 9:28-36)
1Hekivecha misi mtandatu, Yesu akavaghuha Petro ne Yakobo ne Yohane mjinawe; akatonga navo he ntuvi ndeza vo venye. 2Akakoranyika fwani yakwe mozya hevo, vusho vwakwe vukamekenisa sa izuva, na suke jakwe jikaoka nyewa chwe sa kianga. 3Niho Mose ne Elia vakavafumia, vakagaya naye. 4Petro akagharusha, akamti Yesu, “Mfumwa, ni chedi uswi kuikaa aha! Kakicha wekikunda, ninejenga aha vujumba vutatu, kako kamwe, na kakwe Mose kamwe, kamwe kakwe Elia.” 5Echeri teta, ijumbi ijewa likavagushija mvuri, na izii likafuma he lila ijumbi lekiti, “Uu ni Mwanangu mkunde wangu nemwizihirwe, msikijeni ye.” 6Vala varateri vekisikia huvo, vakagwa vakasoma vusho si, vakafoleka mno. 7Yesu akaza, akavakunta ekiti, “Vukani, musifoleke!” 8Vekivusha meso avo, tevevonie mntu ungi, esire Yesu mwenye.
9Vekisea he ntuvi, Yesu akavakokontia ekiti, “Musiremvwira mntu icho mwavonyeshwa, mhaka Mwana wa Mntu ekinevuka he vefwie.” 10Varateri vakwe vakamvwija vekiti, “Cheikee ze hala vaandiki veti, kimtara Elia arongeza?” 11Akagharusha, akavati, “Kididi Elia enerongaza, naye enehareha vyose. 12Mira nimutio, ‘Elia akenja kuza,’ vasimtwarije, mira vakamketia vyose sa vuntu veenda. Nirevwo vuntu Mwana wa Mntu naye etonga kurarishwa vwasi hevo” 13Niho varateri vakatwarija iti eteta navo mburi yakwe Yohane M’batizi.
Kubanjwa kwa m’bwange ena mpepo ya kisa
(Mrk. 9:14-29; Luk. 9:37-43)
14Vekinafikie luvungano, mntu mmwe akamzia, akamdunkutia ekiti, 15“Mfumwa, umvoneiye mwana wangu, ambu egwa kisa, na kula vwasi haiwa. Anagwa he moto na he mpombe kantu kajinki. 16Nikamwete he varateri vako, vasiidime kum’banja.” 17Yesu akagharusha, akati, “Unywi lukolo lwesina mwitikijo, lwehotoke; niikajanye na unywi mhaka rini? Nimugumirijije mhaka rini? Mweteni aha hemi.” 18Yesu akabohija ila mpepo, nayo ikafuma heye; ula m’bwange akabanda kuvokia saa ila ila. 19Niho varateri vakwe vakamswia mpiso, vakammti, “Hanini uswi twekisaidima kuifunya” 20Yesu akavati, “Ni vuntu vwa kuduikiwa mwitikijo kwenyu. Ambu, kididi nimutio, Mwekiketa mwitikijo weringane na ntembe ya haradali, munevwira ntuvi ii, ‘Vuka aha utonge na kula, nayo inevuka,’ neri tehekakete kintu chehera he unywi. [ 21Mira mbare ii teifuma, esire he kuomba na kukuima.”]
Yesu erota ka keri mburi ya kifwa chakwe
(Mrk. 9:30-32; Luk. 9:43-45)
22Navo aho veho uko Galilaya, Yesu akavati, “Mwana wa Mntu etonga kurainkijwa he mikono ya vantu; 23navo venemkoma, mira msi wa katatu enevuka he vefwie.” Vakasononoya mno.
Eiha kodi ya Hekalu
24Vekinafike Kapernaumu varesanga nusu shekeli vakamswia Petro, vakati, “Mcheji wenyu ye teinkija nusu shekeli?” 25Akati, “Einkija.” Ekiingia he nyumba Yesu akarongamvwija, ekiti, “Simoni, we utize? Vafumwa va isanga veghuha kodi kana msango he vantu vahi, he vana vavo kana he vagheni?” 26Niho Petro akamti, “Kakicha ni huvo, vana tekivatara. 27Mira, nesa tusivavihije, tonga he bahari ugere ndoana, iyo samaki yeneronga kwea uighuhe; wekiiasamija momo wayo unevona shekeli; uighuhe, uvainke hantu hangu na hako.”
Currently Selected:
MATAYO 17: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
