MATAYO 18
18
Kuchejwa kukuduisha
(Mrk. 9:33-37; Luk. 9:46-48)
1He saa ila, varateri vakamswia Yesu vekiti, “He vufumwa vwa uko wanga, m’baha ni uhi?” 2Akaitanga kajana akakavika ghati hevo, 3akavati, “Kididi nimutio, Mwekisagharuka mukaoka sa vujana, temukaingie neri he vufumwa vwa uko wanga. 4Heicho, ula ekuduisha ye mwenye sa aka kajana, niye m’baha he vufumwa vwa uko wanga. 5Na ula eghuhia kajana kamwe sa aka vuntu vwa izina langu, nimi anighuhia.”
Irunge la ibigho la kuhosha vangi
(Mrk. 9:42-48; Luk. 17:1-2)
6“Mira ula emhosha mmwe wa ava vadori veniitikije, chemvaie achungwe loa lubaha he singo, na kunyirishwa he bahari hantu heseishe. 7Vwasi vwa si ii he vuntu vwa vintu vyehosha; ambu vintu vyehosha tevikashighe kuza, mira vwasi vwa ula eneete kintu chehosha. 8Kakicha mkono wako kana kughu kwako kwekikuhosha, kuchwe ukutaghe noko hae; ambu ni keba kuingia he nkalamo wesovekiwe ni mkono kana kughu, kukela wena mikono miri kana maghu meri wekitaghwa he moto wa kae. 9Na kakicha iziso lako lekikuhosha, ling’ole, ulitaghe noko hae; ambu ni keba kuingia he nkalamo na iziso imwe, kukela wena meso meri wekitaghwa he gehena.”
10“Rerehani, musibere mmwe wa ava vadori; ambu nimutio, Vamalaika vavo uko wanga misi yose verereha vusho vwa Vava wangu eho uko wanga. 11Ambu Mwana wa Mntu ezie kukania kila chekitekie.”
Mfwanano wa igonji letekie
(Luk. 15:3-7)
12“Mutize? Mntu ena magonji ighana, imwe lekiteka tekashighe ala makumi kenda na kenda, akatonga he ntuvi kuraenda lila letekie? 13Na ekinalivona, kididi nimutio, Eizihirwa vuntu vwalo kukela ala makumi kenda na kenda esitekie. 14Nirehuvo, tekiiziha he Vava wenyu wa uko wanga iti mmwe wa ava vadori ateke.
Chetara kuvaketia vabanu
(Luk. 17:3)
15Na mndughu wako ekiteshanya hewe, tonga umchunde we naye mweho venye; ekikusikia, wamvona mndughu wako. 16Kakicha takusikia, tikawa mntu mmwe kana veri hamwe nawe, nesa kila kiteto kikoloke kwa kutetiwa vuonwa ni vantu veri kana vatatu. 17Ekisavasikia avo, vwira luvungano, na ekisasikia hata luvungano, naoke hewe sa mwiisanga na mreghuha kodi. 18Kididi nimutio, Chose mwenechunga aha he masanga, hata uko wanga kinerachungwa; na chose mwenechungua aha he masanga, na uko wanga kinerachunguwa.
Kuomba kwa vumwe
19“Kangi nimuvwira kuti, veri he unywi vekiaghana aha he masanga he kintu chochose vekiomba, venekiketiwa ni Vava wangu wa uko wanga. 20Ambu hantu veri kana vatatu vevungane vuntu vwa izina langu, nami nirewaho ghati hevo.
Kiringanyo cha kushighia na mfwanano wa mzoro mvivi
(Luk. 17:4)
21Niho Petro akamswia, akamti, “Mndughu wangu ekiniteshanyija, ninemshighia kantu kangahi? mhaka kantu kafungate.” 22Yesu akamti, “Sikuvwira iti ni kantu kafungate, mira mfungate ka makumi mfungate. 23He vuntu uvwo, vufumwa vwa uko wanga vwefwanane na mfumwa eendie kuringanya itiro na vazoro vakwe. 24Aho ekivoka kutara, akaetiwe mntu mmwe eavwa talanta viku ikumi. 25Ekinasove cha kuiha, mzuri wakwe akaazera iti ataghwe ye na mche na vana vakwe na vyose ena navyo, nesa rando iihwe. 26Niho ula mzoro akagwa hala si, akamdunkutia, ekiti, ‘Mfumwa, nisikija ambu ninerakuiha vyose.’ 27Mzuri wa ula mzoro akamwondia, akamchungua, akamshighia ila rando. 28Ula mzoro akafuma, akamvona mghenji emwava dinari ighana, akamgura akamdoma, akamti, ‘Niiha ila rando!’ 29Niho ula mzoro mghenji akagwa he maghu akwe, akamsemba ekiti, ‘Nisikija ambu ninekuiha vyose.’ 30Mira ye asikunde, akamtika akamgera he kichungo mhaka ekineiha ila rando. 31Niho vazoro vaghenji vekivona vila vyeketike, vakawajwa mno; vakatonga he mzuri wavo, vakamvwirira vyose vyeketike. 32Niho mzuri wakwe akamwitanga, akamti, ‘We mzoro mvivi, nekushighie we ila rando yose, ukananisembe; 33hama we techekuvaie kumwondia mzoro mghenji, sa vuntu mi nakuondia we?’ 34Mzuri wakwe akakwewa ni oro, akamwinkija ha varerisha vwasi, mhaka ekineiha ila rando yose. 35Nirevwo vuntu Vava wangu wa uko wanga enemuketia unywi, mwekisashighiana kwa ngoro, kila mntu na mndughu wakwe.”
Currently Selected:
MATAYO 18: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
