MATAYO 21

Yesu eingia Yerusalemu kwa ngazo

(Mrk. 11:1-11; Luk. 19:28-40; Yoh. 12:12-19)

1Igheri vekinazengelele Yerusalemu, vekifika Betfage he ntuvi ya Mizeituni, niho Yesu akatuma varateri veri, ekivati, 2“Tongani he kala kamuzi keho mozya yenyu, munevona njoe yechungiwe yena na ndama, muichungue, munietie. 3Kakicha mntu ekimuvwira kintu, munti, ‘Ni Mfumwa ejienda;’ naye hala indi enejiinkija.” 4Ivyo vyose vyeokie huvo, nesa kila chetetiwe ni mroti kifumane vuntu etie,

5Mvwire m’bora Sayuni

Rereha, mfumwa wako eza na hako,

Ni mhoo, naye evekiwe ni njoe yena na ndama, mwana wa njoe.

6Vala varateri vakatonga, vakaketa sa vuntu Yesu evavwirire, 7vakaete ila njoe na ndama yayo, vakatandisha suke javo wanga hejo, akaikaa wanga heyo. 8Vantu vajinki he lula luvungano vakatandisha suke javo nzieni, kumwe vakatema mahungo a miti vakaasasaja nzieni. 9Na mavungano erongore na vala vezie nyuma, vakalonza vekiti, “Hosiana, Mwana Davidi; mwenye lutelwedi ni ula eza he izina la Mfumwa: Hosiana uko wanga!” 10Ekiingia Yerusalemu muzi wose ukanyavurika, vakati, “Ni ani uu?” 11Mavungano vakati, “Uu ni Yesu ula mroti wa Nazareti ya Galilaya.”

Ezerija nyumba ya mtaso

(Mrk. 11:15-19; Luk. 19:45-48; Yoh. 2:13-22)

12Yesu akaingia he nyumba ya mtaso, akavakinya vala vose vekizorania he nyumba ya mtaso, akakubunua meza ja vala vekikoranya fedha, na vichumbi vya vala vekitaghija nziva. 13Akavati, cheandikwe, “Nyumba yangu ineitangwa, ‘Nyumba ya kuombia,’ mira unywi mwaighosha mpanga ya vareghumba.” 14Matuntu na veholoje vakamswia na hala he nyumba ya mtaso, akavabanja. 15Vabaha va vatasi na vaandiki, vekivona ivyo virumo evirongie, na vana vekilonza he nyumba ya mtaso, vekiti, “Hosiana, Mwana Davidi!” vakasikia oro, 16vakamti, “Weresikia sa vuntu avo veti?” Yesu akavati, “Yee, temusomie: Kwa miomo ya vana vadori na vala veamwa yakolosha ngazo?” 17Akavashigha, akafuma he ula muzi, akatonga Betania, akashinjia uko.

Mkuu wesigerire

(Mrk. 11:12-14, 20-26)

18Aha heyavo ekihunduka na he muzi, akasikia nza, 19Akavona mkuu mmwe mbaimbai he nzia, akauswia, asivone kintu hewo esire mahungo du; akauti, “Too yoo narini, hasirevoneka ntunda hewe!” Hala indi ula mkuu ukaoma. 20Varateri vakwe vekivona huvo vakamaka, vakati, “Uu mkuu waoma ze hala indi?” 21Yesu akagharusha, akavati, “Kididi nimutio, Mwekiketa mwitikijo, mwesina matatanyi, muneketa si icho cha mkuu du, mira hata mwekivwira ntuvi ii, ‘Ng’oleka aha uretaghwa uko he bahari,’ kioneka. 22Na vyose mweenda, mwekiomba mweitikije, munevona.”

Nzinya yakwe Yesu ivwijwa

(Mrk. 11:27-33; Luk. 20:1-8)

23Ekinaingie he nyumba ya mtaso, vabaha va vatasi na vaghosi va vantu vakamswia ekicheja, vakamti, “Ivyo weronga, uvironga na nzinya ani, kangi niani ekunkie iyo nzinya?” 24Yesu akagharusha, akavati, “Nami nienda kumuvwija kiteto kimwe, mwekinanigharusha, nami ninemuvwira iti ni nzinya ani neronga nayo ivyo. 25M’batizo wakwe Yohane, wefumie hi, wefumie uko wanga kana ni he vantu?” Vakavwijana vo venye kwa venye, vekiti, “Twekiti wefumie uko wanga, enetuti, ‘Hanini mwekisamwitikija?’ 26Kangi twekiti wefumie he vantu, tufoleka luvungano, ambu vantu vose vevona iti Yohane ni mroti.” 27Vakamgharusha Yesu, vakamti, “Tetumanyije.” Naye akavati, “Nami ra sikamuvwire iti ni nzinya ani neronga nayo ivyo.”

Mfwanano wa vabwange veri

28“Mirao, mutize? Hekina mntu mmwe ena vana veri va kibwange, akatonga he ula wa kuvoka, akati, ‘Mwanangu, yoo tonga ureronga ndima he mghunda wa mizabibu!” 29Akagharusha, akati, ‘Haimi!’ Uko nyuma akachwa mti, akatonga. 30Akatonga he ula ungi wa keri, akaremvwira huvo, naye akagharusha, akati, ‘Yee vava!’ mira asitonge. 31He avo veri, erongie kila vavee ekundie ni uhi?” Vakamti, “Ni ula wa kuvoka.” Yesu akavati, “Vareghuha kodi na vareshinda, venemurongorira kuingia he vufumwa vwa Mrungu. 32Ambu Yohane ezie henyu kwa nzia ya singisirya, na unywi musimwitikije, mira vareghuha kodi na vareshinda vakamwitikija. Na unywi mkinavone huvo, temuchwie mti na kuitikija.”

Mfwanano wa mghunda wa mizabibu

(Mrk. 12:1-12; Luk. 20:9-19)

33“Sikijani wa mfwanano ungi. Hekina mntu mwenye kaa ehandie mghunda wa mizabibu, akaujungulushija lusarigho, akafora hantu ha kukamia zabibu ndeni hewo, akajenga idungu, akavika vaimi, akavuka akazoka. 34Igheri la ntunda lekinazengelele, akatuma vazoro vakwe he vala vaimi, iti vainkwe ntunda jayo. 35Vala vaimi vakagura vala vazoro vakwe, mmwe vakam’bigha, ungi vakamkoma, na ungi vakam’bigha na mabwe. 36Akatuma wa vazoro vangi vajinki kukela vala va kuvoka, vakarevaketa huvo huvo. 37Chakenjija akamtuma mwana wakwe hevo, ekiti, ‘Mwana wangu venemshimia.’ 38Mira vala vaimi vekimvona ula mwanawe, vakatiana, ‘Uu niye mpali, herikoni tumkome, vupali vwakwe vuoke vwetu.’ 39Vakamgura, vakamtagha na nze ya ula mghunda wa mizabibu, vakamkoma. 40Ana, ula mwenye mghunda wa mizabibu ekineza, enevaketa ze vala vaimi?” 41Vakamti, “Avo vavivi venekomwa kikomire kivivi, na kuvika vaimi vangi he mghunda wakwe, evo venemunka ntunda igheri lajo lekifika.” 42Yesu akavati, “Temunasoma he maandiko,

Ibwe ledaiwe ni vajengi,

Ilo laoka ibwe ibaha la he pembe.

Kiteto iki chefumie he Mfumwa,

Nacho ni kimako he meso etu?’ 43Heicho nimutio, Vufumwa vwa Mrungu vunevushwa henyu, vuinkwe mbari ingi yegera ntunda javwo. 44Na ula enegwia ilo ibwe, enebeka beka, na ula lenemgwia linemshagha tiki.” 45Vabaha va vatasi na Vafarisayo vekisikia ii mifwanano yakwe, vakamanya iti nivo evateta. 46Navo vekienda mimgurire, vakafoleka vantu, ambu vevonie iti ni mroti.

Currently Selected:

MATAYO 21: CHSUNT67

Highlight

Copy