MATAYO 22
22
Mfwanano wa ngasu ya mlondolo
1Yesu akagharusha, akavavwira kangi kwa mifwanano, ekiti, 2“Vufumwa vwa uko wanga vwefwanane na mfumwa emharehie mwanawe mlondolo. 3Akatuma vazoro vakwe kuraitanga vala verarikwe he mlondolo; navo vakasua kuza. 4Akatuma wa vazoro vangi ekiti, ‘Vavwireni vala verarikwe, Rereha, nahareha mbao yangu, nzao jangu na vila vyenorire vyakenja kukomwa, vyose vyaharehwa; nzoni ra he mlondolo.’ 5Mira vo vasighoshe iti ni kintu, vakakutongira, mmwe mghunda wakwe, ungi he zora jakwe. 6Na vala veshele vakagura vazoro vakwe vakavaketia tiri, na kuvakoma. 7Ula mfumwa akakwewa ni oro mbaha, akatuma nkondo ikabaja vala varekoma na kushota muzi wavo. 8Ekikenja, akavati vala vazoro vakwe, ‘Mlondolo waringanana, mira vala verarikwe tawavatara. 9Heicho tongani he nzia mbaha ja matano, na vose mwenevavona, muvaitange vaze he mlondolo. 10Vala vazoro vakafuma, vakatonga uko he nzia mbaha, vakavunganya vala vevavonie vose, vavivi na vedi; nyumba ikaizua vagheni. 11Mira ula mfumwa ekiingia kuvarereha vagheni vakwe, akavona mntu mmwe esidokie suke ya mlondolo. 12Akamti, ‘Mbwiaa! weingie ze aha wesidokie suke ya mlondolo?’ Naye akasova chateta. 13Niho mfumwa akavati vabwange vakwe, ‘Mchungeni maghu na mikono, mtikeni mremtagha he kija cha uko nze, niho heneketa kuwela na kukereresa majegho.’ 14Ambu veitangwe ni vajinki, mira vesaghurwe ni vaghere.”
Ivwijo la kodi
(Mrk. 12:13-17; Luk. 20:20-26)
15Niho Vafarisayo vakatonga vakateta njama sa vuntu venemtegha kwa viteto. 16Vakamtumia varateri vavo vena na vantu vakwe Herode, vakati, “Mcheji, twemanyije iti we u mntu wa idi, na nzia ya Mrungu uicheja he idi, tufoleka vubaha vwa mntu neri mmwe, ambu turereha vituho vya vantu. 17Tuvwire ki iti, We uvona ze, Ni chedi kumunka Kaisari kodi kanaze?” 18Mira Yesu akamanya vuvivi vwavo, akati, “Hanini mwenighesha unywi valung’ong’o? 19Nivonyani fedha ya kodi.” Navo vakamwetie dinari. 20Akavati, “Ii sanamu ni yakweni, na aa maandiko?” 21Vakamti, “Ni vyakwe Kaisari.” Niho akavati, “Munkeni Kaisari vila e vyakwe Kaisari, na Mrungu vila e vyakwe Mrungu.” 22Vekisikia huvo, vakamaka, vakamshigha, vakatonga.
Ivwijo la kuvuka he vefwie
(Mrk. 12:18-27; Luk. 20:27-40)
23Msi ula ula Vasadukayo, evo veti tehena kuvuka kwa vefwie, vakamswia, vakamvwija, 24vekiti, “Mcheji, Mose etie, Mntu ekifwa naye esishighie vana, mjinawe ampale mche wakwe, nesa amketie mjinawe mbari. 25Hetu hekina vandughu mfungate vemoghanywa. Ula wa kuvoka akaghuha mche, akafwa; kila esina vana akamshighia mjinawe mche. 26Nirehuvo na ula wa keri na wa katatu mhaka vose mfungate. 27He msirikijo wa vose ula mche naye akafwa. 28Ana uko he kuvuka kwa vefwie, eneoka mche wakweni he avo mfungate? Ambu vose vekina naye.” 29Yesu akagharusha, akavati, “Mwetekwa, ambu temumanyije maandiko neri nzinya ya Mrungu. 30Ambu he kuvuka kwa vefwie, teveghuha neri teveghuhwa, mira veoka sa vamalaika va uko wanga. 31Kana mburi ya kuvuka kwa vefwie, temunasoma kila mwevwirirwe ni Mrungu, ekiti, 32‘Mi nimi Mrungu wakwe Abrahamu, na Mrungu wakwe Isaki, na Mrungu wakwe Yakobo? Mrungu si Mrungu wa vefwie, mira ni Mrungu wa veho moo.” 33Mavungano vekisikia huvo, vakakugha michejire yakwe.
Ivwijo la iamoro ibaha
(Mrk. 12:28-34)
34Vafarisayo vekisikia iti avajiva vala Vasadukayo momo, vakavungana hamwe, 35mmwe wavo e mremanya myomongwa, akamvwija kwa kumghesha, ekiti, 36“Mcheji, iamoro ibaha he myomongwa ni lihi?” 37Akamti, ‘Mkunde Mfumwa Mrungu wako kwa moo wako wose, na kwa ngoro yako yose, na kwa kucha kwako kwose.’ 38Ilo nilo iamoro ibaha kangi e la kuvoka. 39Na la keri lefwanane nalo ni ili, ‘Mkunde mghenji wako sa vuntu wekukundie we mwenye.’ 40He ao maamoro meri, niho hantu myomongwa yose na varoti vyechumbaghie.”
Ivwijo he Kristo
(Mrk. 12:35-37; Luk. 20:41-44)
41Na Vafarisayo vekinavungane, Yesu akavavwija, 42ekiti, “Muti ze mburi yakwe Kristo, ni mwanaani?” Vakamti, “Ni mwana Davidi.” 43Akavavwija, “Hama cheikee ze, kila Davidi he kimpeho emwitanga Mfumwa, ekiti,
44‘MFUMWA emvwirire Mfumwa wangu:
Ikaa mkono wangu wa kume,
Mhaka nivike vanzo vako, kijusi he maghu ako?’ 45Iki, aho Davidi emwitanga Mfumwa, eokaze wa mwanawe?” 46Tehena mntu eidime kumgharusha kintu; kurafuma uo msi, tehena mntu eidime kumvwija kintu kangi.
Currently Selected:
MATAYO 22: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
