MATAYO 24
24
Yesu erota kukondika kwa nyumba ya mtaso na mkengelejo wa si ii
(Mrk. 13:1-27; Luk. 21:5-28)
1Yesu akafuma he nyumba ya mtaso, akatonga; varateri vakamswia, nesa vamvonyeshe majengo a nyumba ya mtaso. 2Naye akagharusha, akavati, “Temuvona ivi vyose? Kididi nimutio, Aha tehekashighwe ibwe wanga he ibwe, lesikagomowe.”
3Aho eikae si he ntuvi ya Mizeituni, varateri vakwe vakamswia mpiso, vekiti, “Tuvwire ki iti ivyo vineoka rini, na luvengo lwa kuza kwako, na lwa mkengelejo wa masanga nini?” 4Yesu akagharusha, akavati, “Rerehani, mntu asimuishe. 5Ambu vajinki veneza he izina langu, vekiti, ‘Nimi Kristo;’ navo veneisha vajinki. 6Na unywi munesikia mburi ja nkondo na mbike ja nkondo; rerehani, musiitushwe; ambu ivyo vyose nire sari vize; mira uo mkengelejo teunate. 7Ambu mbari na mbari jineomana, vufumwa na vufumwa vuneomana; heneketa nzota na vididimo uko na uko. 8Ivyo vyose ni kivokio cha mavwasi. 9Ilo igheri venemuinkija murishwe vwasi na kukomwa; na unywi muneoka vantu va kushinwa ni vaisanga vose vuntu vwa izina langu. 10Niho vajinki venekuhosha, veneliana marenge na kudaana. 11Henevuka varoti vajinki va mongo, veneisha vajinki. 12He vuntu vwa kuzika kwa lubero, lukundo lwa vajinki lunehoa. 13Mira ula enegumirija mhaka msio niye enekia. 14Kangi Mburi Yedi ya vufumwa inebirikirwa he si jose, ioke vuonwa he vaisanga vose; aho niho ula mkengelejo weneza.
15“Aho mwekinevona kila kivihijo cha kukonda, kila chetetiwe ni mroti Danieli cheimuke hala hantu hezerire (ula esoma natwarije), 16aho vala veho Yudea vaahe na he ntuvi; 17na ula eho wanga he nyumba asisee kyuraghuha vintu vyeho nyumba hakwe, 18neeri ula eho he mghunda asihunduke kaa kuraghuha suke yakwe. 19Vwasi vwa vala vena ndeni na veamwisha he iyo misi. 20Mira ombani nesa kuaha kwenyu kusizane na igheri la kiho kana msi wa sabato. 21Ambu ilo igheri heneketa mavwasi mabaha esinavoneka too kuvoka kwa masanga mhaka iki, neri esikarevoneka huvo narini. 22Nanga iyo misi yesekitaduishwa, hesekina ye ekikia; mira he vuntu vwa vala vesaghurwe, iyo misi ineduishwa. 23Ilo igheri mntu ekimuti, ‘Rereha, Kristo ewaha,’ kana, ‘Eho kula,’ musiitikije. 24Ambu heneketa Makristo a mongo na varoti va mongo, navo veneketa maluvengo mabaha na vimako, nesa vavateshe hata vala vesaghurwe kakicha kiidimika. 25Rereha, narongora kumuvwira. 26Heicho vekinemuti, ‘Eho uko nyika,’ musifume, kana, ‘Eho nyumba,’ musiitikije. 27Ambu sa vuntu kiimiko chefuma kibuka izuva, kikavoneka mhaka kigwa izuva, huvo nivwo vuntu kuza kwa Mwana wa Mntu kweneoka. 28Ambu hantu hena kimba, niho hantu mitonyi yenevungana.
29“Mira hala indi nyumba ya mavwasi a misi ila, izuva linegerwa kija, na mweji teukafunye kianga chawo, ntondo uko wanga jinegwa, na nzinya ja uko wanga jinekushika. 30Niho luvengo lwa Mwana wa Mntu lwenevoneka uko wanga; niho mbari jose ja masanga jenewela; navo venemvona Mwana wa Mntu ekiza wanga he majumbi a uko wanga, ena na nzinya na ngazo mbaha. 31Naye enetuma vamalaika vakwe na izii ibaha la lugunda; navo venevavunganya vala vakwe vesaghurwe, kufuma myondo mine ya nkungu, kuvokia hantu wanga yehakane mondo uu mhaka hantu yehakane mondo ungi.
Kukucheia
(Mrk. 13:28-37; Luk. 21:29-36; 17:26-30)
32“Heicho kuchejeni mwekifwanyanyija he mkuu, matambi awo ekinavunga na kushosha, mumanya kuti vuri yazengelela. 33Na unywi nirehuvo, mwekivona ivyo vyose, manyani kuti azengelela mpengeni. 34Kididi nimutio, Lukolo ulu telukaveche ivi vyose vyesinakoloka. 35Wanga na si vinevecha, mira viteto vyangu tevikaveche narini.
36“Mira mburi ya msi ula na saa ila, tehena eimanya, neri vamalaika veho uko wanga, neri Mwana, esire Vava mwenye. 37Ambu sa vuntu chekiikee he ila misi yakwe Noa, nirevwo vuntu cheneoka hata he kuza kwa Mwana wa Mntu. 38Ambu sa vuntu chekiikee he ila misi yerongorire mghubiko wa mpombe, vantu vekila na kunwa, vekilondola na kulondolwa, mhaka ula msi Noa ekiingia he safina, 39vasitwarije, mhaka mghubiko wa mpombe ukaza ukakenja vyose; nirevwo vuntu cheneoka he kuza kwa Mwana wa Mntu. 40Ilo igheri vantu veri veho he mghunda, mmwe eneghuhwa, ungi eneshighwa. 41Vache veri veshagha, mmwe eneghuhwa, ungi eneshighwa.
42“Yaeni ra kiavi, ambu temumanyije iti ni msi uhi Mfumwa wenyu eneza. 43Mira manyeni icho kuti, Nanga mwenye nyumba ekimanya lila igheri mkea enezia, ekiyaa kiavi, neri esekishigha nyumba yakwe ibawe. 44Heicho na unywi, kuringanyeni ra, ambu Mwana wa Mntu eneza he saa mwesiiarire.”
Mfwanano wa mzoro wedi na mvivi
(Luk. 12:42-46)
45“Niani ra mzoro mkitengo, echee, eye mzuri emvikie he kaa yakwe, iti aghavie vazoro vaghenji kijo igheri letara? 46Mrela vwedi ni mzoro ula eye mzuri wakwe ekiza enemkicha ekiraketa huvo. 47Kididi nimutio, Enemghosha m’baha wa vintu vyakwe vyose. 48Mira mzoro ula mvivi ekidunganya he ngoro iti, ‘Mzuri wangu aikaisha,’ 49akavoka kubigha vaghenji vakwe, na kula na kunwa hamwe na vaghenji; 50mzuri wa uo mzoro eneza msi esiarire na igheri esimanyije, 51enemtema vihindi viri, na kumsankanya na valung’ong’o. Niho heneketa kuwela na kukereresa majegho.”
Currently Selected:
MATAYO 24: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
