MATAYO 25
25
Mfwanano wa vabora ikumi
1“Niho vufumwa vwa uko wanga vwenefwanana na vabora ikumi, veghuhie taa javo, vakatonga kuramzana mwenye mlondolo. 2Vasano hevo vekirundie, na vasano vechee. 3Vala vekirundie vetikie taa javo, vesijitikie na mafuta hantu hamwe najo; 4mira vala vechee vetikie mafuta he ntanu javo hamwe na taa javo. 5Igheri mwenye mlondolo ekineikaishe, vose vakachunda, vakashinjia lughohe. 6Mira uko kio ghati hakaketa kilonzo, ‘Mwenye mlondolo! Fumani mutonge kuramzana!’ 7Hala indi vala vabora vose vakavuka, vakahareha taa javo. 8Vala verundie vakavati vala vechee, ‘Tughavieni vufuta he ao enyu, ambu taa jetu jijimika.’ 9Mira vala vechee vakagharusha, vekiti, ‘Hai, teekakoloke he uswi na unywi; keba mutonge he vala vataghija muzore enyu.’ 10Navo aho vekitonga kurazora, mwenye mlondolo akaza, na vala vekuringanye vakaingia naye he mlondolo, lughwi lukafingwa. 11Uko nyuma vala vabora vangi navo vakaza, vakati, ‘Mfumwa, Mfumwa, tujuvuie!’ 12Akagharusha, akati, Kididi nimutio, Simumanyije unywi.’ 13Heicho yaeni kiavi, ambu temumanyije igheri neri saa.
Mfwanano wa talanta
14“Ambu cheikee sa mntu eenda kuzoka, eitange vazoro vakwe akavika mari yakwe hevo; 15mmwe akamunka talanta sano, ungi akamunka mbiri, na ungi akamunka mwe; kila mntu na kiringanyo cha miidimire yakwe; akazoka. 16Hala indi ula einkiwe talanta sano, akatonga akasusurija najo, akamaza talanta jingi sano. 17Nirehuvo, na ula einkiwe mbiri akashuma akamaza jingi mbiri. 18Mira ula einkiwe mwe, akatonga akafora si, akavisa ho fedha ya mzuri wakwe. 19Hekivecha misi mingi, mzuri wa vala vazoro akaza, akaenda itaro hevo. 20Hakaza ula einnkiwe talanta sano, ekiti, ‘Mfumwa, wevikie hemi talanta sano, rereha, namaza najo talanta jingi sano.’ 21Mzuri wakwe akamti, ‘Ni chedi, u mzoro wedi na mkitengo; werindie kitengo he vighere, ninekughosha m’baha he vijinki: ingia he kuizihirwa kwa mzuri wako.’ 22Ula einkiwe talanta mbiri naye akaza, akati, ‘Mfumwa, wevikie hemi talanta mbiri, rereha namaza najo talanta jingi mbiri.’ 23Mzuri wakwe akamti, ‘ni chedi, u mzoro wedi na mkitengo; werindie kitengo he vighere, ninekughosha m’baha he vijinki; ingia he kuizihirwa kwa mzuri wako.’ 24Na ula einkiwe talanta mwe naye akaza, akati, ‘Mfumwa, nemanyije iti we u mntu mtungulu, ufindika wesihandie, uvunganya wesisasaje; 25heicho nikafoleka, nikatonga nikavisa talanta yako he msau, rereha, kila e chako haiki.’ 26Mzuri wakwe akagharusha, akamti, ‘We mzoro mvivi na mdai wekimanyije iti nifindika nesihandie, nivunganya nesisasaje? 27Chekikutara kuvika fedha yangu he vala veinkija na mnesha, nami nekiza nekivona ila yangu na mnesha wayo. 28Heicho, mghumbeni iyo talanta, munkeni ula ena jila kumi. 29Ambu ula ena kintu, eneinkwa na kuongejijwa fwa; mira ula esina kintu, hata kila ena eneghumbwa. 30Na mzoro ula esive, mtagheni noko hae he kija uko nze, niho heneketa kuwela na kukereresa majegho.’
Msi wa mlaho
31“Aho Mwana wa Mntu ekineza na ngazo yakwe, hamwe na vamalaika vezerire vose, niho eneikaa he kichumbi cha ngazo yakwe; 32na vaisanga vose venevungana mozya heye; naye enevatanya sa vuntu mrisha etanya magonji na mbuji. 33Magonji eneavika mkono wakwe wa kume, na mbuji mkono wakwe wa kumoso. 34Uko nyuma mfumwa enevavwira vala veho mkono wakwe wa kume, ‘Nzoni unywi mweinkiwe lutelwedi ni Vava wangu, palani vufumwa mwevikiiwe too masanga ekirumbwa! 35Ambu nesikie nza mukaninka chala; nesikie nkiri, mukaninka chanwa; neki mgheni, mukanighuhia; 36nekiho kituhu, mukanivusha; ne muwaji mukaza kuniyoa; nekiho he kichungo, mukanikusha.’ 37Niho vala venye singirisya venemgharusha, vekiti, ‘Mfumwa, ni rini twekuvonie wesikie nza tukakuora, kana wesikie nkiru tukakunka chanwa? 38Kangi ni rini twekuvonie we mgheni, tukakughuhia, kana weho kituhu tukakuvusha? 39Kangi ni rini twekuvonie we muwaji kana weho kichungo tukakukusha?’ 40Na mfumwa enegharusha, ekivati, ‘Kididi nimutio, Sa vuntu mwemketiie mmwe wa vala vandughu vangu vadori, nimi mweniketiie.’ 41Kangi enevavwira vala veho mkono wakwe wa kumoso, ‘Vukani aha hangu, unywi mwetufiwe, mutonge noko he moto wa kae na kae, wemringanyijiwe Shetani na vamalaika vakwe! 42Ambu nesikie nza, musininke chala; nesikie nkiru, musininke chanwa; 43neki mgheni, musinighuhie; nekiho kituhu, musinivushe; ne muwaji kangi neho he kichungo, musize kuniyoa.’ 44Niho avo navo venegharusha, vekiti, ‘Mfumwa, ni rini twekuvonie wesikie nza, kana nkiru, kana we mgheni, kana weho kituhu, kana we muwaji, kana weho he kichungo, tusikupipirikie?’ 45Naye enevagharusha, ekiti, ‘Kididi nimutio, Sa vuntu mwesimketiie mmwe wa avo vadori, temuniketiie mi.’ 46Avo venetonga kuraingia he ibigho la kae na kae, mira venye singirisya vo venetonga he nkalamo ya kae na kae.”
Currently Selected:
MATAYO 25: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
