MATAYO 26

Kiaghano cha kumkoma Yesu

(Mrk. 14:1-2; Luk. 22:1-2)

1Niho Yesu ekinakenje ivyo viteto vyose, akavati, varateri vakwe, 2“Mwemanyije iti misi miri yekivecha, ula ungi ni wa Pasaka, na Mwana wa Mntu eneinkijwa avambwe he msalaba.” 3Igheri lila vabaha va vatasi va vaghosi va vantu ngwa, vakavungana he kitala cha Mtasi M’baha eitangwa Kayafa, 4vakateta njama hamwe, nesa vamgure Yesu kwa kiavia, na kumkoma. 5Vakati, “Mira kisioke he msi m’baha, nesa hasireketa mkede wa vantu.

Yesu egerwa mafuta uko Betania

(Mrk. 14:3-9; Yoh. 12:1-8)

6Aho Yesu eho uko Betania he nyumba yakwe Simoni mreumbuka, 7akaswiiwa ni mche ehete kachupa ka mafuta edi a zora mbaha, akamgera he mtwi, aho eikae si ekila. 8Varateri vakwe vekivona, vakavihiwa, vakati, “Ni konda ani ii? 9Ambu aa mafuta chekive kutaghijwa kwa fedha nyingi, jiinkwe vakiva.” 10Yesu akamanya, akavati, “Hanini mwemrisha uu mche vwasi? Ambu enirongiie ndima yedi. 11Ambu vakiva muna navo misi yose, mira mi temuna nami misi yose. 12Ambu aho ekigera mwiri wangu mafuta aa, eketie huvo nesa aniringanyije kujikwa kwangu. 13Kididi nimuti, He masanga ose kila hantu ii Mburi Yedi yenebirikirwa, na icho eketie kineretetwa kwa kukumbuka.”

Irenge lakwe Yuda

(Mrk. 14:10-11; Luk. 22:3-6)

14Igheri ilo mmwe wa vala ikumi na veri, eitangwa Yuda Iskarioti, akatonga he vabaha va vatasi, 15akati, “Muneninka ni nekimwinkija he mikono yenyu?” Vakamunka fedha makumi matatu. 16Kuvokia ilo igheri akaenda nzia vuntu enemwinkija.

Kijo cha msirikijo

(Mrk. 14:12-26; Luk. 22:7-23; Yoh. 13:21-30; 1 Kor. 11:23-25)

17Ingeri msi wa kuvoka wa mikate yesigerirwe chachu, varateri vakamswia Yesu, vakamti, “Ni hio weenda tukuharehie halia Pasaka?” 18Akavati, “Tongani he muzi ha mntu msiku, mumti, ‘Mcheji eti, Igheri langu lazengelela, ninelia Pasaka hako hamwe na varateri vangu.’” 19Varateri vakaketa sa vuntu Yesu evaazere, vakaringanya Pasaka.

20Hekinaoke chahemagheri, akaikaa si kula kijo hamwe na vala ikumi na veri. 21Aho ekila akati, “Kididi nimuitio, Mmwe wenyu eneniinkija.” 22Vakaonda haiwa, vakavoka kumvwija mmwe mmwe, kuti, “Mfumwa, kana nimi?” 23Akagharusha, akati, “Uu atoveja hantu hamwe nami he bakuli, niye eneniinkija. 24Mwana wa Mntu etonga sa vuntu eandikiwe, mira vwasi vwa uo mntu enemwinkija Mwana wa Mntu! Neki chedi uo mntu nanga tekimoghiwe.” 25Yuda ula mremwinkija akagharusha, akati, “Rabi, kana nimi?” Akamti, ‘Vuntu wateta.”

26Aho vekila, Yesu akaghuha mkate akaanjela, akaubendua, akavainka varateri vakwe akati, “Koni mule, uu ni mwiri wangu.” 27Kangi akaghuha kikombe akaanjela, akavainka akati, “Nwani hecho vose; 28ambu ii niyo sakame yangu ya kiaghano, yeitwa vuntu vwa vajinki nesa vashighiwe mabanu. 29Mira nimutio, Kuvokia yoo sikanwe kangi neri chemoghwa ni mzabibu, mhaka ula msi nenenwa mshaa hamwe na unywi uko he vufumwa vwa Vava wangu.”

30Vekinakenje kuimba, vakafuma, vakatonga he ntuvi ya Mizeituni.

Yesu evavonyesha varateri vuntu venemshigha

(Mrk. 14:27-31; Luk. 22:31-34; Yoh. 13:36-38)

31Niho Yesu akavati, “Unywi vose kio iki munenivihiwa; ambu cheandikwe iti, ‘Ninem’bigha mrisha, na magonji a ifio enezarika.’ 32Mira nekinekenja kuvuka he vefwie, ninemurongorira noko Galilaya.” 33Petro akagharusha, akamti, “Hata vose vekinevihiwa vuntu vwako, mi sikavihiwe neri.” 34Yesu akamti, “Kididi nikuvwira we, kio iki nkuruvi yesinaamba, unenikana kantu katatu.” 35Petro akamti, “Hata chekinitara kufwa hamwe nawe, sikakukane neri.” Na varateri vose vakareteta huvo.

Yesu uko Getsemane

(Mrk. 14:32-42; Luk. 22:39-46)

36Niho Yesu akatonga hamwe navo, akafika he mghunda weitangwa Getsemane, akavati varateri vakwe, “Ikaani aha, nitonge kuraomba.” 37Akamtika Petro na vana Zebedayo veri; akavoka kusononoya na kuonda. 38Niho akavati, “Ngoro yangu ina vwasi mno kiringanyo cha kufwa, ikaani aha muyae kiavi hamwe nami.” 39Akatonga kamozya hadori, akasoma vusho si, akaomba ekiti, “Vava wangu, kakicha kive, iki kikombe kiniveche; mira si sa vuntu mi nekunda, esire sa vuntu we wekunda.” 40Akahunduka he vala varateri, akakicha vashinjia, akamti Petro, “Kave twaidima kuyaa kiavi nami neri saa mwe? 41Yaani kiavi na kuomba, nesa musireingia he mighesho! Ngoro ikunda, mira mwiri weleghele.” 42Akatonga kangi ka keri, akaomba ekiti, “Vava wangu, kakicha tekive iti iki kikombe kiniveche nesikinwie, kikundire chako kifumane.” 43Akahunduka wa akakicha vashinjia, ambu meso avo eemee. 44Akavashigha wa akatonga akaomba ka katatu, ekirateta viteto vila vila. 45Ekikenja akavazia varateri vakwe, akavati, “Shinjiani ana na kuhema. Rereha, saa yafika, Mwana wa Mntu eneinkijwa he mikono ya venye mabanu. 46Vukani tutonge! Rereha, ula mreniinkija azengelela.”

Kugurwa kwakwe Yesu

(Mrk. 14:43-50; Luk. 22:47-53; Yoh. 18:2-11)

47Aho echeriteta, niho Yuda mmwe wa vala ikumi na veri akaza, ena na vantu vajinki, vetikie mihandwi na marungu, vefuma he vabaha va vatasi na vaghosi va vantu. 48Ula mremwinkija evainkie luvengo kuti, “Uo nenem’bwita, niye, mgureni.” 49Hala indi akamswia Yesu, akamti, “Rabi, nakukezya,” akam’bwita. 50Yesu akamti, “Mbwiaa, chekuetie nini?” Niho vakamswia Yesu vakaronga mikono vakamgura. 51Aho niho mmwe wa vala vena ne Yesu, akaronga mkono wakwe, akajuta mhandwi wakwe, akamtema mzoro wa mtasi m’baha, akamchwa isikio. 52Niho Yesu akamti, “Hundua mhandwi wako hantu hawo; ambu vala vegura mhandwi venekomwa ni mhandwi. 53Kana uti sekiidima kumsemba Vava wangu, naye anietie iki huvu malaika marivati ikumi na meri na kukela? 54Ana maandiko enekoloshwa ze, iti nivwo vuntu chetara kioke?” 55Saa ila Yesu akamvwira luvungano kuti, “Mwezie kunigura mwetikie mihandwi na marungu sa mweragura mraghumba? kila msi nekiikaa he nyumba ya mtaso nekicheja, neri temunigurire. 56Mira ivyo vyose vyeokie, nesa maandiko a varoti akoloshwe.” Niho varateri vose vakamshigha, vakaaha.

Kulahwa kwakwe Yesu he mtasi m’baha

(Mrk. 14:53-65; Luk. 22:54-55, 63-71; Yoh. 18:12-14, 19-24)

57Na vala vemgurire Yesu vakamtika hakwe Kayafa mtasi m’baha, eho hantu vaandiki na vaghosi vekivungane, 58Petro akamratera, mira hae hae, mhaka he kitala cha mtasi m’baha, akaingia, akaikaa si na valughojo, nesa avone vuntu mburi yenechika. 59Niho vabaha va vatasi na chila yose vakamwendia Yesu vuonwa vwa mongo, nesa vamkome; 60mira vasivone, nziaho hezie vaonwa vajinki va mongo. Uko nyuma hakavuka veri, 61vakati, “Uu etetie, ‘Niidima kubaja nyumba ya Mrungu na kuijenga kwa misi mitatu.’” 62Mtasi m’baha akaimuka, akamti, “Tuna cho wegharusha? Ni vuonwa ani ava vekutetia?” 63Mira Yesu akahuja. Mtasi m’baha akamti, “Nikurighia he Mrungu mwenye moo, utuvwire, kakicha niwe Kristo Mwana wa Mrungu.” 64Yesu akamti, “Niwe wati huvo. Kangi nimutio, ‘Kuvokia iki munemvona Mwana wa Mntu eikae he mkono wa kume wa nzinya, ekiza wanga he majumbi a uko wanga.’” 65Niho Mtasi m’baha akabaja suke jakwe ekiti, “Emfala Mrungu! Vaonwa tuvaendiani wa? Rerehani iki mwasikia iyo falaja yakwe: 66mutize unywi?” Vakagharusha vekiti, “Chemtara ni kifwa!” 67Niho vakamtufia mate a vusho, vakam’bigha nkundi; kumwe vakam’bigha maluhi, 68vekiti, “We Kristo, turotie iti ni ani akubigha?”

Petro emkana Yesu

(Mrk. 14:66-72; Luk. 22:56-62; Yoh. 18:15-18, 25-27)

69Petro ekiikae si aho nze he ua; mgitu mmwe akamswia, akati, “Nawe werena ne Yesu wa Galilaya.” 70Naye akakana mozya he vose, ekiti, “Simanyije icho weteta.” 71Naye ekinafume nze ya mvera, mgitu ungi akamvona, akavati vala veho hala, “Hata uu ekirena ne Yesu Mnazareti.” 72Akakana wa kwa kirigho, “Simmanyije uu mntu!” 73Kakenda kadori vala veimuke hala vakamswia Petro, vakamti, “Kididi hata we ure mmwe wavo, ambu hata kitetire chako kikumanyisha.” 74Niho akavoka kukurara na kukurighia ekiti, “Uo mntu simmanyije.” Hala indi nkuruvi ikaamba. 75Niho Petro akakumbuka kila kiteto Yesu etetie, “Nkuruvi yesinaamba unenikana kantu katatu.” Akafuma na nze akaia kwa lusoyoyo.

Currently Selected:

MATAYO 26: CHSUNT67

Highlight

Copy