MATAYO 27

Yesu mozya hakwe Pilato mlao wa Kiroma

(Mrk. 15:1; Luk. 23:1-2; Yoh. 18:28-32)

1Hekinache, vabaha va vatasi vose na vaghosi va vantu, vakamchila Yesu iti vamkome. 2Vakamchunga, vakamtika, vakamwinkija ha mlao Pilato.

Kifwa chakwe Yuda

3Niho Yuda ula mremwinkija ekivona iti akenja kuchwiiwa mburi, akawajwa he ngoro, akavahunduia vabaha va vatasi na vaghosi jila fedha makumi matatu, 4ekiti, “Nateshanya hala nekiinkija sakame yesina nzune.” Vakati, “Tunani na iyo mburi? Irerehe mwenye.” 5Akatagha jila fedha he nyumba ya mtaso, akavuka, akatonga; akarela luge. 6Vabaha va vatasi vakaghuha jila fedha, vakati, “Tekive kujivika he sanduku ya itasi, ambu ni ja zora ya sakame.” 7Vakachila, vakazora najo mghunda wa mrechuma nyungu, uoke hantu ha kujikia vagheni. 8Heicho uo mghunda uitangwa mghunda wa sakame mhaka yoo ili. 9Niho kila chetetiwe ni mroti Yeremia kikafumana, ekiti, “Veghuhie fedha makumi matatu, zora ya ula etaghiwe, eye kumwe he vana va Israeli vemchwiie zora; 10vakazora najo mghunda wa mrechuma nyungu, sa vuntu Mfumwa eniazere.”

Yesu mozya he Pilato

(Mrk. 15:2-15; Luk. 23:3-5, 13-25; Yoh. 18:33—19:16)

11Yesu akaimuka mozya he mlao; malao akamvwija, akati, “We niwe mfumwa wa Vayuda?” Yesu akamti, “Vuntu weteta.” 12Mira ekilahwa ni vabaha va vatasi na vaghosi, tegharushe kintu neri. 13Niho Pilato akamti, “Tusikie, ni vintu vingahi vekuchunga?” 14Naye asigharushe neri kiteto kimwe; niho mlao akamaka haiwa. 15Igheri la msi m’baha mlao emanyere kuchunguia vantu mntu mmwe echungiwe, uo vemkunda. 16Misi ila hekina mntu echungiwe, ena nguma mbivi, eitangwa Baraba. 17Aho vekivungana, Pilato akavati, “Ni uhi mweenda nimuchunguie? Ni Baraba kana ni Yesu eitangwa Kristo?” 18Ambu emanyije iti vetemwinkija vuntu vwa luiso.

19Na hala eikee he kichumbi cha lahia, mche wakwe akamtumia ntume, kuti, “Usiingie he mburi ya uo mwenye kitea; ambu mengo nerishijwe vwasi mno he ndoto vuntu vwakwe.” 20Mira vabaha va vatasi na vaghosi vakasembeka vantu iti vamsaghure Baraba, ne Yesu akomwe. 21Mlao akagharusha, akati, “He ava veri ni uhi mweenda nimchunguie? Vakati, “Ni Baraba.” 22Pilato akavati, “Uo Yesu eitangwa Kristo, nimkete ze?” Vose vakati, “Navambwe he msalaba.” 23Akati, “Hanini? ni kivivi ani eketie? Vakazikalonza, vekiti, “Navambwe he msalaba.” 24Niho Pilato ekivona iti tehena cho cheve, esire mkede weneta, akaghuha mpombe akaoja mikono veyoye, akati, “Mi siho he nzune ya sakame ya uu mntu mwenye kitea; ni mburi yenyu venye!” 25Vantu vose vakagharusha, vakati, “Sakame yakwe na ituhundukie uswi na vana vetu.” 26Niho akavachunguia Barraba, ekinam’bighe Yesu viboko, akamwinkija iti arevambwa he msalaba.

Yesu evambwa he msalaba

(Mrk. 15:16-32; Luk. 23:26-43; Yoh. 19:17-27)

27Niho vasikari va mlao vakamghuha Yesu, vakamwingija he nyumba ya masa; vakamvungania irimbi lose, 28vakamhambua suke, vakamdoka suke nkundu, 29vakalusa ngata ya mivwa, vakamgera he mtwi wakwe, na kamjungu he mkono wa kume. Vakamdunkutia na kumsola vekiti, “Twakukezya mfumwa wa Vayuda!” 30Vakamtufia mate, vakaghuha kala kamjungu vakam’bighabigha nako he mtwi.

31Vekinakenje kumsola, vakamng’ola ila suke, vakamdoka jila jakwe, vakamtika kuramvamba he msalaba.

32Aho vekifuma vakamvona mntu wa Kirene eitangwa Simioni, uo vakamtitikija iti atike msalaba wakwe. 33Vekinafike hantu heitangwa Golgata, ni sa kuti, “He mtwi,” 34vakamunka mvinyo wesankanywe na nyongo iti anwe, mira ye ekiusagha, asikunde kunwa. 35Vekinamvambe he msalaba, vakaghava suke jakwe kwa kushotana; [nesa kila chetetiwe ni mroti kifumane, iti, “Veghavie suke jangu, na nkanzu yangu vakaishotania.] 36Vakaikaa hala vekimrinda. 37Cha wanga he mtwi wakwe, hekivikiwe masa akwe, eandikwe huvu, “UU NI YESU MFUMWA WA VAYUDA.” 38Igheri ilo ilo hakavambwa na vareghumba veri hamwe naye, mmwe mkono wa kume na mmwe mkono wa kumoso. 39Na vala vekivecha aho nzieni vakamrara, vekilungulungusha mitwi yavo, vekiti, 40“We mrebaja nyumba ya mtaso na kuijenga kwa misi mitatu, kukije ra we mwenye! Kara u Mwana wa Mrungu, sea he msalaba!” 41Nirehuvo hata vabaha va vatasi hamwe na vaandiki na vaghosi, vakamsola, vekiti, 42“Ekijije vangi, mira ye mwenye teidima kukukija. Kari niye mfumwa wa Israeli, nasee he msalaba, na uswi tunemwitikija. 43Ekuvikie ikuji he Mrungu, kakicha emkundie namkije ra; ambu nicho ekiti, ‘Mi ni Mwana wa Mrungu.’” 44Nirehuvo hata vala vareghumba vevambiwe he msalaba hamwe naye, vakarem’beresha.

Kifwa chakwe Yesu

(Mrk. 15:33-41; Luk. 23:44-49; Yoh. 19:28-30)

45Kuvokia saa mtandatu hakagwa kija he isanga lose mhaka saa kenda. 46Hekifika sa saa kenda, Yesu akaiagha na izii ibaha, ekiti, “Eli, Eli, lama sabaktani?” Ni sa kuti, “Mrungu wangu, Mrungu wangu, hanini wekinishigha?” 47Kumwe he vala vekiwaho vekisikia, vakati, “Uu emwitanga Elia” 48Hala indi mmwe wavo akadindika, akaghuha mafuri, akaagera he mpombe yekararata, akaachunga he mjungu, akamunka iti anwe. 49Vala vangi vakati, “Shigha tuyoe, iti Elia eneza kumkija.” 50Na Yesu ekinaiaghe kangi na izii ibaha, akachika moo.

51Niho ila suke yeghavie nyumba ya mtaso ikabajika vibaje viri, kufuma wanga mhaka si. Isanga likadidima, makamba akabuka, 52mbira jikajuvuka, miri mingi ya vala vezerire veshinjie ikavuka; 53navo vekinafume he mbira, ekinavuke he vefwie, vakaingia he muzi wezerire, vakakuvonyesha he vajinki. 54Niho ula akida hamwe na vala vena naye kumrinda Yesu, vekivona icho kididimo cha isanga na vyose vyeketike, vakafoleka haiwa, vakati, Kididi uu neki Mwana wa Mrungu.” 55Aho hekina vache vajinki vekiho hae vekirereha, avo nivo vemratere Yesu kufuma Galilaya vekimhirira; 56hevo hemna Maria Magdalena ne Maria mlala wavo Yakobo ne Yose, na mlala wavo vana Zebedayo.

Kujikwa kwakwe Yesu

(Mrk. 15:42-47; Luk. 23:50-56; Yoh. 19:38-42)

57Hekinaoke chahemagheri hakaza mntu mzuri wa Arimatia, eitangwa Yosefu, naye neki mrateri wakwe Yesu. 58Uo mntu akamswia Pilato, akaomba kimba chakwe Yesu, niho Pilato akaazera iti ainkwe. 59Yosefu akaghuha kila kimba, akakichungachunga na suke yeelile, 60akakivika he mbira yakwe shaa yeforirwe he ikamba, akahelija ibwe ibaha he mpenge yayo, akatonga. 61Na aho hekimna Maria Magdalena ne Maria ula ungi vewala, veikee si hafuhi na mbira.

62Hala he yavo ewo msi weratera ula wa kuharehia Pasaka, vabaha va vatasi na Vafarisayo vakamvungania Pilato, 63vekiti, “Mfumwa, twakumbuka iti ula mrakenga hala ereho etie, ‘Hekivecha misi mitatu ninevuka he vefwie.’ 64Heicho, azera iti mbira irindwe nezo mhaka msi wa katatu, varateri vakwe vasireza vakamwiva, vakavati vantu, Avuka he vefwie, makengo a nyuma akakela ala a kuvoka.” 65Pilato akavati, “Muna vasikari, tongani murerinda sa vuntu mwemanyije.” 66Navo vakatonga vakarinda nezo ila mbira, vakavika isimbiko he lila ibwe hamwe na vala vasikari varinji.

Currently Selected:

MATAYO 27: CHSUNT67

Highlight

Copy