MARIKO 9
9
1Akavati, “Kididi nimutio, Hena vakumwe he ava veimuke aha, vesikasaghe kifwa neri, mhaka vekinevona vufumwa vwa Mrungu vwaza na nzinya.”
Kukoranyika fwani
(Mat. 17:1-13; Luk. 9:28-36)
2Hekivecha misi mtandatu Yesu akavaghuha Petro ne Yakobo ne Yohane, akavakweja he ntuvi ndeza vo venye mpiso; akagharuka fwani yakwe mozya hevo; 3suke jakwe jikamekenisa, nyewa chwe, kiringanyo mreoja suke wa kunu he masanga esiidima kujielija huvo. 4Vakafumiwa ni Elia ne Mose, navo vekigaya ne Yesu. 5Petro akagharusha, akamti Yesu, “Rabi, ni chedi uswi kuikaa aha; na tujenge vujumba vutatu, kamwe kako, kamwe kakwe Mose na kamwe kakwe Elia.” 6Ni hala esivonie chateta, kila veingiwe ni fole mbaha. 7Hakagwa ijumbi, likavagushija mvuri; izii likafuma he lila ijumbi, “Uu ni Mwanangu mkunde wangu, msikieni ye.” 8Hala indi vekirereha uko vasivone wa mntu ena navo esire Yesu mwenye.
9Aho vekisea he ntuvi, akavakokontia vasiremvwira mntu ivyo vevonie, mhaka Mwana wa Mntu ekinevuka he vefwie. 10Vakagurisha icho kiteto, vekivwijana vo venye na venye, kuti, “Uko kuvuka he vefwie, ni kutize?” 11Vakamvwija, vekiti, “Hanini vaandiki veti kimtara Elia arongeza?” 12Akavagharusha, akavati, “Ni chaidi, Elia erongeza na kuhundua vyose vushaa; mira wa hamwe na icho, Mwana wa Mntu eandikiwe ze kuti enerishwa mavasi majinki na kuberwa? 13Mira nimutio, Elia akenja kuza, vakamketia vyose veenda sa vuntu eandikiwe.”
Kubanjwa kwa m’bwange ena mpepo ya kisa
(Mat. 17:14-21; Luk. 9:37-43)
14Ingeri vekivafikia varateri, vakavona luvungano lubaha lwevajunguluke, na vaandiki vekivwijana navo; 15hala indi luvungano lwose vekimvona vakahomborera, vakamsarira, vakamkezya. 16Akavavwija, “Muvwijana ni navo?” 17Mntu mmwe he lula luvungano akamgharusha, “Mcheji, nemwetie mwanangu hako, ena mpepo yesiteta; 18kila igheri yekimgura, imgusha si, akererese majegho, afunye mafuo na kunyonga; nikateta na varateri vako vaifunye, vasiidime.” 19Akagharusha, akati, “Unywi lukolo lwesiitikija, niikajanye na unywi mhaka rini? Mweteni hemi.” 20Vakamwete heye; ekinamvone hala indi ila mpepo ikamgusha kisa, akagwa hala si, akaghangalika ekifumwa ni mafuo. 21Akamvwija vavee, “Evokiwe too rini?” Akati, “Too ere mwana. 22Na kantu kajinki yanamgusha he moto na he mpombe iti imtishe; mira wekiidima kintu chochose, utuvoneie na kutughenja.” 23Yesu akamti, “Wekiidima! Vyose viidimika he ula eitikija.” 24Hala indi vavee ula mwana akatetisha, akati, “Naitikija, nighenja he kusaitikija kwangu.” 25Yesu ekivona iti luvungano lusara kuvungana, akabohija ila mpepo mbivi, akaiti, “We mpepo wesiteta na wesisikia, Mi nikuamora: Fuma he uu, neri usireingia wa heye.” 26Ikaagha, ikamgusha kisa mno, ikamfuma; naye akaikaa sa efwie; va kumwe vakati, “Afwa.” 27Mira Yesu akamgura mkono, akamvushija; naye akaimuka. 28Ekinaingie na nyumba varateri vakwe vakamvwija mpiso, “Hanini uswi twekisaidima kuifunya?” 29Akavati, “Mbare ii teiidima kufuma kwa nzia yoyose, esire kwa kuomba.”
Yesu erota ka keri mburi ya kifwa chakwe
(Mat. 17:22-23; Luk. 9:43-45)
30Vakafuma uko, vakavecha ghati ya Galilaya; naye teendie hakete mntu emanya. 31Ambu ekivacheja varateri vakwe, akavati, “Mwana wa Mntu etonga kurainkijwa he mikono ya vantu, navo venemkoma, hekivecha misi mitatu, enevuka he vefwie.” 32Mira vo tevetwarije icho kiteto, vakafoleka kumvwija.
Kuchejwa kukuduisha
(Mat. 18:1-5; Luk. 9:46-48)
33Vakafika Kapernaumu; aho eho he nyumba, akavavwija, “Mwekikanana ni uko nzieni?” 34Vakahuja; ambu kula nzieni vekikanana vo kuti m’baha ni ani. 35Akaikaa si, akavaitanga vala ikumi na veri, akavati, “Mntu eenda kuoka wa kuvoka, eneoka wa msirikijo he vose, na mndima wa vose.” 36Akaghuha kajana, akakavika ghati hevo; akakashashata, akavati, 37“Mntu ekimghuhia mwana mmwe sa uu vuntu vwa izina langu, nimi anighuhia; mntu ekinighuhia mi, simi enighuhia, mira ni ula enitumie.”
Kuchejwa kugumirija
(Luk. 9:49-50)
38Yohane akamgarusha, akamti, “Mcheji, twevonie mntu ekifunya mpepo he izina lako, naye esitonjanya na uswi, tukamsuja kila esitonjanya na uswi.” 39Yesu akavati, “Musimsuje; ambu tehena mntu eidima kuvusha kirumo he izina langu, kangi hala indi akaidima kuniteta uvivi. 40Ambu ula esituomanya, eho mondo wetu. 41Ambu mntu wowose enemuinka unywi kikombe cha mpombe kila mwe vakwe Kristo, kididi nimutio, tekasove kitumulilo chakwe.”
Irunge la ibigho la kuhosha vangi
(Mat. 18:6-9; Luk. 17:1-2)
42“Na ula wowose enemhasha mmwe wa ava vadori veniitikije, keba achungiwe loa lwa he singo yakwe, na kuviritwa he bahari. 43Na mkono wako wekikuhosha, uchwe; ni keba kuingia he nkalamo wena ihindi, kukela wena mikono miri na kutonga gehena, he moto wesifwa; [ 44eho hantu mbunyo yavo yesifwa, neri moto wesifwa.] 45Na kughu kwako kwekikuhosha, kuchwe ambu ni keba kuingia he nkalamo wena kiema, kukela wena maghu meri wekiviritwa he gehena; [ 46eho hantu mbunyo yavo yesifwa, neri moto wesifwa.] 47Na iziso lako lekikuhosha, ling’ole, ulitaghe, ambu ni keba kuingia he vufumwa vwa Mrungu na iziso imwe, kukela wena meso meri wekiviritwa na he gehena; 48eho hantu mbunyo yavo yesifwa, neri moto wesifwa. 49Ambu kila mntu enegerwa munyu kwa moto. 50Munyu ni wedi; mira munyu wekisuha muneugerani nesa uoke? Mukete munyu ndeni he unywi, muikae na mporere unywi venye kwa venye.”
Currently Selected:
MARIKO 9: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
