MARIKO 8
8
Kuighushwa kwa vantu viku vine
(Mat. 15:32-39)
1He misi ila, kila heketie wa luvungano lubaha, navo vakasova chala, akavaitanga varateri vakwe, akavati, 2“Nisikia livungano vwasi, ambu iki vanaikaa nami hantu ha misi mitatu, neri vesina kijo. 3Nami nekivaaghanya iti vaghotoke vesilie, veneresempukia nzieni, na kumwe hevo vefuma hae.” 4Varateri vakwe vakamgharusha, “Mntu eidima ze kuvaighusha ava mikate aha nyika?” 5Akavavwija, “Muna mikate mingahi?” Vakati, “Mfungate.” 6Akaazera luvungano vaikae si; akaghuha ila mikate mfungate, akaanjela, akaibendua, akavainka varateri vakwe vavainke; vakainka luvungano 7Hekina na vusamaki vughere; akavuinka lutelwedi, akati na uvwo irevainkeni. 8Vakala, vakaighuta, vakatoa vikapu mfungate vya vibendo vyeimie. 9Na vala velie ne sa viku vine. Akavaaghanya. 10Hala indi akaingia he ngilawa hantu hamwe na varateri vakwe, akatonga myondo ya Dalmanuta.
Yesu esua kuronga luvegho
(Mat. 16:1-4; Luk. 12:54-56)
11Hakafuma Vafarisayo, vakavoka kuvwijana naye, vekienda heye luvengo lwefuma uko wanga, kwa kumghesha. 12Akaluluma he ngoro, akati, “Hanini lukolo ulu lweenda luvengo? Kididi nimutio, ‘Lukolo ulu telukainkwe luvengo.’” 13Akavashigha, akaingia wa he ngilawa, akakelanya na sela.
Yesu ebohia kusatwarija kwa varateri
(Mat. 16:5-12)
14Vakaivaa kutika mikate, neri he ngilawa vesekina esire mkate mmwe du. 15Akavakokontia, akati, “Rerehani, kucheieni na chachu ya Vafarisayo na chachu yakwe Herode.” 16Vakakanana vo venye na venye kila vesina mikate. 17Yesu akamanya, akavati, “Hanini mwekanana iti ni kila mwesina mikate? Temunatwarija neri temunajuvukiwa? Ngoro jenyu ni nkuji? 18Meso muna, temuvona; muna masikio, temusikia? neri temukumbuka? 19Hala nekibendua ila mikate misano na kuvainka vala viku visano, mwetoie vikapu vingahi vyeizue vibendo?” Vakamti, “Ikumi na viri.” 20“Na ila mfungate kuvainka vala viku vine, mwetoie vikapu vingahi vyeizue vibendo?” Vakamti, “Mfungate.” 21Akavati, “Temunatwarija neri?”
Yesu ebanja ituntu
22Vakafika Betsaida, vakamwetia ituntu, vakamsemba amkunte. 23Akamgura ula ituntu mkono, akamfunya na nze ya kamuzi, akamtufia mate he meso, akamvikia mikono, akamvwija, “Uvona kintu?” 24Akarereha wanga, akati, “Nivona vantu sa miti yetonga.” 25Niho akamvikia kangi mikono he meso akwe, naye akarerehisha; akabanda, akavona vyose nezo. 26Akamti ghotoka, ekiti, “Usireingie he muzi.”
Petro evonyesha iti Yesu ni Kristo
(Mat. 16:13-20; Luk. 9:18-21)
27Yesu akafuma na varateri vakwe, vakatonga he vumuzi vwa Kaisaria Filipo. Uko nzieni akavavwija varateri vakwe, kuti, “Vantu veti mi ni muni?” 28Vakamti, “U Yohane M’batizi, vangi, U Elia, vangi, U mmwe wa varoti.” 29Naye akavavwija, “Na unywi muti mi ni muni?” Petro akagharusha, akamti, “We niwe Kristo.” 30Akavakokontia vasiremvwira mntu mburi jakwe.
Yesu erota kifwa chakwe na kuvuka he vefwie
(Mat. 16:21-23; Luk. 9:22)
31Akavoka kuvacheja iti chemvaie Mwana wa Mntu kurishwa mavwasi majinki, na kusuwa ni vaghosi na vabaha va vatasi na vaandiki, na kukomwa; hekivecha misi mitatu avuke he vefwie. 32Naye ekiteta iyo mburi boo. Petro akamtika njama, akavoka kum’bohija. 33Akagharuka akavarereha varateri vakwe, akambohija Petro, akati, “Vuka nyuma hemi, Shetani! ambu turirikana vya ki Mrungu, esire vya kivantu.”
Mwitango wa kukukana
(Mat. 16:24-28; Luk. 9:23-27)
34Akaitanga luvungano hamwe na varateri vakwe, akavati, “Ula eenda kuniratera, akukane ye mwenye, atike msalaba wakwe, aniratere. 35Ambu mnntu eenda kukija moo wakwe, eneutesha; na mntu eneutesha moo wakwe vuntu vwangu na vuntu vwa Mburi Yedi eneukija. 36Ambu mntu enevona lumazo ani, ekimaza mari ya masanga ose mira ekitesha moo wakwe? 37Kana mntu enefunya ni hantu ha moo wakwe? 38Ambu kila mntu enenisikia soni mi na viteto vyangu, he lukolo ulu lweshinda na lwena mabanu, na Mwana wa Mntu enemsikiwa uo soni, aho akineza he ngazo ya Vavee hamwe na vamalaika vezerire.
Currently Selected:
MARIKO 8: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
