MARIKO 7
7
Yesu egharusha ishagho la kusagura menda
(Mat. 15:1-20)
1Niho Vafarisayo na vaandiki kumwe vefumie Yerusalemu, vakavungana hakwe; 2vakavona varateri vakwe va kumwe vekikulira na mikono yejirare, ni kuti, yesiojijwe. 3Ambu Vafarisayo na Vayuda vose vesinarongaoja mikono mhaka he kigusuno tevela, ni kila vegurire misimo ya vazima vavo; 4kangi vekifuma kiete, vesinakuoja, tevela; kangi hena vintu vijinki vevigurisha na kuvigimbika, sa kuoja vikombe na chupa na ntanu ja ng’andu. 5Vala Vafarisayo na vaandiki vakamvwija, Hanini varateri vako vesigurisha misimo ya vazima, mira vakulira kijo na mikono yejirare?” 6Akavati, “Yesaya etetie nezo mburi yenyu unywi valung’ong’o, sa vuntu cheandikwe,
‘Ava vantu venishimia na myomo,
Mira ngoro javo jiho hae nami; 7Navo venitasa sutwa,
Vekicheja michejire ya maazero a kivantu.’
8Unywi mushigha iamoro la Mrungu, na kugurisha misimo ya vantu.” 9Akavati, “Ni chedi! Musua iamoro la Mrungu nesa mugurishe viziomo yenyu. 10Ambu Mose etie, ‘Vikia vaveo na mlala wenyu shima’, kangi, ‘Ula emrara vavee kana malala wavo, nafwe.’ 11Mira unywi muti, ‘Mntu ekimti vavee kana mlala wavo, Ni Korbani, nikwo kuti, Kintu changu chevaie kukughenja, chaoka itasi, tehena mburi; 12neri temumkundija wa kumrongia vavee kana mlala wavo kintu;’ 13mukavusha kiteto cha Mrungu vuntu vwa misimo yenyu mweshighiane; kangi muraketa vintu vijinki vyefwanane na ivyo.” 14Akaitanga kangi mavungano, akavati, “Nisikijani vose mutwarije. 15Tehena kintu cheho nze he mntu chekiingia heye, cheidima kumjiraja, esire vila vyefuma heye, nivyo vyemjiraja mntu. [ 16Mntu ena masikio a kusikiia nasikie.”]
17Ekinashighane na luvungano, akaingia na nyumba, varateri vakwe vakamvwija mburi ya ula mfwanano. 18Akavati, “Kave na unywi temuchee? Temumanyije iti kila kintu cheho chanze he mntu chekiingia heye, tekiidima kumjiraja? 19Ambu tekiingia he ngoro, nire he ndeni du, nyuma kifuma kutonga he choo?” He kuteta huvo ezerije vijo vyose. 20Akavati, “Kila chefuma he mntu nicho chemjiraja. 21Ambu, he ngoro ja vantu hefuma madunganyo mavivi: Kushisha, 22vukea, kukoma, kushinda, kiherehere kivivi, vuvivi, kiavya kivivi, kumotoka, lwiso, viraro, kukukweja na vurundu. 23Ivyo vivivi vyose vifuma ndeni, navyo nivyo vyemjiraja mntu.”
Kubanjwa kwa m’bora Mkanani
(Mat. 15:21-28)
24Akavuka uko akatonga he mihaka ya Tiro na Sidoni; akaingia he nyumba, ekienda iti hasikete mntu emanya, mira teidime kuvisika. 25Ambu aho hekina mche ena mwana wa kibora, ena mpepo mbivi; ekisikia mburi jakwe, akaza, akagwa he maghu akwe. 26Na uo mche ne Mgiriki, mbari yakwe ni Msirofoinike, akamsemba afunye ila mpepo he mwanawe. 27Akamti, “Shigha vana vaongwighuta, ambu si chedi kughuha kijo cha vana na kuviritia maguro.” 28Naye akagharusha, akamti, “Yee, Mfumwa, mira hata maguro eho kijusi he meza erala vikombi vya vana.” 29Akamti, “He vuntu vwa icho kiteto, kutongire, mpepo yafuma he mwanao.” 30Akaghotoka, akamkicha ula mwana eyejwe he kitanda, na ila mpepo yakenja kumfuma.
Kubanjwa kwa mntu efwie masikio, kangi esidima teta nezo
(Mat. 15:29-31)
31Akafuma wa he mihaka ya Tiro, akavecha ghati ya Sidoni, akafika he bahari ya Galilaya, he mihaka ya Dekapoli. 32Vakamwetie mntu efwie masikio, kangi esidima teta nezo, vakamsemba iti amvikie mikono. 33Akamtanya na luvungano, akamvika kihakwe, akamgera vichaa he masikio akwe, akatufa mate, akamkunta lumi, 34akarereha uko wanga, akaluluma, akamti, “Efata!” ni kwo kuti, “Juvuka!” 35Hala indi masikio akwe akajuvuka, na luge lwa lumi lwakwe lukaleghela, akateta nezo. 36Akavakokontia iti vasimvwire mntu; mira vuntu eteishe kuvakokontia, navo vaakazika kuighamba; 37vakamakisha haiwa, vakati, “Eharehe vyose nezo; vefwie masikio, evaidimija kusikia, na vesiidima teta vateta.
Currently Selected:
MARIKO 7: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
