MARIKO 6
6
Yesu esuwa Nazareti
(Mat. 13:53-58; Luk. 4:16-30)
1Akafuma uko akafika he isanga la havo; varateri vakwe vakamratera. 2Msi wa sabato wekinafike, akavoka kucheja he sinagogi; vajinki vakamaka, vekiti, “Uu evonie hi ivi? Kangi, ni kiugho ani iki uu einkiwe? Na ni kini, ivi virumo vibaha vyeketwa ni mikono yakwe? 3Uu si ula mseremala mwana Maria, mjinawe Yakobo ne Yose ne Yuda ne Simoni? na varumburye teverewaha hetu?” Vakamvihiwa. 4Yesu akavati, “Mroti tesova shima esire he isanga lavo na he ndughu jakwe na kaa havo.” 5Teidime kuketa kirumo neri kimwe uko, esire vawaji vaghere evavikiie mikono, akavabanja. 6Akamaka vuntu vwa kusaitikija kwavo. Akajunguluka he vula vumuzi ekicheja.
Ndima ya ntume ikumi na veri
(Mat. 10:5-15; Luk. 9:1-6)
7Akavaitanga vala ikumi na veri, akavoka kuvatuma veri veri, akavainka nzinya he mpepo mbivi; 8akavaamora iti vasitike kintu cha nzieni, neri kijo, neri ibene, neri pesa he mfuko, esire nzata du; 9mira vadoke viratu; akati, “Musidoke nkanzu mbiri.” 10Akavati, “Kila hantu mwengia he nyumba, ikaani ho mhaka mwekinehafuma. 11Na kila hantu vesimughuhia neri kumusikija, mwekifuma aho, kukuntani teri yeho he maghu enyu, kioke vuonwa hevo.” 12Vakafuma, vakabirikira iti vantu vachwe mti, 13vakafunya mpepo nyingi, vakavira vawaji mafuta, vakabanja.
Kifwa ahakwe Yohane M’batizi
(Mat. 14:1-12; Luk. 9:7-9)
14Na Mfumwa Herade akasikia ijo mburi; ambu izina lakwe lekimanyike hose, akati, “Yohane M’batizi avuka he vefwie, heicho nzinya ijo jironga ndima heye.” 15Vangi vakati, “Ni Elia.” Vangi vakati, “Uu ni mroti, kana ni sa mmwe he varoti.” 16Mira Herode ekisikia, akavati, “Yohane ula nemchwie singo, avuka he vefwie.”
17Ambu Herode mwenye ekitumie vantu vakamgura Yohane, akamchunga vuntu vwakwe Herodia, mche wakwe Filipo mjinawe, kila emghuhie; 18ambu Yohane ekimvwirire Herode, “Tekikundijwa kuikaa na mche wa mjinao. 19Nino Herodia akamvikia idifiko, akaenda mimkomire, asivone, 20ambu Herode emfoleke Yohane, kila emanyije iti ni mntu mwenye kitea ezerire, akamrinda; na ekinamsikije, akaketa matatanyi haiwa; mira ekinamsikija na kuizihirwa. 21Igheri hekinavoneke msi weve, wa kumoghwa kwakwe Herode, akavaharehia venye nguma na maakida na vantu vabaha va Galilaya mbao. 22Niho mwana Herodia wa kibora, ekinaingie akavina, akamwizihija Herode na vala veikae si naye he ila mbao. Mfumwa akamti ula mbora, “Niomba chochose wekunda, ninekunka.” 23Akakurigha heye iti, “Cho weneniomba ninekunka, na ere kibaje cha vufumwa vwangu.” 24Niho akafuma, akremvwija malala wavo, “Niombe ni?” Akamti, “Mtwi wakwe Yohane M’batizi.” 25Hala indi akaingia fia he mfumwa, akaomba ekiti, “Nienda uninke iki huvu mtwi wakwe Yohane M’batizi aha he sahani.” 26Mfumwa akasikia vwasi haiwa, mira vuntu vwa kukurigha kwakwe, na vuntu vwa vala veikae si aho he mbao, asikunde kumwima. 27Hala indi mfumwa akatuma msikari, akaazera kuete mtwi wakwe. 28Akatonga akamchwa singo kula he kichungo akaete mtwi wakwe he sahani, akamunka ula m’bora, na ula m’bora akamunka mlala wavo. 29Varateri vakwe vekinasikie, vakaza, vakaghuha kiimba chakwe, vakaremjika he mbira.
Kuighushwa kwa vantu viku visano
(Mat. 14:13-21; Luk. 9:10-17; Yoh. 6:1-13)
30Ntume vakavungana hakwe Yesu; vakamvwirira mburi jose verongie, na vyose vechejije. 31Akavati, Nzoni unywi venye hantu ha mpiso hesina vantu, muheme hadori.” Ambu hekina vantu vajinki, veza na vetonga; neri hasikete halia kijo. 32Vakatonga mpiso noko he ngilawa hantu hesina vantu. 33Vantu vakavavona vekitonga; vajinki vakamanya, vakafuma he mizi yose, vakatonga na maghu, vakasara fia vakarongafika. 34Naye ekisea he ngilawa, akavona luvungano lubaha; akavasikia vwasi, ambu vekiikee sa magonji esina mrisha; akavoka kuvacheja mburi nyingi. 35Niho hekinaveche saa nyingi ja he msi, varateri vakwe vakamswia, vakati, “Aha ni nyika ntuhu, na iki heswa; 36vaaghanye ava vantu, nesa vatonge he mighunda na he mizi yeho mondo na mondo, varezora kijo.” 37Akagharusha akavati, “Vainkeni kijo engaunywi.” Vakamti, “Ngea tutonge turezora mikate ya dinari maghana meri nesa tuvainke vale?” 38Akavati, “Muna mikate mingahi? Tongani murerehe!” Vekinamanye vakati, “Misano na samaki mbiri.” 39Akavaazera vavaikaje si vose, marimbi marimbi he mani mavisi. 40Vakaikaa si kilugerere, aha ighana, aha makumi masano. 41Akaghuha ila mikate misano na samaki mbiri, akarereha wanga, akainka lutelwedi, akaibendua-bendua, akavainka varateri vakwe iti vavainke; akarevaghavia na jila samaki mbiri vose. 42Vakala vose vakaighuta. 43Vakatotola vibendo vyebenduke hamwe na vya samaki, vyekoloka sa vikapu ikumi na viri. 44Na vala velie ila mikate ne sa viku visano va kiume.
Yesu evata wanga he bahari
(Mat. 14:22-27; Yoh. 6:16-21)
45Hala indi akavatitikija varateri vakwe vaingie he ngilawa, varongore noko sela Betsaida, aho ye ekiaghanya luvungano. 46Igheri ekinavaaghanye akatonga he ntuvi kuraomba.
47Hekinaoke chahemagheri ngilawa yekiho ghati he bahari, naye ekireho mwenye he isanga ijomu. 48Akavavona vekila vwasi he kutonja ngilawa, ambu nkungu yekivafuma na mozya. Hekifika lughojo lwa kane lwa kio akavaswia ekivata wanga he bahari; akaenda kuvavecha. 49Navo vekimvona ekivata wanga he bahari, vakati hangi ni kivuri, vakagera nkunga, 50kila vose vemvonie vakaituka. Hala indi akateta navo, akavati, “Tundanani; nimi, msifoleke!” 51Akaingia he ila ngilawa hantu veho, nkungu ikahuja. Vakamaka haiwa he ngoro javo; 52kila vesitwarije mburi ya ila mikate, ambu ngoro javo jeokie nkuji.
Kubanja vantu uko Genesareti
(Mat. 14:34-36)
53Vekinakelanye, vakafika he isanga la Genesareti, vakamukija ngilawa. 54Navo vekinafume he ngilawa, hala indi vantu vakammanya, 55vakasara, vakajunguluka he lila isanga lose, vakavoka kuvatika na vitanda vala vewaa, na kutonga kila hantu vesikia iti niho hantu eho. 56Na kila hantu etongie, ekiingia he vumuzi, kana he mizi kana he mighunda, vakavika vawaji he viete, vakamsemba vakunte na ere mlingo wa suke yakwe. Na vose vala vemkuntie, vakabanda.
Currently Selected:
MARIKO 6: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
