MARIKO 5
5
Kubanjwa Mgerasi ena mpepo
(Mat. 8:28-34; Luk. 8:26-39)
1Vakafika sela ila ya bahari mhaka isanga la Vagerasi. 2Ekinafume he ngilawa, hala indi akazana na mntu efuma he mbira, ena mpepo mbivi; 3hantu etue nekire he jila mbira; tehena mntu neri mmwe eidime kumchunga wa, neri kwa mnyororo; 4ambu kantu kajinki ekichungiwe na pingu na minyororo, mia akachwa ila minyororo na kubaabaa jila pingu; neri tehena mntu emwidime. 5Na misi yose, kio na msi ekiikaa he mbira na he ntuvi, ekilonza na kukuchwachwa na mabwe. 6Ekiamvone Yesu ereho hae, akamsarira, akamdunkutia; 7akatetisha na izii ibaha ekiti, “Nina ni nawe Yesu Mwana wa Mrungu eho uko wanga? Nikurighia he Mrungu usinirishe vwasi.” 8Ni kila emtie, “We mpepo mbivi, fuma he uu mntu!” 9Akamvwija, “Niwe ani?” Akamti, “Izina langu nimi Legoini, ambu tu vajinki.” 10Ikamsembisha iti asijifunye he lila isanga. 11Na aho he ntuvi hekina ifio ibaha la nguve jekila. 12Mpepo jose jikamsemba jekiti, “Tutume he jila nguve, tuingie jeho.” 13Akajikundija. Jila mpepo mbivi jikafuma, jikangia he nguve, ifio lose likajinka, likasea he kijevu, jikangia he bahari, najo ne sa viku viri, jikafwia he bahari. 14Varisha vajo vakaaha, vakateta iyo mburi ikaghisha kula he muzi na he isanga; vantu vakafuma kurereha icho cheketike. 15Vakamswia Yesu, vakamvona ula mwenye mpepo, eikae si edokie suke, ena icha, naye niye ekina na legioni; vakafoleka. 16Na vala vevonie vakavagaiya jila mburi jevonekie ula mwenye mpepo, na mburi ya jila nguve. 17Vakavoka kumsemba iti avuke he mihaka yavo. 18Aho ekiingia he ngilawa, ula ekina mpepo akamsemba iti aikae naye. 19Mira temkundije, akamti, “Ghotoka na kaa hako, he vantu va henyu, erebirikira iti ni vintu vibaha Mfumwa ekuketiie, na sa vuntu ekuvoneie.” 20Akatonga, akavoka kubirikira uko Dekapoli, iyo mburi mbaha Yesu emketiie; vantu vose vakamaka.
Mwana wa kiche wakwe Yairo na mche mwaji wa kugavukana
(Mat. 9:18-26; Luk. 8:40-56)
21Yesu ekinahunduke wa noko sela na ila ngilawa, vakamvungania luvungano lubaha, naye ekiho mbaimbai ya bahari. 22Hakaza mntu e mmwe he vabaha va sinagogi, eitangwa Yairo; ekinamvone akagwa he maghu akwe, 23ekisembisha haiwa, ekiti, “Mwanangu mdori wa kibora eho efwa; nikusemba uze uremvikia mkono, nesa abande, akalame.” 24Akatonga hamwe naye; luvungano lubaha vakamratera vekimsisima.
25Na mche mmwe ekigavukana miaka ikumi na miri, 26ekirishwa vwasi mno ni vaghanga vajinki, akainkija vyose ena navyo, kisimghenje neri hadori, esire kuzikiwa. 27Ekinasikie mburi jakwe Yesu, akaza nyuma heye ghati he lula luvungano, akakunta suke yakwe; 28ambu etie, “Nekikunta du suke yakwe, ninebanda.” 29Hala indi kisima cha sakame yakwe kikaoma; akamanya he mwiri wakwe iti abanda he vula vwasi. 30Hala indi Yesu ekimanya iti nzinya jamfuma, akagharuka ghati he luvungano, akati, “Ni ani akunta suke jangu?” 31Varateri vakamti, “Uvona vuntu mavungano ekusisima, kangi uti, ‘Ni ani anikunta?’” 32Akarereha myondo yose nesa avone ula eketie huvo. 33Ula mche akasikia fole na kuzingiza, ekimanya kila chemwokiie, akaza, akamdunkutia, akamvwirira vyose cha idi. 34Akamti, “We mwana wa kiche, mwitikijo wako wakubanja; tonga na mporere, ubande vwasi vwako vusikuhundukie wa.”
35Echeri teta, hakaza vantu kufuma he ula m’baha wa sinagogi, vekiti, “Mwanao akenja kufwa; umrishija ni Mcheji vwasi?” 36Mira Yesu ekisikia icho kiteto chekitetwa, akamti ula m’baha wa sinagogi, “Usifoleke, itikija du!” 37Neri tekundije mntu kumratera, esire Petro ne Yakobo ne Yohane mjinawe Yakobo. 38Vakafika kaa ha ula m’baha wa sinagogi; akavona mvulunghiko, vantu vekiia, na kuwela kubaha. 39Ekinaingie akavati, “Hanini mwewela na kuia? Uu mwana tefwie, eteshinjia.” 40Vakamseka haiwa. Naye ekinakenje kuvafunya na nze vose, akamghuha vavee ula mwana na mlala wavo na vala vena naye, akaingia hala hantu ula mwana eho; 41akamgura ula mwana mkono, akamti, “Talita kumi!” ni sa kuti, “M’bora, nakuti vuka!” 42Hala indi ula mwana akaimuka, akatonga, naye efishije miaka ikumi na miri. Vantu vakamaka haiwa. 43Akavakokontia mno iti hasikete mntu emanya iyo mburi; akaazera iti ainkwe kijo.
Currently Selected:
MARIKO 5: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
