MARIKO 4
4
Mfwanano wa mhandi
(Mat. 13:1-9; Luk. 8:4-8)
1Akavoka kuchejija wa mbaimbai ya bahari. Vakamvungania mzomano m’baha mno, mhaka ye akaingia he ngilawa, akaikaa he bahari; na luvungano lwose lwekiho mbaimbai ya bahari he isanga ijomu. 2Akavacheja mburi nyingi kwa mifwanano; he kucheja kwakwe akavati, 3“Sikijani: Mhandi efumie, akatonga kurahanda; 4aho ekihanda mbeu ingi ikagwa mbaimbai he nzia; ndeghe jikaza jikaila. 5Ingi ikagwa he mrarabwe, hantu hesina msau mungi; ikamea hala indi kila msau waho e mdori; 6izuva lekinavae, ikasha, kila yesina miji ikanyaruka. 7Ingi ikagwa he mivwa; ila mivwa ikaeha, ikaibandanya isigere ntunda. 8Jingi jikagwa he msau wedi, jikagera ntunda, jikaeha na kuongejika, jikagera mwe makumi matatu, ingi makumi mtandatu, na ingi ighana.” 9Akati, “Ula ena masikio a kusikijija, nasikie.”
Cheshigha echeja kwa mifwanano
(Mat. 13:10-17; Luk. 8:9-10)
10Na aho eho mwenye, vala vemjunguluke hamwe na vala ikumi na veri vakamvwija mburi ja mifwanano. 11Akavati, “Unywi mweinkiwe kumanya mpiso ya vufumwa vwa Mrungu, mira he vala veho nze vyose viketwa kwa mifwanano,
12Nesa kurereha varerehe, mira vasivone;
Na kusikia vasikie, mira vasitwarije;
Nesa vasiregharuka vakashighiwa.
Mhererejo wa mfwanano wa mhandi
(Mat. 13:18-23; Luk. 8:11-15)
13Akavati, “Temumanyije uu mfwanano? Hama iyo ingi yose muneitwarija ze? 14Uo mrehanda ehanda kiteto. 15Vala veho mbaimbai he nzia ni ava, hantu kiteto chehandwa, navo vekinasikia, hala indi Shetani eza kuvusha kila kiteto chehandiwe he ngoro javo. 16Nirehuvo, na ava nivo vehandiwe he mirarabwe, avo vekinasikia icho kiteto, vekighuhia fia na kuizihirwa; 17mira hevo tehena miji, vekigura igheri idori du, hekiza igheri la mavwasi kana kunyorinyorishwa vuntu vwa icho kiteto, hala indi vegwa. 18Na vala vehandiwe he mivwa ni vantu vesikia icho kiteto, 19mira mabinuko a ili isanga na kuishwa ni mari, na kumotokia vintu vingi, veykiingia, vibandanya kila kiteto kisigere. 20Na vala nivo vehandiwe he msau wedi, ni vantu vesikia icho kiteto na kukighuhia, vakagera ntunda, mmwe makumi matatu, mmwe makumi mtandatu, na mmwe ighana.”
Mafundisho a taa na mbeu
(Mat. 13:31-35; Luk. 8:16-18; 13:18-19)
21Akavati, “Muvona ze? Taa iza nesa ivikwe he kizembe, kana vwisini? teivikwa he kivandiko? 22Ambu tehena kintu chevisike, esire iti kinamanyike, neri tehena tevisiwe esire iti kinarefyumirire boo. 23Mntu ena masikio a kusikijija nasikie.” 24Akavati, Rerehani kila mwesikia; ngero ila mwenegerira, nireyo mwenegerirwa na kuvecha. 25Ambu ula ena kintu eneinkwa, na ula esina kintu, hata kila ena eneghumbwa.”
26Akavati, Vufumwa vwa Mrungu vwefwanane na mntu ezarire mbeu he msau; 27echeri shinjia na kuvuka kio na msi, mbeu nayo ikaeha na kukoloka ye mwenye esimanya. 28Ambu isanga limeja ijenye; kuvoka ihungo, nyuma eiso, na nyuma ngano yekuie he ieso. 29Vijo vyekikua, hala indi etwaa ihandwi, ambu ha lufindiki haringana.”
30Akavati, Vufumwa vwa Mrungu tuvuringanye nani? kana tuvufwanyanye nani? 31Ni sa ntembe ya haradali, eyo yekihandwa he msau, nziaho ni ndori kukela mbeu jose jeho he isanga, 32mira ikahandwa, ieha ioke mbaha kukela miti yose ya mbogha, iketa matambi mabaha, hata madeghe a wanga eidima kuikaa kijusi he mvuri wayo.” 33Etetie huvo kiteto chakwe kwa mifwanano mingi sa vuntu veidime kukisikia; 34tetetie navo kivingi esire kwa mifwanano; mira varateri vakwe akavahererejija ye mwenye mburi jose kimpiso.
Yesu ebohia nkungu
(Mat. 8:23-27; Luk. 8:22-25)
35Ula msi hekioka chahemagheri, akavati, “Natukelanye na sela ila.” 36Vakashigha luvungano, vakamtika vulavula vuntu ereikaa he ngilawa. Na ngilawa jingi jekireho hamwe naye. 37Hakaza nkungu mbahisha, mawimbi akabigha ngilawa ikavoka kuizua mpombe. 38Naye eho mondo wa nyuma, eyaiye mto, vakamvusha, vakamti, “Mcheji, halo si mburi mbaha iti tuteka?” 39Akavuka, akabohija ila nkungu, akavwira bahari, “Huja chwi!” Nkungu ikayhuja, hakahoa do. 40Akavati, “Hanini mwesikia vogha? Temunate kuketa mwitikijo?” 41Vakaingiwa ni fole mbaha, vakatiana, “Ni ani uu, hata nkungu na bahari vyemsikia?”
Currently Selected:
MARIKO 4: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
