MARIKO 3
3
Kubanja mntu ena mkono wesingale
(Mat. 12:9-14; Luk. 6:6-11)
1Akaingia kangi he sinagogi, aho hekina mntu ena mkono wesingale; 2vakamtegha nesa vavone iti enem’banja msi wa sabato, nesa vavone cha kumrengekia. 3Akamti ula mntu ena mkono wesingale, “Imuka aha ghati!” 4Akavavwija, “Kikundijwa msi wa sabato kuronga vyedi kana kuronga vivivi, kukija ngoro kana kuikoma?” Vakahuja. 5Akavarerehisha myondo yose kwa oro na kushinirwa vuntu vwa vukuji vwa ngoro javo; akamti ula mntu, “Ronga mkono wako!” Akauronga; mkono wakwe ukabanda. 6Hala indi vala Vafarisayo vakafuma, vakachila hamwe na va kwa Herode, sa vuntu venemkoma.
Vajinki vebanjwa
7Yesu naye akatana navo, ye na varateri vakwe; akatonga he bahari. Luvungano lubaha vakamratera, vefuma Galilaya na Yudea, 8na Yerusalemu na Idumaya, na sela ila ya Yordani, na myondo ya Tiro na Sidoni; mzomano m’baha vekinasikie mburi ya vintu vyose vila eketie, vakamswia. 9Akavati varateri vakwe iti kangilawa kadori kaikae hafuhi naye, vuntu vwa mzomano nesa vasiremsisima. 10Ambu ebandije vajinki; hata vose vena mavwasi vakamjinkia vaidime kumkunta. 11Na mpepo mbivi kila hantu jemvona jikamgwia hala si jekiiagha, jekiti, “We niwe Mwana wa Mrungu.” 12Akajikokontia mno iti jisimfunyirije.
Ntume ikumi na veri
(Mat. 10:1-4; Luk. 6:12-16)
13Akakwea he ntuvi, akaitanga vala ye mwenye evaenda, navo vakamswia. 14Akavika vantu ikumi na veri iti vaikae naye, nesa avatume kubirikira, 15kangi vakete nzinya ya kufunya mpepo. 16Akavavika vala ikumi na veri; na Simoni akamchwia izina iti niye Petro; 17ne Yakobo mwana Zebedayo ne Yohane mjinawe Yakobo, akavachwia izina: Boanerge, ni sa kuti, “Vana mrurumo;” 18ne Andrea, ne Filipo, ne Bartolomayo, ne Matayo, ne Toma, ne Yakobo mwana Alfayo, ne Tadayo, ne Simoni Mkanani, 19ne Yuda Iskarioti, niye emrengehe.
Yesu ekana iti tekinya mpepo kwa nzinya yakwe Belzebuli
(Mat. 12:22-37; Luk. 11:14-23; 12:10)
20Kangi akaingia he nyumba. Hakavungana wa mazomano, neri asivone halia kijo. 21Vandughu vakwe vekisikia iyo mburi vakafuma, vakatonga kumgura, ambu veti aghuruka. 22Na vaandiki vala vezie kufuma Yerusalemu vakati, “Ena Belzebuli, na, kwa nzinya ya m’baha wa mpepo efunya mpepo. 23Akavaitanga, akavavwira kwa mifwanano, “Shetani eidimaze kumfunya Shetani? 24Vufumwa vwekilingana vo vujenye, uvo vufumwa tevuidima kudinda. 25Na nyumba yekilingana yo njenye, iyo nyumba teiidima kudinda. 26Na kakicha Shetani ekikuomanya ye mwenye na kukulinganya, teidima kudinda, mira enehakana. 27Mntu teidima kuingia he nyumba ya mwenye nzinya na kutaha vintu vyakwe, esinarongamchunga ula mwenye nzinya; niho enehorera nyumba yakwe. 28Kididi nimutio, ‘Mabanu ose na falaja jose vana va vantu venefalaja, veneshighiwa; 29mira mntu emfalaja Mpeho Wedi tekashighiwe narini, eneoka mnzune kae na kae.’ 30Ni kila vetie, ‘Ena mpepo mbivi.’”
Vundughu vwa idi
(Mat. 12:46-50; Luk. 8:19-21)
31Mlala wavo na vajinawe vakaza, vakaimuka nze, vakatuma mntu kumwitanga. 32Na mavungano vekiikae si vemjunguluke, vakamti, “Rereha, mlala wenyu na vajinao vewaho nze, vekuenda.” 33Akavagharusha ekiti, “Mlala wetu na vajinawa ni vani?” 34Akavarereha vala veikae si vemjunnguluke myondo yose, akati, “Rereha, mlala wetu na vajinawa! 35Ambu mntu wose eneronga vila Mrungu ekunda, uo niye mjinawa, na rumburya, na mlala wetu.”
Currently Selected:
MARIKO 3: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
