Mwamulizo 5

I zindelo za Adamu

(1Zin 1:1-4)

1Awuno wo wityatye we zindelwa za Adamu. Mwi'pango lyono Mulungu yamuwumbila u munhu, yamuwumba mu futa yakwe mweneco. 2Nayo yawawumba u mulume no mucekulu, hanyuma yakawa kuwalugutiza, yakawacemela ne litagwa lya “Munhu.” 3Na mwi'pango lono Adamu yali yaficila myaka yigana limonga na makumi madatu, vilo vyo wikale wakwe, yakatuga mwana we hwani yakwe mweneco, nayo yakamucemela litagwa lya Seti. 4Yali yeza kukondya kumulela Seti, u mwene Adamu yakekala myaka magana munana, nayo yakawa yatuga wana wanji we cilume na we cicekulu. 5Adamu yakafwa yena myaka magana yicenda na makumi madatu, yo wikale wakwe mono'nze.

6Na lono Seti, yali yafisa myaka yigana limonga na mihano, yakamulela Enosi. 7Nayo yaza kuwa yamulela Enosi, mwene Seti yakekala kanyhi myaka magana munana na mupunghati, nayo yakawa yena wana wanji we cilume na we cicekulu. 8Nayo Seti yakafwa yena myaka magana yicenda na yikumi na myejete. 9Na lono Enosi, yali yaficila myaka makumi yicenda, baho yakamulela Kenani. 10Na lono yali yamulela Kenani, mwene Enosi, yakekala kanyhi myaka magana munana na yikumi na mihano, nayo yakawa na wana wanji we cilume na we cicekulu. 11Nayo Enosi yakafwa yena myaka magana yicenda na mihano, yo wikale wakwe wa baha mono'nze. 12Nayo Kenani, lono yali yaficila myaka makumi mupunghati, yakamulela Mahalaleli. 13Nayo yali yeza kumulela Mahalaleli, mwene Kenani yakekala kanyhi myaka magana munana na makumi mane, nayo yakawa na wana wanji we cilume na we cicekulu. 14Nayo Kenani yakafwa yena myaka magana yicenda ne 'kumi limonga, yo wikale wakwe wa mono'nze. 15Nayo Mahalaleli, lono yali yaficila myaka makumi mutandatu na mihano, yakamulela Yaledi. 16Nayo yali yeza kumulela Yaledi, mwene yakekala kanyhi myaka magana munana na makumi madatu, nayo yakawa yena wana wanji walume na we cicekulu. 17Mahalaleli yakafwa yena myaka magana munana na makumi yicenda na mihano, yo wikale wakwe wa mono'nze.

18Nayo Yaledi, lono yali yaficila myaka yigana limonga na makumi mutandatu na myejete, yakamulela Enoci. 19Nayo yali yeza kumulela Enoci, mwene Yaledi yakekala kanyhi myaka magana munana, nayo yali yena wana wanji we cilume na we cicekulu. 20Yaledi yakafwa yena myaka magana yicenda na makumi mutandatu na myejete, yo wikale wakwe wa mono'nze. 21Nayo Enoci, lono yali yaficila myaka makumi mutandatu na mihano, yakamulela Metusela. 22Nayo yali yeza kumulela Metusela, mwene Enoci, yakekala kanyhi myaka magana madatu, akuno vili hamonga no Mulungu. Nayo yakawa yena wana wanji we cilume na we cicekulu. 23Nayo Enoci yekala myaka magana madatu na makumi mutandatu na mihano yose hamonga. 24Nayo vikajendana no Mulungu mu vilo vyakwe vyose, hanyuma yakahama hamba kwijela kanyhi. Hambi u Mulungu nha yamusola.

25Nayo Metusela, lono yali yaficila myaka yigana limonga na makumi munana na mupunghati, nayo yakamulela Lameci. 26Nayo yali yeza kumulela Lameci, mwene Metusela yakekala kanyhi myaka magana mupunghati na makumi munana na myejete, nayo yakawa na wana wanji we cilume na we cicekulu. 27Nayo Metusela yakafwa yena myaka magana yicenda na makumi mutandatu ne'cenda, yo wikale wakwe wa mono'nze. 28Nayo Lameci, lono yali yeza kuficila myaka yigana limonga na makumi munana na myejete, nayo yakamulela mwana wa cilume. 29No mwana yuyo, Lameci yakamucemela litagwa lya Noha, akuno yakutya, “U mwana yuyuno, yo kocisindamika mu milimo yetu mizito, yono cetuma kwe miwoko yetu, mono yisi yiyino yono u Mulungu yayilijita.” 30Nayo Lameci yali yeza kumulela Noha, mwene Lameci yakekala kanyhi myaka magana mahano na makumi yicenda na mihano, nayo yakawa na wana wanji we cilume na we cicekulu. 31Nayo Lameci yakafwa yena myaka magana mupunghati na makumi mupunghati na mupunghati, yo wikale wakwe wa mono'nze. 32Nayo Noha, lono yali yaficila myaka magana mahano yo wikale wakwe, yakawalela wa Semu na Hamu na Yafeti.

Currently Selected:

Mwamulizo 5: LLKWW

Highlight

Copy