Mwamulizo 6

U wubi we wanhu

1I wanhu wali weza kuwa wonjelezeka mono'nze, sunga ne wana we cicekulu wonjelezeka kulelwa kuwa wenji, 2viwumbwa vya kucanyha, vikawawona wawo wana we cicekulu we wanhu vyono waswanu, navyo vikawatola wose wono viwendile. 3Nayo u Muwaha Mulungu yakatya, “U Muhe wangu si vyoswa vikulewana no munhu cibitilila, hambi mwene nha muwili du. Holeka i myaka yakwe yo wikale wakwe mono'nze, si yociza myaka yigana limonga na makumi mejete yaye.” 4Mu vilo vivilya, sunga na hanyuma yayo, kwali kogali manhu mono'nze, gono galelwa ne viwumbwa vya kucanyha ku wana we cicekulu we wanhu. Wawo wo wali wanhu we vilungo muno, kanyhi wakawa ne lilumbo yiwaha muno mu vilo vivyo. Ne wanhu wawo wacemwaga “Wanefili.”

5Nayo u Muwaha Mulungu, yaza kuwuwona u wubi we wanhu mono'nze, na vyono i lihala lye mahweso ga mu zinhumbula zawo, likalaga yibi du nhondo zose, 6u Mulungu yakakalala muno muno so kumuwumba u munhu mono'nze. U Muwaha Mulungu yakakalala muno muno mu nhumbula yakwe. 7Holeka yakatya, “Hodu, nomuwusiza lukulu mono'nze, u munhu mono namuwumba, ne vilimu, ne vitambala hasi, hamonga ne zindeje za mu mbago. Nghukalala muno muno no kwihwesa vyono, ku sokoci nawawumba no kuwawika mono'nze.” 8Ninga u Mulungu yakendezwa na Noha.

Kuli za Noha

9Awuno wo wityatye we zinghani za Noha. Yuyo Noha yo yali yo munhu mono yali yali ling'ani du yali wene, mono yali yasina yilema mu wikale wakwe. Noha vyawezanaga hamonga no Mulungu. 10Nayo Noha yali yena wanagwe wadatu, nha cinji yali Semu, Hamu na Yafeti. 11U Mulungu yakayiwona yinze vyono yali yahodanjika muno muno, no kumema wugazi. 12Heya, u Mulungu yakayilanga yinze, nayo yakayiwona vyono yawa yihodanjice, hambi i wanhu wose nha weza wali mu mikalile mibi. 13Holeka u Mulungu yakamulonjela Noha yakatya, “Nakondya kulamula, niwamale wanhu wose, hambi nha wayimemya yinze yose no wugazi wawo. Heya, nowongomezeza lukulu, hamonga ne yinze yose! 14Holeka agwe lu, winozezaje Safina ko mubici we nghulunje. Wuvigawanule vyumba mugati yayo, no kuyihiliwa lami mugati na kunze yayo. 15Nagwe yiyo Safina, wuyinozaje nhavi, u wutali wayo, wuweze mita yigana limonga na makumi madatu ne'cenda, no wugazi wayo, wuweze mita makumi mejete na yihano, no wima wayo wuweze mita yikumi na yihano. 16Safina yiyo, yiweze na golofa yidatu, zono zina no mulango ha lubavu lwayo. Wuyinozezaje ne litembe, hanyuma wulece cilejeho ca nusu mita nhavi hagati ye litembe ne dali yayo. 17Nane noleta lihwazi yiwaha lye malenga, ho sume kuvyongomezeza lukulu i viwumbwa vyose vyumi vyono vili mono'nze. Ne viwumbwa vyose vyofwila lukulu. 18Ninga nonoza cilagane hagati yangu na gwegwe. Agwe kokwinjila mugati mu Safina, agwe hamonga no mugolece wako, hamonga ne wanago wose ne wagolece zawo. 19Nagwe kovinjiza mu Safina ne vilimu vye mawala gose, kovinjiza vyejete vyejete, cilume ne cicekulu, ho vikale vyumi hamonga na gwegwe. 20Nagwe kozinjiza ne zindeje zono zikwanga mucanyha, ze mawala gose, hamonga ne vilimu vye mawala gose, ne mawala gose ge viwumbwa vyono vitambalaga hasi, vyose vivyo, kovinjiza vyejete vyejete, ho wusume kuvikamisa vyumi. 21Kanyhi wusoleleze ne zindigwa ze mawala gose, wuzikamise so ndigwa yenyu, hamonga na ye viwumbwa vyose vyono wina navyo mumo mu safina.” 22Nayo Noha yakazinoza zose, nha vyono Muwaha Mulungu yamulajiliza.

Currently Selected:

Mwamulizo 6: LLKWW

Highlight

Copy