Okuruga 21

Amateka g'abairu

(Obw 15:12-18)

1“Egi niyo migenzo ey'oraha Abaisiraeli. 2Orwo omuntu oligura omwiru Omuheburania, akukolere emyaka mukaga, ogwa mushanju agende ataina kyo ayechungwize. 3K'araija ali wenkai agende ali wenkai. K'alija yashweire yaseire aho omukaziwe agende nawe. 4Ka mukamawe alimuha omukazi mara omukazi ogwo akamuzalira abojo anga abaisiki, omukazi n'abanabe baliba ba mukamawe, wenene aligenda wenkai. 5Kyonkai omwiru ogwo k'aligamba akature ati, ‘Inye ningonza mukama wange, omukazi wange n'abana bange, tindikugenda,’ 6aho mukamawe amutware mbali balikufukamira Ruhanga, aha rwigi anga aha muzilingiti, amwiguze empindu okutwi; aho amukolere oburorabwe bwona.

7“Orwo omuntu aliguza omuhara omu buzana, ogu obuzana ataliburugamu nk'okwo abairu baruga mu bwiru. 8K'aliba atashemeleire mukamawe alishangwa amuligiire aho mukamawe ogwo amuleke achungurwe; kandi atalimuguza aha munyamahanga orwo yamujangwire. 9K'omuntu aligura omuzana kumuha omutabani kumushwera, amubone nk'omuhara. 10K'omuntu alishwera omukazi wa kabili agendelere kuha mukaziwe ekyakulya n'ebijwaro n'okumuralira nk'obubere. 11K'aliba atamukoleire bintu ebyo byonshatu, amutaishure agende mara atamwendize mpiha.

Amateka g'obwita muntu

12“Weena wena alitera omuntu akamwita nawe bamwite. 13Kyonkai k'aliba yashangwa atamuzimbiire, akamwita atamugendeleire, aho ndakwoleka mbali omuntu ogwo aliirukira. 14Kyonkai omuntu k'alita ondijo amugendeleire amurabire omu magezi, ogwo omw'ihye ahali ealutare yange bamwite.

15“Weena wena alitera ishe anga nyina, bamwite.

16“Buli omoi aliiba omuntu, n'orwo aliba yamugulize anga akaboneka ainawe, bamwite.

17“Omuntu wena alikeena ishe anga nyina, bamwite.

18“Orwo abantu balirwana, omoi akatera ondijo eibare anga entomi, kiterwa atafire kyonkai akashega, 19ahanyuma akaimukamu akakwata ensiso akagendagenda aheru aho olinya alishangwa amuteire talikwatwa mushango, ekiliho alihe ebirobye ebimufeleire, kandi amutambize kurungi.

20“K'omuntu alitera omwiruwe anga omuzanawe enkoni, omwiru anga omuzana ogwo akamugwa omu mikono, ahabwe ekibonabonyio. 21Kyonkai k'omwiru alimaraho ekiro kimoi anga bibili, mukamawe talihabwa kibonabonyio; aha rw'okuba ogu mwiru akamugura.

22“Orwo abashaija balirwana bakahutaza omukazi aina enda akagoba aha kuginaga kyonkai hatabaireho kabi kashagireho, ogwo ayamuhutaza bamuteho endihi eyo iba omukazi aliramura. Ashashure nk'okwo abaramuzi baliramura. 23K'omukazi wenene alihutara, aho aliba amuhutaize ayehorwe: 24Elisho liihwa linu, elino liihwa linu, omukono gwihwa gunu, ekilenge kiihwa kinu, 25amahya gaihwa ganu, orubare rwihwa runu, orushanju rwihwa runu.

26“K'omuntu litera omwiruwe anga omuzanawe elisho, akalita, amutaishure agende aha rw'elisholye elyafa. 27Kandi k'alimutera elino akalikura, abe mwiru anga muzana, amutaishure agende aha rw'elinolye elyakuka.

Ente kuhutaza omuntu

28“Orwo ente elichumita omuntu yaba mushaija anga mukazi akafa, ente egyo bagiteze amabare, kandi enyama yayo etalilibwa, kyonkai mukama wayo talikwatwa mushango. 29Kandi k'ente eliba emanyiire kuchumita kwema karai, na mukama wayo bamugambire kyonkai tiyagikoma, ekaija ekaita omuntu yaba mushaija anga mukazi, bagiteze amabare na mukama wayo kwakwo bamwite. 30Kabalimuchwa eky'okwechunguza aho agire kyona kyona ekyo balimuchwa kwechungura. 31K'elichumita omwana w'omuntu yaba mwojo anga mwisiki, bamukore kuhonderana n'eiteka lyonene lyonene eli. 32K'ente elichumita omwiru anga omuzana, mukama wayo ahe mukama wabo eshekeli makumi gashatu z'efeza, kandi ente bagiteze amabare.

33“K'omuntu alisiga ekina kyashamire, anga akakilima atakishwekire, mara ente anga endogobe ekakigwamu, 34mukama w'ekina ekyo alihe, ahe mukama w'ekitunganwa empiha, ekitunganwa ekyafa kibekye.

35“Orwo ente y'omuntu elihutaza ey'ondijo, n'okufa ekafa, aho baguze ente elikurora babegane eiguzi lyayo; n'ekitunganwa ekyafa kwakwo bakibegane. 36Anga kakiliba nikimanyika okwo ente emanyiire kuchumita kwema karai mara mukama wayo atagikomire, ente aragiliha ente, ekitunganwa ekyafa kibekye.

Currently Selected:

Okuruga 21: RHAY01

Highlight

Compare

Copy