Okuruga 26

Ekiikaro n'entimbe zakyo

(Oku 36:8-38)

1“Kandi okore ekiikaro n'entimbe ikumi z'empuzi za kitani enungi ezogosirwe n'eza kibururu na zambarau n'ezilikutukura. Ozishukirane n'abakerubi omu bubuya. 2Oburai bwa buli rutimbe bube bw'emita ikumi na ibili, n'obukika bw'emita ibili. Entimbe zona zigire ekipimo kimoi. 3Entimbe itanu ziteranisibwe hamoi; n'entimbe eitanu ezindi ziteranisibwe hamoi. 4Kandi oshuke emiguha ya kibururu aha mukugiro gw'orutimbe orw'aheru omu seti ya mbere; kandi oshube oshuke emiguha aha mukugiro gw'orutimbe orw'aheru omu seti ya kabili. 5Oshuke emiguha makumi gatanu aha rutimbe orumoi, kandi okore emiguha makumi gatanu aha mukugiro gw'orutimbe orw'omu seti ya kabili; emiguha elebangane. 6Mara oshuke emiguha makumi gatanu y'ezahabu, entimbe ozikwatanise n'emiguha egyo, ekiikaro kibone kugobelera.

7“Kandi eihema elili eiguru y'ekiikaro olikolere entimbe ikumi na rumoi z'obwoya bw'embuzi. 8Oburai obwa buli rutimbe bube mita ikumi na ishatu, n'obukika bw'emita ibili. Entimbe zona ikumi na rumoi zigire ekipimo kimoi rumoi. 9Entimbe itanu oziteranise hazo, n'entimbe omukaga hazo. Kandi orutimbe rwa mukaga orutimbemu kabili omu maisho g'eihema. 10Okore emiguha makumi gatanu aha mukugiro gw'orutimbe orw'aha nzindo omu seti emoi n'emiguha makumi gatanu aha mukugiro gw'orutimbe orw'aha nzindo omu seti eya kabili.

11“Kandi okore ebifungo makumi gatanu by'omulinga, obite omu miguha, aho eihema oliteranise hamoi libone kuba kintu kimoi. 12Ekichweka ky'orutimbe ekisigaire aha ntimbe z'eihema, nikyo kichweka ky'eihema ekilikusigaraho, kilerembe eiguru enyuma y'ekiikaro. 13Omukono gumoi gw'orutimbe rw'obwoya bw'embuzi ogulikushaga aha rubaju oru n'oru, aha burai bw'entimbe z'eihema elerembe aha mbaju zombili z'ekiikaro. 14Mara okore eby'okushweka eihema omu mpu z'empaya z'entaama n'embuzi ezisisimwirwe.

15“Kandi ekiikaro okikolere emizilingiti elengeleire ey'omushita. 16Oburai bwa buli muzilingiti bube mikono ikumi, n'obukika bw'omukono gumoi n'enusu. 17Buli muzilingiti gw'ekiikaro gugire endimi ibili z'okugikwatanisa yona hamoi. Obe nikwo ogikora otyo. 18Ekiikaro okikolere emizilingiti: Orubaju rwa kasi mizilingiti makumi gabili; 19ahansi y'emizilingiti makumi gabili okoreho amachuba makumi ganai g'efeza; amachuba gabili ahansi y'omuzilingiti gumoi aha rw'endimi zagwo eibili; n'amachuba gabili ahansi y'omuzilingiti ogundi aha rw'endimi zagwo eibili. 20Kandi omu rubaju rwa kabili rw'ekiikaro, orwa bikara habeyo emizilingiti makumi gabili, 21n'amachuba gayo makumi ganai g'efeza, amachuba gabili ahansi y'omuzilingiti gumoi n'amachuba gabili aha muzilingiti ogundi; 22kandi enyuma y'ekiikaro obugwaizoba oteyo emizilingiti mukaga. 23Enyuma y'ekiikaro aha pembe zakyo oteho emizilingiti ebili, 24ahansi etaishukane kyonkai eiguru eteranisibwe aha kifunga kya mbere. Emizilingiti yombili ekore epembe ibili. 25Ebe mizilingiti munana, hamoi n'amachuba gayo ikumi na mukaga g'efeza. Amachuba gabili ahansi y'omuzilingiti gumoi, n'amachuba gabili ahansi y'omuzilingiti ogundi.

26“Okore embanda z'omushita, itanu aha rw'emizilingiti y'orubaju orumoi rw'ekiikaro, 27n'embanda itanu aha rw'emizilingiti y'orubaju orundi rw'ekiikaro, n'embanda itanu aha rw'emizilingiti y'orubaju rw'ekiikaro enyuma omu bwolekera bw'oburugaizoba. 28Orubanda orw'omugati y'emizilingiti rurabiremu kimoi kwema aha nzindo egi kugoba nzindo eli. 29Emizilingiti ogisiige ezahabu, n'ebifungo byayo eby'okukwata embazi obikoze ezahabu; n'embanda ozisiige ezahabu. 30Ekiikaro okisimbe kuhonderana n'enkora yakyo eyo nkwolekire aha ibanga.

31“Kandi okore orutimbe rw'empuzi za kibururu, zambarau n'ezilikutukura na kitani enungi eyogosirwe, rukoleranwe n'abakerubi omu bubuya. 32Oruhanike aha nyomyo inai ez'omushita ezisiigirwe ezahabu, rwina ebifungo by'ezahabu, enyomyo zibe zili aha machuba ganai g'efeza. 33Oruhanikise ebifungo, mara olete esanduku y'endagano ogite omu rutimbe orwo orulikutaishurana ahatakatifu n'ahatakatifu muno. 34Oteke entebe y'obuganyizi eiguru y'esanduku y'endagano ahatakatifu muno. 35Oteke emeza enjai y'orutimbe, n'ekinara aha rubaju rwa kasi rw'ekiikaro omu maisho g'emeza, kandi emeza oragiteka rubaju orwa bikara.

36“Orwigi rw'eihema orukolere orutimbe rw'empuzi za kibururu na zambarau n'ezilikutukura na kitani eyogosirwe, orutimbe rufumwe. 37Orutimbe rwonene oru orukolere enyomyo itanu z'omushita mara ozisiige ezahabu. Ebifunga byazo bibe by'ezahabu, mara ozitereho amachuba gatanu g'omulinga.

Currently Selected:

Okuruga 26: RHAY01

Highlight

Compare

Copy