Okuruga 30

Alutare y'okwoteraho obunuma

(Oku 37:25-28)

1“Okore ealutare y'okwoteraho obunuma; ogikoze omuti gw'omushita. 2Egire oburai n'obukiika nk'enusu mita, eiganirane embaju zona. Egire obwemi bw'emita nk'emoi, mara ekoleranwe n'amahembe gayo. 3Kandi eiguru n'omu mbaju obuzingora n'amahembe gayo ogasiige ezahabu enchenkure. Mara ogizingoze omukugiro gw'ezahabu. 4Ogikolere ebifunga bibili by'ezahabu; oshube obikome ahansi y'omukugiro oku n'oku. Bibe by'okutahyamu emigamba y'okugitwaza. 5Emigamba ogikoze omushita, omare ogisiige ezahabu. 6Ogiteke omu maisho g'orutimbe oruli bwatana aha sanduku y'endagano n'omu maisho g'entebe y'obuganyizi eiguru y'esanduku y'endagano egyo, mbali ndateraniraga naiwe. 7Buli bwankya orwo Aroni araijaga kushemeza etara, ealutare egyo agyotereho obunuma. 8Na bwaigoro orwo yaija kuhemba etara abwotere. Ebiro ba byona omu makiro agalija murampongeraga obunuma. 9Mutaligihongeraho bunuma bulikuzira, anga kihongo ky'okwokibwa, nangu n'ekihongo ky'emyaka; mara mutaligisheshaho kihongo kya kunywa. 10Amakiro gona limoi omu mwaka Aroni agihasilire. Akwate obwamba bw'ekihongo ky'enyatano y'mafu abusiige amahembe gayo. Alutare egi y'Omukama ntakatifu muno.”

Omushoro gw'eihema ly'omuterano

11Omukama agambira Musa ati, 12“Orwo orabara Abaisiraeli, buli omoi agire eky'okwechunguza akimpe, otaija okaba nobabara bakaterwa kibundo. 13Buli omoi arabarwa agire enusu y'eshekeli kuhonderana n'eshekeli y'ahatakatifu, bagimpongere. Eshekeli nizo gera makumi gabili. 14Kaishe muntu ow'okwema emyaka makumi gabili n'okutemba, arabarwa, ampongere ekihongo. 15Abatungi batagira bingi kushaga, n'aboro batagira bike kushaga. Orwo mulikugira ekihongo ky'okweyatilira mumpongere enusu y'eshekeli. 16Oshoroze empiha ezi omu Baisiraeli ezo baragira kweyatilira, ozikoze omuruka gw'eihema ly'omuterano. Omushoro ogu Abaisiraeli baragugira kweyatilira, kandi nanye aho ndaijuka kubalinda.”

Orunabiro rw'omulinga

17Omukama agambira Musa ati, 18“Okore orunabiro rw'omulinga embunu yarwo ebe y'omulinga. Oruteke omugati y'eihema ly'omuterano na ealutare. Orutemu amaizi, 19ago Aroni n'abatabani baranabaga emikono n'amaguru 20orwo baraijaga kutaha omw'ihema ly'omuterano anga kugya ealutare kumngera kuntambira ekihongo ky'okwokibwa. 21Banabega emikono n'amaguru batalija bakafa. Ekiragiro eki bakikwate na baijukuru babo ebiro byona.”

Amajuta g'okwesiiga

22Kandi Omukama agambira Musa ati, 23“Okwate ebirungo ebirungi muno: Mira ey'amaizi eshekeli 500 n'omudarasini ogwina akoya karungi enusu y'ekipimo eki, nikwo kugamba oti eshekeli 250 mwatanu, na kane elikutamirana ey'eshekeli 250, 24n'eshekeli 500 eza kasiya kuhonderana n'eshekeli y'Ahatakatifu, n'elita inai z'amajuta g'omuzeituni. 25Byona ebi obikoremu amajuta gatakatifu ag'okwesiiga nk'agakozirwe omukozi w'amarasi. Garaba majuta agatakatifu ag'okusiiga. 26Ogasiige eihema ly'omuterano n'esanduku y'endagano, 27n'emeza hamoi n'ebikwato byayo byona, n'ekinara ky'etara hamoi n'ebikwato byakyo, na ealutare y'obunuma, 28na ealutare y'okwokezaho ebitambo n'ebikwato byayo byona n'orunabiro n'embunu yarwo. 29Obihe omugisha, bibe bitakatifu muno. Kyona kyona ekilibikoraho kiliba kitakatifu, 30kandi okore Aroni n'abatabani amajuta, obatendeke babe bakuhani bankolere. 31Ogambire Abaisiraeli oti, ‘Aga ebiro byona galiba majuta gange agatakatifu ag'okusiga. 32Gatalisheshwa ha bantu ba buli kiro, nangu mutaligira gandi ago mwatoba nka gonene. Ago gatakatifu, mara mumanye okwo gali gatakatifu. 33Weena wena alikora agalikugashusha, anga aligasiiga atali mukuhani, aliba atakili muntu wange.’ ”

Obunuma

34Omukama agambira Musa ati, “Okwate ebirungo ebilikutamirana: Natafi, shekelesi na kelibena, hamoi n'obunuma oburungi, byona bibe bina ekipimo kimoi, 35okore obunuma nk'obukozirwe omubuya w'amarasi. Oburungemu omwonyu, bubone kwikarage mara bube butakatifu. 36Ogire obwo wasaho bukoroba muno, obuteke omw'ihema ly'omuterano mbali turateranira. Obumamilire omu maisho g'esanduku y'endagano; obunuma obu mumanye okwo buli butakatifu muno. 37Kandi obunuma obwo olirunga oti otaliburunga kabuba bwawe. Omanye okwo buli butakatifu mara bw'Omukama. 38Wene wena aliburunga ati nk'amarasi, ogwo aliba atakili muntu wana.”

Currently Selected:

Okuruga 30: RHAY01

Highlight

Compare

Copy