Okuruga 31

Ababuya b'eihema ly'Omuterano

(Oku 35:30–36:1)

1Omukama agambira Musa ati, 2“Lea, nayeta Bazaeli eya Uri, Uri eya Huri, ow'oruganda rwa Yuda. 3Namwijuza Mwoyo wa Ruhanga, n'obushobora n'amagezi, n'obumanyi n'obubuya bwona. 4Atekeleze emilimo y'obubuya, kuhesha ezahabu, efeza n'omulinga, 5kubaija amabare g'okulengya, kubaija emiti, akore omulimo gwa buli kabuya. 6Namuronda na Oholiabu eya Ahisamaki, ow'oruganda rwa Dani. Kandi abantu bona ababuya, nabaha obubuya babone kukora ba ebyo nakuragira: 7Eihema ly'Omuterano, n'Eisanduku y'Endagano, n'entebe y'obuganyizi eli eiguru yayo, n'ebikwato by'eihema byona, 8emeza n'ebikwato byayo, ekinara ky'etara ky'ezahabu enchenkure n'ebikwato byakyo byona, na ealutare y'obunuma, 9na ealutare y'ekihongo ky'okwokibwa n'ebikwato byayo byona n'ebinika n'ekibunu kyayo, 10n'ebijwaro ebikozirwege, ebijwaro bitakatifu ebya Aroni omukuhani, n'ebijwaro by'abatabani eby'eikora lyabo ly'obukuhani, 11n'amajuta g'okusiiga n'obunuma bw'omugaju bw'ahatakatifu. Byona babikore nk'okwo nkuragiire.”

Ekyosi kya Sabato

12Omukama agambira Musa ati, 13“Ogambire Abaisiraeli oti, ‘Mwekomye Sabato zange, aha rw'okuba aka kabonero ahali inye na inywe omu mizarwa yanyu, mumanye okwo inye Omukama mbahindwire bantu bange. 14Mwekomye Sabato, mumanye okwo eli ntakatifu. Buli omoi aragihagazaga bamwite. Aragikoleragamu omulimo gwona gwona, ogwo aliba atakili wange. 15Emilimo ekorwe ebiro mukaga, ekiro kya mushanju ni Sabato, kiro kitakatifu ky'Omukama ky'ekyosi. Alikora omulimo gwona gwona aha kiro kya Sabato bamwite. 16Aha rw'ekyo Abaisiraeli ebiro byabo byona bekomeleze Sabato, egyo ndagano y'eirai lyona. 17Kabonero eirai lyona ahali inye n'Abaisiraeli okwo natonzire eiguru n'ensi omu biro mukaga, ekya mushanju nahumura, naikya.’ ”

18Kayabaire yamazire kugamba na Musa aha Ibanga lya Sinai, yamuha embengo ibili z'amabare, ezo wenene Ruhanga yayehandikiireho emihango.

Currently Selected:

Okuruga 31: RHAY01

Highlight

Compare

Copy