Okuruga 32
32
Ebuguma y'enumi y'ezahabu
1Orwo abantu baboine okwo Musa yakelererwa kuruga aha ibanga, bahurulira Aroni, bamugambira bati, “Imuka otukolere baruhanga abaratwebembera; kuba Musa ogu omushaija ayatwihire Misiri titulikumanya gamubaireho.” 2Aroni abagambira ati, “Mujure bakazi banyu, batabani banyu na bahara banyu eheleni z'ezahabu aha matwi muzindetere.” 3Kityo abantu ba bajura eheleni z'ezahabu ezabaire zibali aha matwi baziletera Aroni. 4Abatora ezahabu agijuguta, agibaija n'epatasi, akora enyana. Bagamba bati, “Isiraeli, ogu niwe ruhanga wawe akwihire Misiri!” 5Orwo Aroni yaboine byaba bityo ayombeka ealutare omu maisho gayo. Arangira abantu ati, “Nyenkya kiraba kiro kikuru ky'Omukama.” 6Bukeire abantu baimuka karai, bahonga ebihongo by'okwokibwa, bagira n'ebihongo by'emilembe. Bashuntama ahansi balya, banywa, baimuka bazina.
7Aho Omukama agambira Musa ati, “Songoka, aha rw'okuba abantu bawe abo waihire Misiri, bahemuka. 8Baruga bwangu omu muhanda ogwo nabaragiire. Bajuguta enyana bagifukamira, bagitambira n'ebitambo, nibagamba bati, ‘Isiraeli, ogu niwe ruhanga wawe, akwihire Misiri!’ ” 9Aho Ruhanga agambira Musa ati, “Nabona okwo abantu aba, bagumangaine emitima. 10Mbwenu aha rw'ekyo ondeke mbanigalire mbamareho. Kyonkai iwe ndakuhindura ihanga lihango.”
11Nawe Musa atagiliza Omukama Ruhangawe, ati, “Waitu Mukama, kubaki nonigalira abantu bawe abo oihire Misiri n'obushobora bungi? 12Kubaki Abamisiri bagambe bati, ‘Akabaihisayo omugendelero gubi, kubaitira omu mabanga, akabamara omu nsi?’ Leka kunigara kubi, leka kwendera abantu bawe enaku. 13Ijuka Aburahamu, Isaka na Isiraeli, abairu bawe abo iwe wenene wayenahirire oti, ‘Ndikanyisa oruzaro rwanyu nk'enyanyinyi z'aha iguru, n'ensi egi yona eyo naragaine ndigiha baijukuru banyu bagilye eirai lyona.’ ” 14Omukama agarulira abantube, aba atakibakora kubi nk'okwo yabaire atekeleize.
Musa nayata embengo z'emihango
15Musa ahinduka, asongoka eibanga ashutwire embengo zombili z'emihango omu mikono, zihandikirwe embaju zombili, oku n'oku. 16Embengo zikakorwa Ruhanga wenene, mara niwe yazihandikireho emihango egyo. 17Orwo Yoshua yahuliire okwo abantu bayomba bakashana, agambira Musa ati, “Omu rusisira halimu eyombo y'endashana.” 18Musa agamba ati, “Ti yombo ya kwashana rwa kusinga anga kuchura rwa kusingwa, amaraka gondikuhulira g'okuzina.” 19Orwo Musa yagobire ati ensisira, akabona enyana n'amayaga, anigara muno, achwisa embengo omu mikono, azijugunya azatira omu kibazi ky'eibanga. 20Akwata enyana eyo babaire bakozire agyokya n'omuliro, agisa agisasanura, agimamilira omu maizi, amaizi ago aganyoisa Abaisiraeli.
21Abaza Aroni ati, “Abantu aba bakukoleireki kubazalira eihano lihango liti?” 22Aroni ahorora ati, “Mukama wange otatamwa muno. Iwe nomanya okwo abantu aba bali babi. 23Bangambiire bati, ‘Otukolere baruhanga batwebembere; aha rw'enshonga Musa ogu, omushaija atwihire Misiri titulikumanya gamubaireho.’ 24Inye mbagambira nti, ‘Buli omoi aina ezahabu agijure.’ Aho bagimpa nginaga omu muliro harugwamu enyana egi.”
Ekihika ky'Abalevita
25Musa abona okwo Aroni alekire embaga kushenga bakeshonaza omu maisho g'ababisha babo. 26Aho ayemelera omu kihigi ky'orusisira, abaza ati, “N'ohai alikugwera rubaju orw'Omukama? Ija owange!” Abalevita bona bahurura bamugoba. 27Abagambira ati, “Omukama Ruhanga wa Isiraeli nagamba, ati, ‘Buli muntu ayekome embandaye aha itako, ayeme kihigi eki agobe kihigi kili, aite abarumuna, banywanyibe na abatahibe.’ ” 28Abalevita bagira okwo Musa yabagambira. Kir'ekyo abantu bafaho nk'enkumi ishatu. 29Musa agambira Abalevita ati, “Kir'eki mwayehonga kuba bakuhani kukolera Omukama orwo buli omoi yaita omutabani n'omurumuna, kityo Omukama yabaha omugisha.”
Musa natonganira embaga
30Bukeire Musa agambira abantu ati, “Mukozire entambara mpango. Mbwenu ndatemba ow'Omukama, rundi nakwatilira entambara yanyu egyo.” 31Kityo Mua agaruka ow'Omukama, agamba ati, “Ai bambi, abantu aba bakozire entambara mpango, bakora ruhanga w'ezahabu. 32Mbwenu osinge obagaruliire entambara yabo egyo. Kakitali kityo nintagiliza banfute omu kitabo kyawe ekyo ohandikiremu amabara g'abantu bawe.” 33Kyonkai Omukama amugambira ati, “Weena wena anfakaliire ndamufuta omu kitabo kyange. 34Mbwenu ogende, otware abantu mbali nkugambire. Omumalaika wange aragenda akwebembeire. Hamoi n'ebyo ekiro ekyo ndaija ndababonabonyia aha rw'entambara yabo egyo.”
35Omukama asindikira abantu ekibundo enshonga bakagimba Aroni kubakolera enyana.
Currently Selected:
Okuruga 32: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
