Okuruga 33
33
Abaisiraeli nibaruga Sinai
1Omukama agambira Musa ati, “Oimukye oruge hanu, iwe n'abantu abo waihire omu nsi ya Misiri, ogye omu nsi eyo nanahiliire Aburahamu, Isaka na Yakobo, ningamba nti, ‘Ndigiha abana bawe.’ 2Ndatweka omumalaika akwebembere, mara ndabinga Abakanaani, Abaamori, Abahiti, Abaperizi, Abahivi n'Abayebusi. 3Otembe ogye omu nsi elikusheshekana amata n'obwoki. Kyonkai tindikugenda na inywe, ntakwija nkabamalira mu muhanda, ahakuba muli bantu abagumangaine emitima.”
4Orwo abantu bahuliire amakuru gabi aga bachura, kandi taliho n'omoi yajwete milengyoye. 5Aha rw'enshonga Omukama akaba agambire Musa kugambira Abaisiraeli ati, “Inywe muli bantu abagumangaine emitima. Kanakuzizaho kugenda na inywe nakubamaraho. Kityo mujure emilengyo yanyu nyije manye ekyo ndabakora.” 6Abaisiraeli bajura emilengyo yabo, kubandiza aha Ibanga lya Horebu n'okugendelera.
Eihema ly'obusinge bw'Omukama
7Musa yakwataga eihema alitera enjai y'orusisira, harai kuruga aha rusisira orwo. Akalyeta Ihema ly'Omuterano. Buli muntu ayahigaga Omukama yashohoraga agya aha Ihema ly'Omuterano elyo elyabaire lili enjai y'orusisira. 8Orwo Musa yaturukaga kugya aha Ihema, abantu bona bemelera, buli omoi ayemelera aha rwigi rw'eihemalye, ahondeza Musa amaisho alemwa ataha omw'ihema. 9Orwo Musa yatahaga omw'ihema enyomyo y'ekichwi esongoka, eyemelera aha rwigi rw'eihema elyo, aho Omukama afumora nawe. 10Orwo abantu boa babonaga enyomyo y'ekichwi eyemeleire aha rwigi rw'eihema, bayemeleraga bafukama, buli omoi ayemire aha rwigi rw'eihemalye. 11Oku nikwo Omukama yafumoraga na Musa nibabonangana, nk'okwo omuntu afumora na munywanyiwe. Orwo Musa yagarukire omu rusisira, omwiruwe Yoshua, omusigazi mutabani wa Nuni, tiyarugaga mw'ihema elyo.
Ruhanga naragana kwikara n'abantube
12Musa agambira Omukama ati, “Lea nongambira oti, ‘Otware abantu aba,’ kyonkai tokamanyisize ow'orantuma nawe. Mara ogambire oti, ‘Ninkumanya eibara kandi kwakwo nonshemelera.’ 13Mbwenu nu ninkutagiliza, kandaba ninkushemelerakwo, ongambire eby'olikwenda, mbone kukukolera n'okukushemeleza. Ekindi omanye okwo eihanga eli lili ihanga lyawe.” 14Omukama agamba ati, “Ndagenda naiwe, kandi ndakuha okusinga endashana.” 15Musa amugambira ati, “K'oraba otagende nanye, hanu aha otatwihyaho. 16Omuntu yakumanyira nkahai okwo inye n'abantu bawe tulikukushemelera? K'olikugenda naichwe ekyo nikyo kiratwahura omu mahanga agandi omu nsi.”
Musa aha ibanga
17Omukama agambira Musa ati, “Eki kyonene kyonene ekyo wagamba ndakikora, aha rw'okuba nonshemelera, kandi n'okukumanya eibara ninkumanya.” 18Musa agamba ati, “Ninkutagiliza banyoleke ekitinwa kyawe.” 19Omukama agamba ati, “Inye ndakukolera ebirungi byona omu maisho gawe, mara ndaranga eibara lyange ‘Mukama’ omu maisho gawe. Kandi owo ndagilira obufura ndamugilira obufura; n'owo ndaganyira ndamuganyira.” 20Kyonkai ashuba agamba ati, “Toina kumbona buso; aha rw'enshonga omuntu tiyakumbona akarora. 21Nawe leba aha rubaju rwange haliho omwanya mbali orayemelera. 22Orwo ekitinwa kyange kiraba nikihinguraho ndakuta omu rutanda rw'orwazi orwo, kandi ndakubunza omukono gwange kuhika orwo ndaba nahingwire. 23Aho ndakwihyaho omukono ombone omugongo; kyonkai obuso bwange tibuboneke.”
Currently Selected:
Okuruga 33: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
