Okuruga 34

Embengo z'emihango eza kabili

(Obw 10:1-5)

1Omukama agambira Musa ati, “Yasa embengo ibili z'amabare nk'eza mbere, nyije mpandikeho ebigambo ebibaire bili aha za mbere ezo, ez'oyasire. 2Bwankya obe wayetekatekire, otembe aha Ibanga lya Sinai aha mutwe, oije onyeyanjulire. 3Taliho muntu kukuhondera anga kugira mbali yazoka hona hona omw'ibanga. Na nte na ntaama zitakuliira mu kibazi kya ibanga elyo.” 4Kityo Musa ayasa embengo ibili nk'eza mbere. Aimuka bwankya karai atemba aha Ibanga lya Sinai, nk'okwo Omukama yabaire amuragiire, atwara n'embengo ibili z'amabare. 5Omukama asongoka omu kichwi, Musa ayemeleraho nawe, ahaisiliza eibara ly'Omukama. 6Omukama amuraba omu maisho agamba ati, “Omukama, Omukama, Ruhanga omuganyizi mara omufura, ti mwangu wa kunigara, aijwire ekisha n'obwesigwa. 7Abantu enkumi abagilira ekisha, abaganyira entambara n'ebyo bashobya. Kyonkai tindiburwa kubonabonyia bana ba baijukuru nimbatura entambara za baishebo kuturuka aha muzarwa gwa kashatu n'ogwa kanai.” 8Aho Musa arahuka ainika omutwe ahansi, afukama. 9Agamba ati, “Waitu Mukama, kandaba ninkushemelera, ninkutagiliza osinge tugende hamoi n'orwo tuli bantu abagumangaine emitima. Batugarulire entambara zaitu n'amafu gaitu, otubone okwo tuli bantu bawe.”

Okushubwamu kw'endagano

(Oku 23:14-19; Obw 7:1-5; 16:1-17)

10Omukama agamba ati, “Lea nakora endagano. Ninyija kukolera abantu bawe ebitangazo ebitakabonekaga mu nsi yona anga omw'ihanga lyona lyona. Kandi boa ab'oinabo barabona ekyo ndakora. Ekyo ndabakolera ky'okutinisa.”

11“Oyekomeleze ebyo ndikukuragira kir'eki. Orwo oliba notaha Kanaani ndigibingamu Abaamori, Abakanaani, Abahiti, Abaperizi, Abahivi n'Abayebusi. 12Olyelinda otalikora ndagano na banyansi bamwo, etalija ekakubera mutego. 13Okambure ealutare zabo, enyomyo zabo ozate, oteme na Ashera zabo. 14Otalifukamira ruhanga ondijo, aha rw'enshonga Omukama alikwetwa ‘Omunyaibuba,’ ni Ruhanga omunyaibubakwo. 15Otalikora ndagano na banyansi bamwo, otalija okafukamira baruhanga babo. Kabakukutambira ebitambo omuntu yakukuraliza olya aha bitambobye. 16Batabani bawe otalibashwelerera bahara babo. Enshonga abakazi abo kabakufukamira baruhanga babo, bakuhabisa batabani bawe nabo bafukamira baruhanga abo.”

17“Otalihesha bishushani bya baruhanga.”

18“Oyekomye ekiro kikuru ky'omukate ogutatumbisiibwe. Ebiro mushanju olyega omukate ogutatumbisiibwe, nk'okwo nakuragiire, aha kanya akatairweho omu mwezi gwa Abibu. Omu mwezi gwa Abibu nirwo warugiire Misiri. 19Buli muzigaijo, gwange na buli kitunganwa kyawe ekishaija, gwaba muzigaijo gwa nte anga ntaama. 20Omuzigaijo gw'endogobe oguchunguze omwana gw'entaama. K'oliba otaguchungwire oguhende ebikya. Batabani banyu emizigaijo mubachungure. Hataligira yanyija mu maisho ngaro zishai.

21“Ebiro mukaga okore emilimo, kyonkai aha kiro kya mushanju ohumure. Byaba biro bya kulima anga bya kugesha ohumure. 22Kandi olyekomeleza ekiro kikuru ky'amalimansi, orwo wabanza kugesha engano eya mbere, oyekomye n'ekiro kikuru ky'amagesha gona aha nzindo y'omwaka. 23Emirundi eshatu omu mwaka nketwa mushaija mwawe aije kunfukamira inye Omukama Ruhanga wa Isiraeli. 24Orwo ndiba nabingire amahanga omu nsi egyo orwo olikutahamu, ensi yawe egyo ndigihanguhya. Kandi omu biro bikuru bishatu ebyo taliho muntu alyegomba nsi yawe kugitabalira.”

25“Otalihonga bwamba bwa kitambo kyange hamoi n'omukate ogutumbisiibwe. N'ekitambo ky'ekiro kikuru kya Pasika otalikirazaho. 26Ebiraba bya mbere by'emyaka yawe eby'oyelize obitware omw'Omukama Ruhanga wawe. Otalichumba mwana gwa mbuzi mu mata ga nyinagwo.”

27Omukama agambira Musa ati, “Ohandike ebigambo ebi; kuba nibyo nakoleraho endagano naiwe na Isiraeli.” 28Aha ibanga Musa akaikarayo n'Omukama ebiro makumi ganai, ekiro n'omushana gwaho; tiyaliire kyakulya anga kunywa maizi. Mara ahandika ebigambo by'endagano, niyo mihango ikumi, aha mbengo ezo.

Musa naruga aha ibanga

29Orwo Musa yasongokire Eibanga lya Sinai, ashutwire embengo zombili z'emihango, akaba nayengelera obuso aha rw'enshonga akaba ashangirwe nafumora na Ruhanga; kyonkai ekyo tiyakimanyire. 30Orwo Aroni n'Abaisiraeli baboine nayengelera obuso, batina kumugoba. 31Kyonkai wenene Musa abeta; aho Aroni n'abebembezi b'enteko bagaruka, bamugoba, afumora nabo. 32Ahanyuma Abaisiraeli bamugoba, abaragira byona eby'Omukama yabaire afumoire nawe omw'ibanga lya Sinai. 33Orwo yamazire kufumora nabo ayebunda ekihundwi aha maisho. Kyonkai orwo yagyaga omw'ihema ly'omuterano omu maisho g'Omukama kufumora nawe yakijuraga kuhika orwo yaturukaga. 34Kandi orwo yaturukaga akagambira Abaisiraeli ebyo yaragirwa, 35babonaga okwo alikwengelera obuso, aho wenene ayeshubya ekihundwi aha buso kuhika orwo yashubagayo kufumora nawe na Ruhanga.

Currently Selected:

Okuruga 34: RHAY01

Highlight

Compare

Copy