Okuruga 35

Entwaza za Sabato

(Oku 39:32-43)

1Musa ahuruza enteko yona y'Abaisiraeli abagambira ati, “Ebi nibyo bigambo eby'Omukama yabaragira kukora. 2Emilimo ekorwe ebiro mukaga, kyonkai aha kiro kya mushanju mushemeze Sabato ntakatifu y'Omukama, kyosi. Weena wena alikikoleramu omulimo gwona gwona bamwite. 3Omu buturo bwanyu bwona mutalihembamu muliro aha kiro kya Sabato.”

Ebihongo by'eihema litakatifu

4Musa agambira enteko yona y'Abaisiraeli ati, “Eki nikyo kigambo eky'Omukama yaragira. 5Mumuhongere ekihongo. Weena wena araba ali mufura ahongere Omukama ekihongo ky'ezahabu, efeza n'omulinga; 6empuzi za kibururu na zambarau n'ezilikutukura na kitani nungi eyogosirwe, obwoya bw'embuzi; 7empu z'empaya z'entaama ezisisimwirwe, n'empu z'embuzi, embaho z'omushita; 8amajuta g'okuhemba, ebirungo by'amajuta g'okusiiga n'eby'obunuma bw'omugaju; 9amabare ga onikisi n'amabare g'okulengya efodi n'akendo k'aha kifuba.

10“Kandi inywena araba ali mubuya aije akore eby'Omukama yaragira: 11Ekiikaro n'eihema lyakyo, orutimbe rwakyo, engango zakyo n'emizilingiti yakyo, embazi zakyo, enyomyo zakyo n'embunu zakyo; 12esanduku n'emigamba yayo, entebe y'obuganyizi n'orutimbe rw'orusika; 13emeza hamoi n'emigamba yayo n'ebikwato byayo byona, n'Omukate gw'Obusinge, 14kwakwo n'ekinara ky'etara y'okuhemba n'ebikwato byakyo n'etara zakyo n'amajuta g'okuhemba. 15Akore ealutare y'okwotezaho obunuma n'emigamba yayo n'amajuta g'okusiga n'obunuma bulikutaimrana n'ekisika ky'orwigi aha rwigi rw'ekiikaro; 16ealutare y'ekihongo ky'okwokibwa n'akatimba kayo ak'omulinga, emigamba yayo n'ebikwato byayo byona, einabiro n'embunu yalyo, 17Akore n'ensiika z'emyendo ya nyakabuga, enyomyo zayo n'embunu zazo n'ekisika ky'ekihigi kya nyakabuga; 18engango z'ekiikaro n'eza nyakabuga n'emiguha yazo; 19n'enyambarwa ezishukirwege ez'okujwara kukora eikora ahatakatifu, ebijwaro bitakatifu ebya Aroni omukuhani, n'eby'abatabani eby'okujwara kukora emyoga y'obukuhani.”

20Aho enteko yona y'Abaisiraeli emurugaho egenda. 21Buli omoi ayatagasire akashemelerwa yaletera Omukama ekihongo ky'okukoza Eihema ly'Omuterano n'omu miginga yalyo n'eby'okukoza ebijwaro bitakatifu. 22Bona abagondize kukora batyo, abashaija n'abakazi kumoi, baleta eheleni z'aha nyindo n'ez'aha matwi, n'empeta z'emihuri n'ebangili, engeli zona za nyakantu ak'ezahabu, bahongera Omukama. 23Kandi buli muntu ayashangirwe aina empuzi za kibururu anga zambarau anga ezilikutukura anga kitani nyakabara anga obwoya bw'embuzi anga empu z'empaya z'entaama ezisisimwirwe anga empu z'embuzi, azileta. 24Bona ababaire nibashobora, bakahongera Omukama efeza anga omulinga. N'ayashangirwe aina omuti gw'omushita ogwakushoboire kugira omugasho gwona gwona, akaguleta. 25Abakazi ababaire baina obubuya bw'okushukisa emikono bakashuka empuzi za kibururu na zambarau n'ezilikutukura, bayogosha na kitani nungi bagileta. 26Bakakora n'empuzi ez'obwoya bw'embuzi. 27Abebembezi bakaleta amabare ga onikisi n'ag'okulengya efodi n'akendo k'aha kifuba; 28n'ebirungo n'amajuta g'okuhemba n'ag'okusiiga, n'ebirungo by'obunuma ebilikutamirana. 29Abaisiraeli bona abashaija n'abakazi Abaisiraeli, abagondize kugira batyo, bakaletera Omukama ebihongo by'okukoza omulimo ogwo yabaire aragiire Musa.

Ababuya b'Eihema ly'Omuterano

(Oku 31:1-11)

30Musa agambira Abaisiraeli ati, “Lea Omukama ayesire bweta Bezaleli eya Uri, Uri eya Huri ow'oruganda rwa Yuda. 31Yamwijuza Mwoyo wa Ruhanga, yamuha amagezi, okushobokerwa n'obumanyi na buli bubuya, 32kuzora okwo arakora emilimo y'obubuya, kuhesha ezahabu, efeza n'omulinga. 33Ashare amabare g'okulengya, abaije emiti, mpahosi akore omulimo gwa buli bubuya. 34Kandi amukyanwire kwegesa banu, bombili, wenene na Oholiabu eya Ahisamaki ow'oruganda rwa Dani. 35Abahaire amagezi gangi g'okukora buli ngeli y'omulimo ogukakorwa omubuya anga ow'akalyo anga omufumi akoza empuzi za kibururu na zambarau n'ezilikutukura na kitani nungi eyogosirwe.

Currently Selected:

Okuruga 35: RHAY01

Highlight

Copy

Compare