Okuruga 36

1“Bezaleli na Oholiabu n'abandi bona ab'Omukama yahaire obubuya n'okushobokerwa, abalikumanya kukora buli kantu akalikwetagwa kwombeka eihema litakatifu, bakore buli kantu nk'okwo Omukama yahangire.”

Egabo nizishagulirana

2Musa ayeta Bezaleli na Oholiabu n'ababuya abandi bona ab'Omukama yahaire obubuya mara ababaire nibaikiliza kujuna, abagambira kubanza eikora elyo. 3Abaha ebihongo byona by'obweyendezi ebyo Abaisiraeli babaire balesire kukoza elyombeka ly'Eihema litakatifu. Buli bwankya Abaisiraeli bagendelera kuleta ebihongo ebyo by'obweyendezi. 4Ahanyuma ababuya bona ababaire nibakora eikora elyo balirugaho, 5bagya bagambira Musa bati, “Ebintu eby'abantu balikuleta kukoza omulimo ogw'Omukama atuhangiire kukora byakanya byashagulirana.” 6Kityo Musa aragira kabaranga omu rusisira rwona bati, “Abe mushaija anga mukazi ataleta kihongo kindi eky'okwombekesa Eihema litakatifu.” Abantu batangwa batyo kuleta ebihongo ebishagireho. 7Ebintu ebyo babaire bainabyo, bikaba nibimara kukora omulimo ogwo gwona, n'okushaga.

Ekiikaro n'entimbe zakyo

(Oku 26:1-37)

8Ababuya ababaire nibamanya muno kukira abandi bakora ekiikaro ky'entimbe ikumi. Bakazikoza kitani nungi eyogosirwe n'empuzi za kibururu n'eza zambarau n'ezilikutukura, n'abakerubi abakozibwe obubuya. 9Oburai bwa buli rutimbe bukaba buli bw'emita ikumi na ibili, n'obukiika bwarwo buli bw'emita ibili. Entimbe zona zikaba zina ekipimo kimoi. 10Entimbe itanu ateranisamu orutimbe rumoi, n'entimbe ezindi itanu kutyo. 11Akora emiguha etanu ya kibururu aha mukugiro ogw'orutimbe orw'eiguru orw'eseti ya mbere, kutyo aba nikwo agira atyo aha mukugiro gw'orutimbe ogw'eiguru orw'eseti ya kabili. 12Aruka emiguha 50 agita aha rutimbe orumoi, n'emiguha 50 aha mukugiro gw'orutimbe orw'eseti ya kabili; emiguha ekaba eyolekeraine. 13Ashuba akora ebifungo by'ezahabu 50, aba nibyo ateranisa eseti zombili z'entimbe. Kityo ekiikaro kyona kiba kintu kimoi.

14Kwakwo akolera eihema elishwekire ekiikaro entimbe z'obwoya bw'embuzi. Akakora entimbe ikumi na rumoi. 15Oburai bwa buli rutimbe bukaba buli bw'emita ikumi na ishatu n'obukiika buli bw'emita ibili. Entimbe ikumi na rumoi zikaba zina orulengo rumoi. 16Entimbe eitanu akaziteranisa hazo, n'entimbe omukaga hazo. 17Aruka emiguha 50 agita aha mukugiro ogw'orutimbe orw'aheru orw'eseti emoi, n'emiguha 50 aha mukugiro ogw'eseti endijo. 18Ashuba akora ebifungo by'omulinga 50 eby'okuteranisa eihema hamoi kaliba kintu kimoi. 19Akolera eihema eky'okulishwekesa, eky'empu z'empaya z'entaama ezisisimwirwe n'empu z'embuzi.

20Aho akolera ekiikaro emizilingiti egorogokire ey'omushita. 21Oburai bw'omuzilingiti bukaba buli mita inai, n'obukika bwagwo nibushagamu enusu mita. 22Buli muzilingiti gukaba gwina endimi ibili ez'okugikwatanisa hamoi. Nikwo yakozire atyo emizilingiti yona y'ekiikaro. 23Rubaju orwa kasi akatayo emizilingiti 20. 24Yakora amachuba 20 g'efeza ahansi y'emizilingiti 20 egyo, amachuba gabili ahansi y'omuzilingiti gumoi aha rw'endimi zagwo zombili n'amachuba gabili ahansi y'omuzilingiti ogundi aha rw'endimi zagwo zombili. 25Rubaju rw'ekiikaro orwa kabili, orwa bikara akatayo emizilingiti 20, 26hamoi n'amachuba gayo g'efeza 40, amachuba gabili ahansi y'omuzilingiti gumoi n'amachuba gabili aha muzilingiti ogundi. 27Kandi enyuma y'ekiikaro obugwaizoba akatayo emizilingiti mukaga. 28Omu pembe zombili z'ekiikaro enyuma akatamu emizilingiti ebili. 29Ahansi ekaba etanukaine kyonkai eiguru ekwataine aha ngango eya mbere. Zombili akazikora atyo omu pembe zombili. 30Hakaba haliho emizilingiti munana; hamoi n'amachuba gayo g'efeza 16, ahansi ya buli muzilingiti amachuba gabili.

31Akakora embazi z'omushita, eitanu z'emizilingiti ey'orubaju orumoi rw'ekiikaro, 32n'embazi itanu z'emizilingiti ey'orubaju orundi rw'ekiikaro, n'embazi itanu z'emizilingiti y'ekiikaro enyuma rubaju orw'obugwaizoba. 33Orubazi orw'omugati akaruturukiranisa kwema ndekelero egi kuturuka ndekelero elinya omugatinagati y'emizilingiti. 34Emizilingiti akagisiiga ezahabu yagitaho engango z'ezahabu z'okulerembya embazi, n'embazi akazisiiga ezahabu. 35Akakora orutimbe rw'empuzi za kibururu na zambarau n'ezilikutukura na kitani nyakabara eyogosirwe. Akarukora yarutekamu n'abakerubi abakoziibwe obubuya. 36Yashuba yarukolera enyomyo inai z'omushita yamara yazisiiga ezahabu, amarobo gazo gakaba gali g'ezahabu, kandi yaziheshera amachuba ganai g'efeza. 37Kwakwo orwigi rw'eihema yarukolera orutimbe rw'empuzi za kibururu na zambarau n'ezilikutukura na kitani nyakabara eyogosirwe, yarufuma amabara. 38Enyomyo zarwo zontanu yazitaho amarobo. Emitwe yazo yagisiiga ezahabu; ebifungo byazo bikaba bili by'ezahabu, kyonkai amachuba gazo gontanu gakaba gali g'omulinga.

Currently Selected:

Okuruga 36: RHAY01

Highlight

Copy

Compare