Embandizo 37

Yozefu n'abarumuna

1Yakobo akagendelera kutura Kanaani mbali ishe yabaire afurukiire. 2Kandi aga nigo makuru g'eirai g'ekaye:

Yozefu aina emyaka ikumi na mushanju yalisaga obuhyo bw'entaama hamoi n'abarumuna. Ali mwana yaikaraga na batabani ba Bilia n'aba Zilipa bakaishe. Ebyo bashobyaga yabimanyisaga ishe. 3Isiraeli yagonzaga Yozefu kukira abaanabe abandi bona, aha rw'okuba akaba amuzaliire bukuru. Akamushonera n'ekanzu nda ey'emikono. 4Orwo abarumuna baboine okwo ishebo alikumugonza kubakira bona, bamunoba, baba batakigambage nawe.

5Yozefu aija arota; ekiroto ekyo kukigambira abarumuna bamunoba kushagaho. 6Akabagambira ati, “Muhulire ekiroto ekyo ndosire: 7Tubaire nitukoma emiganda y'engano omu musiri. Omuganda ogwange gwimuka gwemelera bwemi; eyanyu eguzingora, mara egwinamira.” 8Aho abarumuna bamubaza bati, “Nikwo kugir'oti noija kututwara? Anga oije obe mukama waitu?” Nikwo kumunoba kushagaho aha rw'ebirotobye eby'alikubarotorolera.

9Ashuba arota ekiroto ekindi, akibarotorolera ati, “Lea, Ndosire ekiroto ekindi: Eizoba, okwezi n'enyanyinyi ikumi n'emoi bibaire nibinyinamira.” 10Kukigambira ishe n'abarumuna, ishe amurotokera, amugambira ati, “Orosire kiroto nyabaki? Inye na nyoko na barumuna bawe twije tukubandamire?” 11Abarumuna bamukwatirwa eihagiko, kyonkai ishe abiika ekigambo ekyo aha mutima.

Yozefu nibamuguza nibamutwara Misiri

12Ahanyuma abarumuna bashangwa bagiire Shekemu kulisa obuhyo bwa ishebo. 13Isiraeli amugambira ati, “Barumuna bawe obuhyo nibabulisiza Shekemu. Oije mbakutumeho.” Yozefu amugarukamu ati, “Ntuma.” 14Isiraeli amugambira ati, “Ogende olebe nka bagumire, n'obuhyo nka bulige, mara ogaruke ongambire.” Kumutuma bakaba bali omu Ruhanga rwa Heburoni; Yozefu agenda Shekemu.

15Omuntu omoi aija amushanga omw'irungu nater'oku n'oku. Amubaza ati, “Nohigaki?” 16Yozefu amushubamu ati, “Nimpiga barumuna bange, ninkushaba ongambire mbali balikulisiza obuhyo.” 17Omuntu ogwo agamba ati, “Bagenzire, mbahuliire nibagamba bati, ‘Tugye Dotani.’ ” Aho Yozefu abahondera abashanga Dotani. 18Bamulengera akyali harai. Kayabaire atakabagobire bamunamira kumwita. 19Bagambirangana bati, “Leba omurosi yaija. 20Mbwenu tumwite tumunage omu kina kimoiho, turagira tuti ekikaaka kimuliire, twije tubone eky'ebirotobye biramugasira.”

21Kyonkai Rubeni kayahuliire ekigambo ekyo amubaihya omu mikono nabagambira ati, “Tutamwita. 22Mutamwita, mumunage omu kina eki aha omw'irungu, mumuleke.” Okugira atyo akaba agondize kumubaihya omu mikono kumugarulira ishebo. 23Yozefu kayabagobire bamujura ekanzuye, endai ey'emikono eyo yabaire ajwete; 24bamukwata bamunaga omu kina. Ekina kikaba kili bushai kitalimu maizi. 25Bashuntama ahansi kulya; kugya kunaga amaisho babona ekijuru ky'AbaIshimaeli nibaruga Gileadi, n'engamia zabo zitwete obunuma, zeri na mira, nibabitwara Misiri. 26Aho Yuda agambira abarumuna ati, “Kya mugashoki kwita murumuna waitu tukamusheleka okwo twamwita? 27Tumuguze Abaishimaeli, tutamwita, aha rw'okuba ni murumuna waitu, na ichwe tuli barumuna.” Abarumuna bamwikiliza. 28Aho abatunzi Abamedi barabaho, nikwo abarumuna kumunyurura omu kina bakamuguza Abaishimaeli eshekeli z'efeza makumi gabili. Abaishimaeli bamutwara Misiri.

29Rubeni kugaruka aha kina akabona okwo Yozefu atakilimu, atemura emyendoye 30agaruka ow'abarumuna nagamba ati, “Omwana yabura; ngyehai?” 31Bakwata ekanzu ya Yozefu endai ey'emikono, baita embuzi bagiibika omu bwamba; 32bagitwekera ishebo nibamuragiraho bati, “Ekanzu egi twagironda, mbwenu olebe nka yakuba y'omwana wawe anga chei.” 33Ishebo agimanya, agamba ati, “Kanzu y'omwana wange Yozefu, ekikaaka kimuliire. Taliho kulengeshanyia kimutagatagwire.” 34Nikwo Yakobo kutemura emyendoye, akekoma orugunia omu nyugunyu, akachulira omwanawe ogwo ebiro bingi. 35Abatabani bona n'abahara baija kutekesa ishebo orufu kumumaramara; kyonkai aguma ajunaire nagamba ati, “Chei, ndilemwa nagya Sheoli ow'omwana wange ninchura.” Nikwo ishe yamuchuliire atyo. 36Omu kanya ako Abamidiani bakaba bamugulize Potifari omuramata wa Farao mara omukuru w'abalinzi, omuli Misiri.

Currently Selected:

Embandizo 37: RHAY01

Highlight

Compare

Copy