Embandizo 38

Yuda na Tamari

1Omu makiro galinya Yuda ashangwa naruga ow'abarumuna, ataha omw'Omwadulami eibaralye Hira. 2Mulinya abonamu Omukanaanikazi eibaralye Shua; amushwera. 3Atwara enda azara omwana w'obwojo; Yuda eibara amweta Eri. 4Ashuba atwara enda azara omwana w'obwojo; nyina eibara amweta Onani. 5Shua ayeyongera azara omwana w'obwojo; eibara amweta Shela. Omwana ogu akamuzalira Kezibu.

6Yuda ashwelerera Eri omuzigaijogwe omukazi, eibaralye Tamari. 7Kyonkai Eri akaba mubi yatama Omukama, Omukama yamwita. 8Yuda agambira omutabani Onani ati, “Orare na muramu wawe ohikye omwoga gw'oburamu ahali wenene, ozalire murumuna wawe abaana.” 9Kyonkai Onani amanya okwo abaana batakubaire ba wenene. Orwo yararaga n'omuramu ashesha empambo ahansi, ataija akazalira murumuna baana. 10Ekyo yakozire ekyo kikatama Omukama, na wenene amwita. 11Ahanyuma Yuda agambira Tamari omukamwana ati, “Ogye oikare omwanyu oli ntumbwakazi kuhika orwo mutabani wange Shela alikura.” Akatina Shela ataija akafa nk'abarumuna. Tamari agenda atura omwabo.

12Omu biro ebyo, muka Yuda, muhara wa Shua, afa. Yuda orwo yamazire kwabya orufu agya Timuna ow'abashazibe b'obwoya bw'entaama, wenene na munywanyiwe Hira Omwadulami. 13Kabagambire Tamari bati, “Shozara nagya Timuna kushara entaamaze obwoya,” 14ajura ebijwarobye eby'okuchulira iba, ayebunda ekihundwi, ayeshwekelera, ashuntama aha kishasi kya Enaimu, Enaimu eli aha muhanda gulikugya Timuna. Tamari okugira atyo akaba yaboine okwo Shela yabaire yakuzire, kyonkai tibamumuha k'amushwera.

15Orwo Yuda yamuboine amulenga mumalaya, akaba ayebunzire aha maisho. 16Agenda amugoba aha muhanda, amugambira ati, “Ija tubyame hamoi.” Tiyamanyire kwo yabaire ali mukamwana. Tamari amubaza ati, “Orampaki tukabyama hamoi?” 17Yuda amuhorora ati, “Ndakutwekera omwagazi omu buhyo bw'entaama.” Tamari amugambira ati, “Ompe omukwato kuhika orwo oratweka omwagazi ogwo.” 18Yuda amubaza ati, “Nkuhe mukwatoki?” Tamari ahorora ati, “Empeta yawe y'omuhuri n'orufufu rwawe, n'enkoni yawe ey'okwete.” Aho Yuda abimuha, abyama nawe, mara amutweka enda. 19Omukazi aimuka agenda, ajura ekihundwi, ajwara ebijwarobye by'okuchulira iba.

20Orwo Yuda yatwekire munywanyiwe Omwadulami omwagazi, omukazi kugya kumugarulira omukwato, tiyashoboire kubona mukazi ogwo. 21Abaza abantu ba Enaimu ati, “Omumalaya abaire naikara aha, aha muhanda alihai?” Bahorora bati, “Taliho mumalaya abaire naikara aha.” 22Aho agaruka owa Yuda amugambira ati, “Tinamubona; n'abantu ba Enaimu bagamba bati, ‘Taliho mumalaya abaire naikara aha.’ ” 23Yuda ahorora ati, “K'aikare n'ebintu ebyo bibe bye bataija bakatushekelera, orwo namutwekera omwagazi ogu otashobora kumubona.”

24Emyezi kayahingwire nk'eshatu bagambira Yuda bati, “Mukamwana wawe Tamari ateire obumalaya, nangu yatwete n'enda.” Yuda agamba ati, “Mumushohoze omu kigo bamwokye.” 25Orwo babaire nibamushohoza omu kigo atuma ahali ishezara ati, “Omushaija mukama w'ebintu ebi niwe antwekire enda.” Ashuba agamba ati, “Ninshaba olebege omanye ebintu ebi by'ohai: Empeta y'omuhuri, orufufu n'enkoni.” 26Aho Yuda abiikiliza nagamba ati, “Nansinga, ninye ntamuhaire mutabani wange Shela.” Mara tiyabyamire nawe rundi.

27K'ebirobye by'okuzara byagobire, amanyika okwo aina enda y'abarongo. 28Kayabaire nazara omurongo omoi ayebembeza omukono. Omuzaza agukwata agukomaho akahuzi kalikutukura nagamba ati, “Ogu niwe yaturuka ali wa mbere.” 29Kyonkai omurongo ogwo ashubyayo omukono, omurumuna aba niwe aturuka. Omuzaza agamba ati, “Wayetemera omuhanda.” Aha rw'ekyo eibara bakamweta Peresi. 30Ahanyuma omurumuna aturuka n'akahuzi kalikutukura aha mukono. Ogwo eibara bakamweta Zera.

Currently Selected:

Embandizo 38: RHAY01

Highlight

Compare

Copy