Embandizo 39

Yozefu na muka Potifari

1Yozefu bamutwara Misiri. Potifari Omumisiri omuramata wa Farao mara omukuru w'abalinzi amugura aha Baishimaeli abamutweteyo. 2Omukama asingira Yozefu, aba mushaija agoshoka. Yaturaga omwa mukamawe Omumisiri, 3na mukamawe abona okwo Omukama yabaire namusingira, nagoshora na byona ebyo yabaire nakora. 4Aho Yozefu aganja mukamawe ogwo, amukolera. Amuhindura mugelezi w'ekaye n'okugelera ebye byona. 5Omukama aha omugisha eka y'Omumisiri ogwo aha rwa Yozefu; ebye byona ebyo yabaire ainabyo omu nju n'aheru bigira omugisha gw'Omukama. 6Aho ebye byona abikwasa Yozefu kubigelera. Aina Yozefu tiyafagaho kyona kyona, shana kulya ekyakulya.

Yozefu akaba ali murungi mara ayemirege. 7K'eibanga lyabaire lyahingwire, muka mukamawe amuleba amwegomba, amugambira ati, “Tubyame hamoi.” 8Kyonkai Yozefu ayanga, agambira muka mukamawe ati, “Mukama wange ainanye taina ky'alikufaho mu nju, mara ankwasize buli kintu ekilikye. 9Omu nju omu inye na wenene nitwiganisa obukuru, kuba taliho kyona kyona ekyo ansigaliizeyo shana iwe wenene aha rw'okuba oli mukaziwe. Mbwenu nakukora ntai obufu buhango buti, kufakalira Ruhanga?” 10N'orwo omukazi yaikaire abigambiire atyo Yozefu buli kiro, Yozefu tiyamwikiliize, anga kubyama nawe anga kwikara nawe. 11Kyonkai ekiro kimoi orwo yagiire omu nju kukora eikoralye, mara omu nju omwo hatalimu mwiru ondijo n'omoi, 12omukazi amukwata omwendo nagamba ati, “Tubyame hamoi!” Kyonkai Yozefu amunagira omwendogwe, aturuka aheru airukire. 13Omukazi kubona okwo yamunagira omwendogwe akasigara agukwete akairuka agiire aheru, 14abilikira abairube ab'omu nju abagambira ati, “Leba atuleteire Omuheburania kutujangura, yaija omu kiyumba kyange kunkwata, nakunga n'eiraka lihango; 15kayahulira okwo nakunga ntungamize eiraka, yanagira omwendogwe yaturuka aheru.” 16Aho aikara n'omwendo gwa Yozefu kuhika orwo mukamawe yaizire omuka. 17Amubarulira amakuru gonene gonene nagamba ati, “Omwiru w'Omuhebrania ow'otuleteire yaija omu kiyumba kyange kunjangura. 18Kyonkai orwo nakunga ntungamize eiraka, yannagira omwendogwe yairuka agiire aheru.”

19Mukamawe kuhulira ebyo mukaziwe yamubarulira ati, “Leba okwo omwiru wawe yangira;” ekiniga kimuzimbeza. 20Amukwata amufunga. Amufungira mbali abafungwa b'omukama bafungirwaga, aikara omwo. 21Kyonkai Omukama amusingira, amugilira ekisha, amuhindura nganzi y'omulebelezi wa jela. 22Omulebelezi ogwo wa jela akwasa Yozefu abafungwa jela ababaire bali bubohe omwo, kyona kyona ekyakorwaga mulinya niwe yakikoraga. 23Omulebelezi wa bubohe tiyafagaho kyona kyona ekyabaire kili omu bugelezi bwa Yozefu, ahakuba Omukama akaba amwemiremu, kandi buli kimoi ekyo yakoraga Omukama yakigoshoraga.

Currently Selected:

Embandizo 39: RHAY01

Highlight

Compare

Copy