Embandizo 40

Yozefu nashoborora ebiroto by'abafungwa

1Ebyo kabyabaire byahingwire, omukwasi w'enkorogo y'omukama wa Misiri n'omuyondowe w'emikate batamisa omukama wabo ogwo. 2Farao anigalira abaramatabe bombili abo, omukwasi mukuru w'enkorogo n'omuyondo mukuru w'emikate. 3Abafungira omw'omukuru w'abalinzi, omuli jela eyo Yozefu yabaire afungiirwemu. 4Omukuru w'abalinzi abakwasa Yozefu, abalinda, baikara jela eibanga. 5Ekiro kimoi omukwasi w'enkorogo n'omuyondo w'emikate b'omukama wa Misiri ababaire bafungiirwe jela, bombili barota, buli omoi ekiroto ekye na buli kiroto n'enshonga yakyo. 6Yozefu kayabagobireho bwankya abona okwo bashobeirwe. 7Abaza abaramata ba Farao abo, abo yabaire ainabo omuli jela omwa mukamawe ati, “Kir'eki nka muchunchubaire?” 8Bamuhorora bati, “Turosire, mara taliho wa kubitoitora.” Yozefu abagambira ati, “Ruhanga niwe yakubitoitora. Inywe ngambira.”

9Aho omukwasi mukuru w'enkorogo agambira Yozefu ekirotokye, ati, “Omu kiroto kyange mboine omuzabibu gundi omu maisho. 10Gubaire gwina amatagi gashatu. Orwo gubaire gwashumika, gwakya, empangwa zazo zirugwamu ezabibu zezire. 11Ekikompe kya Farao kindi omu mukono, nkwata ezabibu nzikamulira omu kikompe ekyo nshuba nkimuheleza.” 12Aho Yozefu amugambira ati, “Omwitoitoro gwakyo nigw'ogu: Amatagi gashatu nibyo biro bishatu; 13omu biro bishatu Farao arakutaishura akugarure aha muruka gwawe, oshube omuheleze nk'orwa mbere orwo wabaire oli mukwasiwe w'enkorogo. 14Kyonkai oranyijuka orwo oraba wabairege, ongilire ekisha, ninkutagiliza, ondange ahali Farao, onyihye omu kifungo. 15Nobona bakanyiba omu nsi y'Abaheburania; na hanu aha tinyina kyo nkozire eky'okufungisa.”

16Orwo omuyondo mukuru w'emikate yaboine okwo omwitoitoro gwashemera, agambira Yozefu ati, “Leba, nanye ndosire: Ebikapu bishatu by'ekeki bibaire bindi aha mutwe, 17Omu kikapu eky'eiguru habaire halimu engeli zona z'ebyakulya bya Farao ebikanzirwe, kyonkai ebinyonyi byabilira omu kikapu aha mutwe gwange.” 18Yozefu amuhorora ati, “Ogu nigwo mwitoitoro gwakyo: Ebikapu bishatu nibyo biro bishatu. 19Omu biro bishatu ebyo Farao arakutaishura, kyonkai arakutemaho omutwe, omutumbi gwawe aguhanike aha muti ebinyonyi bigunontore.”

20Aha kiro kya kashatu, kili kiro kikuru ky'okuzarwa kwa Farao, Farao akolera abaramatabe obugenyi. Omukwasi w'enkorogo omukuru n'omuyondo w'emikate omukuru abataishura, abaleta omu maisho g'abaramatabe. 21Agarura omukwasi mukuru w'enkorogo aha bukwasibwe bw'enkorogo, ata kumukolera enkorogo. 22Kandi omuyondo w'emikate omukuru amuhanika, nk'okwo Yozefu yabaire abaitoitoroleire. 23Kyonkai omukwasi mukuru w'enkorogo tiyaijukire Yozefu, amwebwa.

Currently Selected:

Embandizo 40: RHAY01

Highlight

Compare

Copy