Embandizo 41

Yozefu naitoitora ebiroto bya Farao

1Emyaka ebili yona kayabaire yahingwire, Farao arota ayemeleire aha Mwiga gwa Naili. 2Abona ente mushanju zirungi mara zigomokire, niziruga omuli Naili, zilya ebibimbili. 3Kandi ashuba abona ente ezindi mushanju zitebire zihoire aha magufa, ziruga omuli Naili zizemeleraho aha rukunguru rw'omwiga. 4Ente ezitebire zihoire aha magufa ziliira kimoi omushanju ezirungi ezigomokire. Aho Farao aita eisisimuka. 5Ashuba anagira, arota omurundi gwa kabili. Abona ebikumba mushanju bihulingiliire mara birungi bimezire aha kiti kimoi. 6Ashuba abona ebikumba mushanju, bitutura bishoroimire, bihotoirwe omuyaga gw'eirungu ly'oburugaizoba. 7Ebikumba ebishoroimire bimilira kimoi ebikumba mushanju ebihulingiliire mara ebijwire enjuma. Farao aita eisisimuka, abona okwo yaba ali omu kiroto. 8Aho bwankya ahwahwana omwoyo; ayeta abafumu bona ba Misiri n'abamanyi bayo bona, abarotorolera ekirotokye, kyonkai tiyazokire muntu wa kushobora kukimwitoitorolera.

9Ahanyuma omukwasi mukuru w'enkorogo amugambira ati, “Kir'eki naijuka okwo nashobize. 10Orwo Farao yabaire anigaliire abairube, inye n'omuyondo mukuru w'emikate akatufunga jela omw'omukuru w'abalinzi, 11tukarota omu kiro kimoi, inye na wenene. Buli omoi aina ekiroto ekye n'enshonga yakyo. 12Tukaba twinamu omusigazi Omuheburania, ali mwiru w'omukuru w'abalinzi. Katwamugambire atwitoitorolera ebiroto byaitu; aitoitorolera buli muntu kuhonderana n'ekirotokye. 13Mara okwo yatwitoitoroleire nikwo byabaire. Inye bakangarura aha muruka gwange, omuyondo w'emikate bamuhanika.”

14Aho Farao atumaho Yozefu, bamwihya jela bwangu bwangu. Kayabaire yamoisize yahindwire n'emyendoye, aija omu mabona ga Farao. 15Farao amugambira ati, “Ndosire, mara taliho n'omoi ayakukitoitora. Inye nahulira nibakugamba ngu k'ohulira ekiroto oshobora kukitoitora.” 16Yozefu amuhorora ati, “Waitu inye tindikushobora, shana Ruhanga niwe arashobora kukikwitoitorolerage.” 17Aho Farao amugambira ati, “Ndosire nyemeleire aha rukunguru rwa Naili. 18Ente mushanju zirungi zigomokire ziruga omuli Naili zilya ebibimbili. 19Ezindi mushanju zibi zija, mara zitebire muno zihoire aha magufa ezo ntakabonaga mu nsi ya Misiri. 20Ente ezo ezitebire zihoire aha magufa ziliira kimoi omushanju eza mbere ezigomokire. 21Kyonkai orwo zibaire zaziliire taliho yakumanyire okwo zazilya aha rw'okuba zibaire zihoire aha magufa nk'aha mbandizo. Aho nyita eisisimuka. 22Nshubire narota ebikumba mushanju bimezire aha kiti kimoi, birungi bijwire enjuma; 23n'ebikumba ebindi mushanju bihotokire, bishoroimire, bihotoirwe omuyaga gw'eirungu ly'oburugaizoba, bitutura. 24Ebishoroimire bimilira kimoi omushanju ebirungi. Ekiroto nakigambira abafumu, kyonkai taliho yashobora kukinshoborora.”

25Aho Yozefu agambira Farao ati, “Ekiroto kyawe rugaba, kili kimoi. Ruhanga yakushurulira ekyo alikwija kukora. 26Ente mushanju ezirungi nizo myaka mushanju; n'ebikumba mushanju ebirungi niyo myaka mushanju, ekiroto kili kimoi. 27Ente mushanju ezishoroimire, ezitebire zihoire aha magufa, ezizirugire enyuma niyo myaka mushanju, kandi ebikumba mushanju ebili bushai bihotoirwe omuyaga gw'eirungu ly'oburugaizoba, egyo myaka mushanju y'eifa. 28Kili nk'okwo nakugambira rugaba, Ruhanga yakwoleka ekyo alikwija kukora. 29Harabaho emyaka mushanju y'omwero gungi omu nsi yona ya Misiri; 30kyonkai egyo erahonderwa emyaka mushanju y'eifa, n'omwero gwebeke omuli Misiri. Eifa lilimaraho ensi, 31n'omwero tigulimanyika mu nsi aha rw'enshonga y'eifa elyo elilihonderaho aha rw'okuba liliba lingi muno. 32Okurota kabili kwa Farao nikwoleka okwo ekigambo ekyo kitairweho Ruhanga, mara naija kukigobesheleza bwangu. 33Mbwenu aha rw'ekyo rugaba, oronde omuntu enyegendeleza mara omugezi, omuhe kugelera ensi ya Misiri. 34Oshube oteho abalebelezi omu nsi, mara okwate ekichweka kya katanu ky'ebirata nibyera omuli Misiri omu myaka egyo mushanju y'omwero. 35Bashombokye ebyakulya byona by'emyaka emirungi elikwija, babibiike omu bigo omu bushobora bwa Farao. 36Ekyakulya ekyo kiliba mpanika y'ensi omu myaka mushanju y'eifa elilitera Misiri, litaija likagisilikya.”

Yozefu naba mugelezi wa Misiri yona

37Ekigambo eki kishemelera Farao n'abaramatabe bona. 38Ababaza ati, “Twakuzora omuntu nk'ogu aina Mwoyo wa Ruhanga?” 39Aho agambira Yozefu ati, “Orwo Ruhanga yakwoleka ebi byona, taliho n'omoi enyegendeleza mara omugezi nka iwe okw'oli. 40Iwe oragelera eka yange, n'abantu bange bona bakore nk'okwo orabaragira. Shana okuba mukama nikwo ndakushagyaho kwonkai.” 41Ashuba amugambira ati, “Leba, nakuhindura mugelezi wa Misiri yona.” 42Aihya empetaye y'omuhuri aha mukono agiteka aha mukono gwa Yozefu, amujweka emyendo ya kitani nungi n'omukofu gw'ezahabu omu ngoto; 43amukuubisa omu galiye eya kabili. Abamwebembeire bagenda nibagamba bati, “Muteke amajwi!” Nikwo yamuhindiwre mugelezi w'ensi yona ya Misiri. 44Mara amugambira ati, “Inye ndi Farao. Kyonkai iwe eky'otaikiliize taliho muntu araimukya mukono anga kuguru omuli Misiri yona.” 45Farao ayeta Yozefu eibara Safenatipanea; kandi amusiigira Asenati muhara wa Potifera omukuhani wa Oni. Aho Yozefu agya kurambura ensi yona ya Misiri.

46Yozefu akaba aina emyaka makumi gashatu orwo yabandize kukolera Farao omukama wa Misiri. Aruga omu kikaare kya Farao agya kurambura ensi yona ya Misiri. 47Omu myaka mushanju y'omwero ensi ekeza muno. 48Yozefu ashombokya ekyakulya kyona ky'emyaka mushanju orwo habaire haliho omwero omuli Misiri. Abika ebyakulya omu bigo. Buli kigo yakibikagamu ebyakulya ebyarugaga omu misiri eyabaga ekyataine. 49Akabika emyaka nyingi muno nk'omushenye gw'enyanja alemwa alekera kugipima aha rw'okuba ekagoba aha kutapimwa.

50Emyaka y'eifa etakagobire Yozefu akazara abaana b'abojo babili ahali mukaziwe Asenati muhara wa Potifera omukuhani wa Oni. 51Omuzigaijogwe akamweta Manase, nagamba ati, “Ruhanga anyebesize enaku zange zona n'ab'omwaitu bona.” 52Owa kabili akamweta Efuraimu, nagamba ati, “Ruhanga ampaire oruzaro omu nsi eyo naboneiremu enaku.”

53Emyaka mushanju y'omwero ogwabaireho omuli Misiri ehwa; 54n'emyaka mushanju ey'eifa ebanza, nk'okwo Yozefu yabaire agambaire. Eifa likaba lili omu nsi zona, kyonkai Misiri ekaba eina ebyakulya. 55Orwo eifa lyayemire kubi ensi yona ya Misiri, abantu batakira Farao kubaha ebyakulya. Farao agambira Abamisiri bona ati, “Mugende ahali Yozefu, ekyo arabagambira mukore.” 56Eifa libamba ensi yona, liba lingi muno omuli Misiri. Aho Yozefu akingura amahanika gona aguza Abamisiri ebyakulya. 57Mara kandi ensi zona zaijaga Misiri ahali Yozefu kugura ebyakulya ebyo, enshonga eifa likaba lili lingi muno buli hantu.

Currently Selected:

Embandizo 41: RHAY01

Highlight

Compare

Copy