Embandizo 42

Barumuna Yozefu nibagya Misiri kushaka

1Yakobo kayamanyire okwo Misiri haliyo ebyakulya, abaza abatabani ati, “Mwagyaho mwalebangana?” 2Abagambira ati, “Leba, mpuliire okwo Misiri haliho ebyakulya. Mugende mutugulireyo ebyakulya nirwo turarora, tutafa. 3Aho barumuna Yozefu eikumi bagya Misiri kugura ebyakulya ebyo. 4Kyonkai Yakobo tiyataishwire Benjamini murumuna Yozefu kugenda na barumuna, aha rw'okuba akatina ataija akagira okwo yaba.” 5Batabani ba Isiraeli bagenda n'abantu abandi kugura ebyakulya omuli Kanaani likaba lili ifa.

6Yozefu akaba ali mutwazi w'ensi ya Misiri. Niwe yaguzaga abantu b'ensi zona ebyakulya. Abarumuna kabagobire bamubandama omu maisho obuso nibukanga aha itaka. 7Yozefu abona abarumuna abamanya, kyonkai abakwata nk'abanyamahanga. Ababaza nabarotokera ati, “Nimuruga nkahai?” Bahorora bati, “Twaruga omu nsi ya Kanaani twaija kugura ebyakulya.” 8Nikwo Yozefu yamanyire atyo abarumuna kyonkai bonene tibamumanyire. 9Aijuka ebiroto ebyo yabaire abarosireho; abagambira ati, “Muli banyomozi, mwizire kuleba mbali ensi eli njege.” 10Bamugambira bati, “Chei, mukama wange, abairu bawe baija kugura ebyakulya. 11Ichwena tuli baana b'eish'emoi, tuli bantu besigwa, abairu bawe ti banyomozi.” 12Abagambira ati, “Chei, mwizire kuleba mbali ensi eli njege.” 13Bagamba bati, “Ichwe abairu bawe, tuli barumuna ikumi na babili, b'eish'emoi omu nsi ya Kanaani. Mainuka gaitu na kir'eki aina tataichwe, kandi ondijo takiliho.” 14Nawe Yozefu abagambira ati, “Ni nk'okwo nabagambira, muli banyomozi. 15Aha rw'ekyo ninyija kubalenga: Obuso bwa Farao timulikurug'aha mainuka ganyu ataizire. 16Mutume omuntu omuli inywe agye amulete. Abandi mube mufungirwe, tulebe ebyo mulikugamba nka binamu amazima. Kitali kityo obuso bwa Farao muli banyomozi.” 17Bona abafunga ebiro bishatu.

18Aha kiro kya kashatu Yozefu abagambira ati, “Inye ntina Ruhanga, mbwenu ndabaganyira kamurakora muti: 19Kamuraba muli bantu besigwa musige murumuna wanyu omoi afungiirwe omu mbali mufungirwe; abasigaire mugende, mutwalire amaka ganyu ebyakulya batarambara, 20mara mundetere mainuka ganyu. Aho nirwo muraboneka okwo mulikugamba amazima, mara timufe.” Bakora batyo. 21Bashuba bagambirangana bati, “Mazima tukafakalira murumuna waitu. Tukabona okwo yashasha, yatutagiliza twayanga, nikyo enaku ezi zona zatutelera.” 22Rubeni abahorora ati, “Tinabagambire kutakora kubi mwana? Kyonkai timwaikiliize, aha rw'ekyo mbwenu leba obwambabwe bwatururukira.” 23Bakaba batalikumanya kwo Yozefu alikubashobokerwa, enshonga bakaba baina ow'okubahindulira ebyo babaire nibagamba. 24Aho Yozefu abarugaho, alira. Ashuba agaruka afumora nabo. Abaihyamu Simeoni amubohera omu maisho gabo.

Barumuna Yozefu nibagaruka Kanaani

25Yozefu aragira kwijuza egunia zabo ebyakulya, kandi kushubya amahera ga buli muntu omu guniaye n'okubaha entanda. Ebyo byona babibakolera. 26Batweka endogobe zabo ebyakulya byabo, bagenda. 27Orwo omoi omuli bonene yakomoroire eguniaye kuha endogobe ebyakulya aha ikumbi, abona amaherage omu munwa gw'eguniaye. 28Agambira barumunabe ati, “Amahera gange bagashubyamu, leba nig'aga gali omu munwa gw'egunia yange.” Emitima yabo echunchubara, balebangana batina; bebaza bati, “Eki kiki ekyo Ruhanga yatukolera?”

29Kabagobire Yakobo ishebo omu nsi ya Kanaani, bamubarulira byona ebyabagwireho bati, 30“Omutwazi wa Misiri akaturotokera, yatulengeshanyia kuba banyomozi b'ensi yabo. 31Kyonkai ichwe tukamugambira tuti, ‘Ichwe tuli besigwa, tituli banyomozi. 32Tuli barumuna ikumi na babili, abaana b'eish'emoi; omoi takiliho, kandi mainuka kir'eki aina tataichwe omu nsi ya Kanaani.’ 33Aho omutwazi wa Misiri atugambira ati, ‘Eki nikyo ndamanyiraho okwo inywe muli besigwa: Munsiigire murumuna wanyu omoi, mutwalire amaka ganyu ebyakulya batarambara, mugende. 34Mundetere mainuka ganyu, nirwo ndamanya okwo mutali banyomozi, muli bantu abesigwa, mara ndabataishulira murumuna wanyu, kandi mwikare munu mutunde.’ ”

35Kabafukurwire amagunia gabo, bashanga buli omoi omufuko gw'amahera omw'igunialye. Bonene na ishebo kababoine emifuko egyo y'amahera batina. 36Ahanyuma ishebo abagambira ati, “Mwanchwa. Yozefu takiliho, na Simeoni takiliho; mbwenu nimwenda kutwara Benjamini; ebyo byona nibigwera inye.” 37Nikwo Rubeni kugambira ishe ati, “Kandaba ntamukugaruliire oite batabani bange babili. Omunkwase, inye ndamukugarulira.” 38Kyonkai Yakobo agamba ati, “Omwana wange timulikugenda nawe, ahakuba omurumuna akafa, niwe yasigaireho wenkai. Akabi katakumugwaho omu rugendo rwanyu. Inye ndi mugurusi; kanakufa nkaitwa obujune nzira inywe.”

Currently Selected:

Embandizo 42: RHAY01

Highlight

Compare

Copy