Embandizo 43

Barumuna Yozefu nibagaruka Misiri na Benjamini

1Eifa omuli Kanaani lishagulirana. 2Kabaliire ebyakulya ebyo baihire Misiri bikahwaho, ishebo abagambira ati, “Mushubeyo mutugulire akakulya.” 3Kyonkai Yuda amugambira ati, “Omushaija akatukomeleza muno nagamba ati, ‘Timulimbona buso shana kamulija na murumuna wanyu.’ 4K'olikututuma tukagenda na murumuna waitu turagenda tukugulire ebyakulya. 5K'otalikumutaishura titulikugenda, aha rw'okuba omushaija akatugambira ati, ‘Timulimbona buso shana kamulija na murumuna wanyu.’ ” 6Isiraeli agamba ati, “Kubaki mwankozire kubi mutyo kugambira omushaija ogwo okwo mwinayo murumuna wanyu ondijo?” 7Bahorora bati, “Omushaija akatubaliliza muno ebitukweteho ichwe n'oruganda rwaitu, ati, ‘Isheinywe akyarora? Mwina murumuna wanyu ondijo?’ Ebyo twamugambiire kukaba kuli kuhorora ebyo yatubalize. Twakumanyire okwo yakugambire ati, ‘Murumuna wanyu mwije nawe?’ ” 8Yuda agambira ishe ati, “Omwana omumpe tugende, tutakufa ichwe na iwe n'abaana baitu. 9Inye nayesimba, olimunyenza mukuhe. Kandiba ntamukugaruliire, nkamuta omu maisho gawe, aho ebiro byona ndiba nyina omushango. 10Katwakuba tutakelereirwe tuti, aha twakuba twagarukire kabili.”

11Ishebo abagambira ati, “Kakiraba kibe kityo, mukore muti: Omu bikwato byanyu mutwareho ebiraba birungi muno bya Kanaani: Zeri nke, obwoki buke, ebirungo, mira, ebinyobwa n'empambo z'omuti gw'omulozi, mubigemulire omushaija ogwo. 12Mutware amahera emirundi ebili: Mugarureyo amahera agagarukire omu minwa y'amagunia ganyu, shana bakashobya. 13Mutware na murumuna wanyu, mwimukye mushube ow'omushaija ogwo. 14Rushoborabyona abagilire obuganyizi omu maisho g'omushaija ogwo, abataishure na murumuna wanyu ondijo hamoi na Benjamini. Kandaba ninchweka nchweke.” 15Abatabani bakwata ebigemuro, bakwata n'amahera emirundi ebili na Benjamini, baimukya bagya Misiri, bemelera omu maisho ga Yozefu.

16Yozefu kayaboine Benjamini bainawe, agambira omugelezi w'enjuye ati, “Otware abashaija aba omu nju, oite ente, mara ochumbe, aha rw'okuba nibaija kulya nanye bwamushana.” 17Omugeleezi akora nk'okwo Yozefu yamuragira, abatwara omwa Yozefu. 18Bonene batina kubona babatwara omwa Yozefu, bagamba bati, “Aha rw'enshonga y'amahera agagarukire omu magunia gaitu orwa mbere, nikyo batuletera omu nju abone obushango bw'okutubunda, atuhindure bairu n'endogobe zaitu azinyage.” 19Aho bagoba omugelezi w'enju ya Yozefu bafumora nawe bemeleire omu rwigi, 20bamugambira bati, “Waitu, mukama wange tukaija elya mbere kugura ebyakulya, 21nawe orwo twagobire omw'ikumbi, tukomorora egunia zaitu, buli muntu ashangamu amaherage omu munwa gw'eguniaye amahera gaitu gona okwo gabaire gali. Aha rw'ekyo twagagarura. 22Kandi twaleta amahera agandi kugura ebyakulya. Titulikumanya yataire mahera gaitu mu magunia gaitu.” 23Ahorora ati, “Mutekane, mutatina. Ruhanga wanyu mara Ruhanga wa baisheinywe niwe yabateleire amahera ago omu magunia ganyu. Amahera ganyu nkagatora.” Ahanyuma abaturukiza Simeoni. 24K'omugelezi yabaire yabatahize omwa Yozefu, akabaha amaizi bakanaba amaguru, n'endogobe zabo akaziha ekyakulya, 25batekateka egemuro ya Yozefu kugimuha orwo araija bwamushana, aha rw'okuba bakaba bahuliire okwo nimwo babaire nibaija kwegagura.

26Yozefu kayatahire omu nju bamuletera ebigemuro ebyo babaire bainabyo; bamubandamira obuso bukanga aha itaka. 27Abashura, amara ababaza ati, “Isheinywe omugurusi owo mwagambire agumire? Akyarora?” 28Bahorora bati, “Omwiru wawe tataichwe agumire, akyarora.” Bainama babandama. 29Kugya kunaga amaisho abona omurumuna Benjamini, omwana wa nyina, abaza ati, “Ogu niwe mainuka wanyu owo mwangambiire?” Ashuba agamba ati, “Mwana wange, Ruhanga akutunge omugisha.” 30Aho Yozefu ayanguha abarugaho, ahiga mbali aralilira, kuba akaba yagiliire omurumuna orushusho. Ataha omu kiyumba alira. 31Ahanyuma ayegumisiliza alekera kulira, anaba omu maisho ashohora. Aragira kabaihura ekyakulya. 32Bamwihulira wenkai, nabo bonkai, n'Abamisiri abalyaga nawe babaihulira bonkai aha rw'okuba aha Bamisiri guba muziro kulya n'Abaheburania. 33Bamushuntama omu maisho okwo balikukuratana, omuzigaijo kuhonderana n'obuzigaijobwe, na mainuka kuhonderana n'obutobwe. Balebangana, batangara. 34Yozefu ababegera, kyonkai ebyo yabegeire Benjamini bikashaga eby'abandi emirundi etanu. Aho banywa nawe, bona bashemelerwa.

Currently Selected:

Embandizo 43: RHAY01

Highlight

Compare

Copy