Embandizo 44

Ekikompe kya Yozefu omu nshaho ya Benjamini

1Yozefu aragira omugelezi w'enjuye ati, “Ijuza enshaho z'abashaija aba ebyakulya bingi nk'okwo bakubasa kutwara; mara ote amahera ga buli omoi omu munwa gw'eguniaye. 2Omu munwa gw'egunia y'omuto bwoli otemu ekikompe kyange ky'efeza, otemu n'amaherage ag'abaire aizire kuguza ebyakulya.” Akora okwo Yozefu yamugambira. 3Orwo bwakeire buti, bataishura abashaija hamoi n'endogobe zabo. 4Kababaire baruga omu kigo akatambi kagufi, Yozefu agambira omugeleziwe ati, “Yanguha ohondere abashaija abo k'orabagoba obagambire oti, ‘Ayabakorage nka mwamukora kubi? Kubaki mwaiba ekikompe kya mukama wange eky'efeza? 5Nikyo anyweramu kandi nikyo akoza kuraguza. Ekyo mwakora ekyo mwashobya.’ ”

6Orwo yabagobire abagambira ebigambo ebyo. 7Bahorora bati, “Waitu kubaki nogamba otyo? Nikikabure ichwe abairu bawe kukora ekyab'ekyo. 8Leba, amahera ago twashangire omu minwa y'egunia zaitu tugakugaruliire orwo turugire owaitu Kanaani. Mbwenu aho twakwiba tutai efeza anga ezahabu omwa mukama wawe? 9Waitu, wena wena omu bairu bawe arashangwa nakyo afe, na ichwe tube bairu bawe.” 10Agamba ati, “Bibe bityo okwo mwagamba! Arashangwa nakyo abe mwiru wange, kyonkai inywe muraba mutaina mushango.” 11Aho buli muntu ayanguha ahanantura eguniaye agita ahansi, agikomorora. 12Omugeleezi achukura, abandiza aha mukuru wabo bona, amalira aha muto bwoli; ekikompe akishanga omu gunia ya Benjamini. 13Aho batemura emyendo yabo, buli omoi atweka endogobeye bagaruka omu kigo.

14Orwo Yuda n'abarumuna bagobire omwa Yozefu, Yozefu akaba akyalimu. Bamugwa omu maisho. 15Yozefu ababaza ati, “Kikorwaki eki ekyo mwakora? Timulikumanya okwo omuntu nkanye nakuragura?” 16Yuda amushubamu ati, “Tukugambireki mukama wange! Tugambeki? Anga twetongorore tutai? Ruhanga yasherura entambara y'abairu bawe. Leba, ichwe n'ayakwatwa n'ekikompe kyawe twaba bairu bawe, rugaba.” 17Ndi Yozefu ati, “Nikikabure kukora ntyo. Ayakwatwa n'ekikompe wenkai abe niwe aba mwiru wange. Inywe mugaruke n'emilembe owa isheinywe.”

Yuda nayesimba aha rwa Benjamini

18Aho Yuda agoba Yozefu amugambira ati, “Waitu mukama wange, ninkutagiliza omwiru wawe agire ako yakugambira omu kahwe. Mara otanigalira mwiru wawe; enshonga iwe oli nka Farao wenene wenene. 19Mukama wange okabaza abairu bawe oti, ‘Mwina isheinywe anga murumuna wanyu?’ 20Twakuhorora tuti, ‘Tataichwe twinawe mugurusi; twinayo na mainuka gaitu owo yazaliire bukuru. Mainuka gaitu ogwo omurumuna yafire; wenene wenkai omu baana ba nyina niwe asigaireho. Mara ishe amugonza.’ 21Nikwo iwe kutugambira oti, ‘Mumundetere muteho elisho.’ 22Twakushubamu tuti, ‘Omwana tashobora kusigaho ishe, kayakumusigaho, ishe ogwo yakufa.’ 23Aho watugambira oti, ‘Kamainuka ganyu aliba ataizire, na inywe timulimbona rundi.’ 24Katwagarukire ow'omwiru wawe tata tumugambira okwo wagambire. 25K'agambire ati, ‘Mushubeyo mutugulire akakulya,’ 26twagamba tuti, ‘Titwakugenda! Mainuka gaitu k'aragenda na ichwe aho turagenda; aha rw'okuba omushaija olinya titwakumugya mu maisho tutaina mainuka gaitu.’ 27Aho omwiru wawe tataichwe atugambira ati, ‘Inywe nimumanya okwo mukazi wange yanzaliire abaana b'abojo babili. 28Omoi akansigaho nagamba nti, “Rwona aliirwe.” Kwema aho tinkamubonaga. 29Kamuranyihyaho n'ogu, akabi kakamugwaho, muranyisa njunaire okwo ndi mugurusi.’ 30Mbwenu aho orwo turagoba omwiru wawe tataichwe tutaina mwana, mara okwo agonza omwana ogu, 31k'alikubona tutainawe nafa. Mara tataichwe omwiru wawe ogwo, n'obwo bugurusibwe, turamwisa ajunaire. 32Inye omwiru wawe nkesimba aha rw'omwana ogu ahali tata ningamba nti, ‘Kandiba ntamukugaruliire, oburora bwange bwona ndiba nyina omushango ahali iwe.’ 33Mbwenu aha rw'ekyo waitu ninkutagiliza, nsigare aha mwanya gw'omwana, mbe mwiru wawe, otaishure omwana atahe n'abarumuna abandi. 34Nakugaruka ntai ahali tata ntaina mwana ogu? Enaku ezab'ezi nintina kuzibona nizitera tata.”

Currently Selected:

Embandizo 44: RHAY01

Highlight

Compare

Copy