Embandizo 45
45
Yozefu nayemanyisa barumunabe
1Aho Yozefu akaba atakishobora kwetanga mu maisho ga bona ababaire bamuliho. Alira nagamba ati, “Shohoza buli muntu andugeho.” Kityo Yozefu akaba asigaire wenkai orwo yayemanyisize abarumuna. 2Alira muno Abamisiri bamuhulira, n'ab'omwa Farao bahulira. 3Agambira abarumuna ati, “Inye ndi Yozefu. Tata akyarora?” Kyonkai abarumuna tibashoboire kumuhorora aha rw'okuba bakahwahwana orwo bamumanyire.
4Abagambira ati, “Inywe ija mungobe.” Bamugoba, abagambira ati, “Inye ndi murumuna wanyu Yozefu owo mwagulize kunu Misiri. 5Mbwenu mutajunara anga kunigalirangana okuba mukanguza kunu; enshonga Ruhanga akabanyebembeza kwija kubakiza. 6Ensi yamara emyaka ebili eteirwe eifa. Akyasigaireyo emyaka etanu eyo batalime anga kugesha. 7Ruhanga akabanyebembeza kubahungiza abaana banyu mutachweka. 8Kityo t'inywe mwantwekire kunu, ni Ruhanga. Akampindura ishe Farao n'omugelezi w'omwa wenene, yampindura mutwazi w'ensi yona ya Misiri. 9Mwanguhe mugende mugobe tata, mumugambire muti, ‘Mutabani wawe Yozefu nagamba ati, Ruhanga akampindura mukama wa Misiri yona. Oije mbali ndi otakelelerwa. 10Oratura Gosheni, onyikare haihi iwe n'abaana bawe, na baijukuru bawe; amahyo gawe g'entaama n'ag'ente na byona eby'oinabyo. 11Mara yonene kulinya ndakumanya, otaija iwe n'eka yawe na bona ab'oinabo mukajura, aha rw'okuba hakyahaliho emyaka etanu y'eifa.’ 12Inywe na murumuna wange Benjamini nimubona okwo n'inye Yozefu alikubagambira. 13Mubarulire tata ekitinwa kyange kyona omuli Misiri na byona ebyo muboine. Mwanguhe mumulete kununju.” 14Aho agwangana na Benjamini omurumuna omu ngoto, bombili balira. 15Anywegera abarumuna, bona balira. Ebyo kabyahoire abarumuna bafumora nawe.
16Orwo amakuru gahulirwe omwa Farao bati, “Barumuna Yozefu baija,” Farao n'abairube bashemelerwa. 17Farao agambira Yozefu ati, “Ogambire barumuna bawe oti, ‘Mukore muti: Mutweke endogobe zanyu emigugu mushube omu nsi ya Kanaani, 18mulete isheinywe, n'emitungo yanyu, mwije kunu owange, ndabaha ekituli ekirungi muno omuli Misiri, mulye akashaju k'ensi.’ 19Mara obaragire oti, ‘Mukore muti: Mwihye amagali Misiri ag'okuletamu abaana banyu n'abakazi banyu, na isheinywe. 20Mutafaho kusigayo bintu byanyu, aha rw'okuba ekituli ekirungi muno omuli Misiri kiraba kyanyu.’ ”
21Batabani ba Isiraeli bakora batyo. Yozefu abaha amagali nk'okwo Farao yaragira, abakomera n'entanda. 22Kandi aha buli omoi emyendo y'okushembura, kyonkai Benjamini amuha eshekeli bikumi bishatu z'efeza, amwongeraho n'emyendo etanu ey'okushembura. 23Ishe amutwekera ebi: Endogobe ikumi ezitwete ebintu ebirungi bya Misiri, n'endogobe ikumi enshumba ezetwekire emyaka, n'entanda n'ebyakulya ebindi. 24Aho ataishura abarumuna. Orwo babaire nibaimukya, abagambira ati, “Mutarwana mu kihanda.” 25Kityo baruga Misiri bagaruka Kanaani owa Yakobo ishebo. 26Bamumanyisa okwo Yozefu akyarora, n'okwo ali mutwazi w'ensi yona ya Misiri. Agwa enshazi n'okubaikiliza tiyabaikiliize. 27Kyonkai kabamugambiire byona ebyo Yozefu yabaire abagambire, akabona n'amagali ago yatwekire kumutwara, akaburuguka. 28Agamba ati, “Nikimara; Yozefu omwana wange akyarora! Ngende mubone ntakafire.”
Currently Selected:
Embandizo 45: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
