Embandizo 46

Yakobo n'ekaye nibagya Misiri

1Isiraeli aimukya n'ebye byona, agya Berisheba, atambira Ruhanga wa Isaka ishe ebitambo. 2Ruhanga amubonekera omu kiro amweta ati, “Yakobo, Yakobo.” Isiraeli ayetaba ati, “Kaboneke, Rugaba!” 3Amugambira ati, “N'inye Ruhanga, Ruhanga wa sho; otatina kugya Misiri; aha rw'okuba kulinya ndikuhindulirayo eihanga lihango. 4Turagenda hamoi, nshube ngarure baijukuru bawe omu nsi egi. Kandi omu kufa kwawe Yozefu alikwanzilira.”

5Yakobo aimukya aruga Berisheba. Abatabani bamuteka omu magali ago Farao yabaire atwekire kumutwara. Bamutamu n'abaana babo na bakazi babo. 6Batwara n'ebitunganwa byabo n'ebyabo byona ebyo batungiire bali Kanaani bagya Misiri. Yakobo akagenda n'oruzarorwe rwona: 7Abatabani n'abaana babo, n'abahara n'abaana babo.

8Eka ya Yakobo abo yagenzire nabo Misiri amabara gabo nig'aga: Rubeni, omuzigaijogwe, 9n'abatabani abali Hanoki, Palu, Hesironi na Karimi. 10Batabani ba Simeoni ni Yemweli, Yamini, Ohadi, Yakini, Sohari na Shauli owo yazaire aha Mukanaanikazi. 11Batabani ba Levi ni Gerishoni, Kohati na Merari. 12Batabani ba Yuda ni Eri, Onani, Shela, Peresi na Zera. Kyonkai Eri na Onani bakagwa omu nsi ya Kanaani. Batabani ba Peresi ni Hesironi na Hamuli. 13Batabani ba Isakari ni Tola, Puva, Yobu na Shimuroni. 14Batabani ba Zabuloni ni Seredi, Eloni na Yaleeli. 15Aba nibo batabani abo yazaire ahali Lea omuli Padaniaramu hamoi na Dina omuhara. Abatabani n'abahara bona hamoi okwo alikubazara ahali Lea nibagoba makumi gashatu na bashatu. 16Batabani ba Gadi ni Sefoni, Hagi, Shuni, Esiboni, Eri, Arodi na Areli. 17Batabani ba Asheri ni imuna, Ishiva, Ishivi, Beria na munyanyabo Sera. Batabani ba Beria ni Heberi na Malakieli. 18Aba nibo batabani abo yazaire ahali Zilipa omuzana owo Labani yabaire ahaire omuhara Lea; bona hamoi bantu ikumi na mukaga. 19Abatabani abo yazaire ahali Raheli ni Yozefu na Benjamini. 20Yozefu omu nsi ya Misiri akazaliramu Manase na Efuraimu ahali Asenati, muhara wa Potifera omukuhani wa Oni. 21Batabani ba Benjamini ni Bela, Bekeri, Ashibeli, Gera, Namani, Ehi, Roshi, Mupimu, Hupimu na Aridi. 22Aba ikumi na banai ni batabani ba Yakobo ahali Raheli. 23Mutabani wa Dani ni Hushimu. 24Batabani ba Nafutali ni Yaseeli, Guni, Yeseri na Shilemu. 25Aba mushanju ni batabani ba Yakobo abo yazaire ahali Bilia, omuzana owo Labani yabaire ahaire Raheli omuhara.

26Oruzaro rwa Yakobo, abakamwana batabulimu, abagiire Misiri, bona hamoi bakaba bali bantu nkaga na mukaga. 27Batabani ba Yozefu abo yazaliire Misiri bakaba bali babili. Eka ya yakobo bona hamoi abaizire Misiri bakaba bali bantu nshanju.

Yakobo n'ekaye omuli Misiri

28Yakobo ayebembeza Yuda owa Yozefu, kumugambira kwija kumushanga Gosheni. Ahanyuma Isiraeli n'abe bagoba Gosheni. 29Aho Yozefu atekateka egaliye, agya kunyegeza Isiraeli ishe omuli Gosheni. Orwo batangainwe, Yozefu agwa ishe omu bikya, atwara akanya nalira. 30Isiraeli agambira Yozefu ati, “Mbwenu nfe orwo nakubona omu maisho nkamanya okwo okyarora.” 31Yozefu agambira abarumuna n'omutungo gwa ishe ati, “Ntembe ngambire Farao nti, ‘Barumuna bange n'omutungo gwa tata abatura Kanaani bangobaho, 32abantu aba bashumba aha rw'okuba batungi b'ebitunganwa, mara baija n'amahyo gabo g'entaama n'ag'ente n'ebyabo byona.’ 33Farao k'arabeta akababaza ati, ‘Mukora mulimoki?’ 34Mugambe muti, ‘Kwema buto ichwe abairu bawe tutunga ebitunganwa nka batat'enkurw'ichwe kuhika mwaha.’ Aho nirwo muratura Gosheni, buli mushumba omu nsi ya Misiri aba kinyamunuge.”

Currently Selected:

Embandizo 46: RHAY01

Highlight

Compare

Copy