Embandizo 47

Abaisiraeli nibatura Gosheni

1Yozefu agya omwa Farao amugambira ati, “Tata na barumuna bange baruga Kanaani, mbwenu aha bali Gosheni. Baija n'amahyo g'entaama n'ente n'ebyabo byona.” 2Omu barumuna aihyamu batanu abanjulira Farao. 3Farao ababaza ati, “Mukora mulimoki?” Bamushubamu bati, “Waitu, ichwe abairu bawe tuba bashumba nka batat'enkurw'ichwe.” 4Bashuba bamugambira bati, “Twaija kwikara omu nsi egi aha rw'okuba amahyo gaitu g'entaama tigaina buliro, enshonga Kanaani alimu eifa lihango. Mbwenu nitukushaba tuture Gosheni.” 5Aho Farao agambira Yozefu ati, “Sho na barumuna bawe bakugobaho. 6Ensi ya Misiri nogibona. Oteke sho na barumuna bawe omu kituli ekirungi muno; bature Gosheni. Kandi omuli bonene k'oraba nomanyamu ababuya, obakwase ebitunganwa byange babilebelere.”

7Ahanyuma Yakobo akwata Yakobo ishe amutwalira Farao. Yakobo aha Farao omugisha. 8Farao amubaza ati, “Oina emyaka engahai?” 9Yakobo amuhora ati, “Emyaka eyo namara kikumi mwo makumi gashatu; mba mufurafuruki. Emyaka eyo narora mike mara y'enaku, tekagobire myaka eyo batata bamazire bali bafurafuruki.” 10Yakobo aha Farao omugisha, amurugaho ashohora. 11Yozefu aha ishe n'abarumuna ekituli ekirungi muno omu nsi ya Misiri, niyo nsi ya Remesesi nk'okwo Farao yabaire aragiire. 12Ashuba bona ishe n'omutungogwe, abaha ebyakulya nk'okwo orubara rwabo rwabaire ruli.

Eifa omuli Misiri

13Buli hantu hakaba hataliho byakulya; eifa likaba lili libi muno. Misiri na Kanaani nazo likazirambaza. 14Aho Yozefu ashoroza empiha zona omuli Misiri na Kanaani ez'abantu baguzire emyaka azitwalira Farao. 15Abamisiri n'Abakanaani k'empiha zabahoireho, Abamisiri bagoba Yozefu bamugambira bati, “Otuhe ebyakulya tutakugwa mu maisho! Empiha zatuhwaho.” 16Yozefu abahorora ati, “Empiha kaziraba zabahwaho mutaishure ebitunganwa byanyu mbahe ebyakulya.” 17Aho baletera Yozefu ebitunganwa byabo: Efarasi, entaama, ente n'endogobe. Na wenene mwaka ogwo abaha ebyakulya. 18K'omwaka ogwo gwahoire, ogwahondeireho bamugarukira bamugambira bati, “Waitu, titwakukusheleka kwo empiha zihoireho zona, n'amahyo g'ebitunganwa gawe, waitu. Taliho kisigaireho, na iwe nobona, shana ichwe chwenene n'amataka gaitu. 19Tutakugwa mu maisho, ichwe n'amataka gaitu! Ichwe n'amataka gaitu otugure ebyakulya, tube bairu ba Farao n'amataka gaitu agatware. Otuhe ebyakulya tutafa; otuhe n'empambo amataka gaitu galeke kurangaara.”

20Aho Yozefu agulira Farao ensi yona ya Misiri; kuba Abamisiri bona bakaguza amataka gabo, aha rw'okuba eifa likaba lili libi; ensi eba ya Farao. 21Kandi Abamisiri bona abahindura bairu, kwema aha rubibi rwa Misiri kuturuka aha rusigaire. 22Ensi y'abakuhani yonkai niyo ataguzire, Farao yabahaga eby'okubatunga. Nikyo bataguliize mataka gabo. 23Aho Yozefu agambira abantu ati, “Leba, kir'eki inywe n'amataka ganyu nabagulira Farao. Mbwenu tora empambo mugye mubyare. 24Aha magesha ekichweka kya katanu murakihyaga Farao, kandi ebichweka binai omu bitanu birabaga byanyu, nibyo byakulya byanyu n'emitungo yanyu n'abaana banyu, mara honene aho niho muraihaga empambo z'okubyara omu misiri yanyu.” 25Bagamba bati, “Waturokora! Watubera waitu, mara turaba bairu ba Farao.” 26Aho Yozefu ataho eiteka aha nsi ya Misiri, mara liliho kuhika kir'eki, okwo Farao aratwaraga ekichweka kya katanu ky'amagesha. Amataka g'abakuhani gonkai nigo gatabaire ga Farao.

Yakobo naraganisa Yozefu

27Nikwo Abaisiraeli batwire batyo Misiri, omuli Gosheni. Batungir'omwo, bazara, bakanya muno. 28Omuli Misiri Yakobo akaturamu emyaka ikumi na mushanju. Kityo oburorabwe bwona myaka kikumi mwo makumi ganai na mushanju.

29Kayabaire yaija kufa ayeta omutabani Yozefu amugambira ati, “Mbwenu k'oraba nongonzakwo onteke omukono gwawe omu bibero byange oragane okwo orangilira obwesigwa n'amazima. Otanziika Misiri. 30Kandafa onyihye Misiri onziike omu nziiko ya batata.” Yozefu amuhorora ati, “Okwo wagamba nikwo ndakora.” 31Isiraeli ati, “Onnahilire.” Yozefu amunahilira. Aho Isiraeli ainama aha mushago gw'ekitandakye, asiima.

Currently Selected:

Embandizo 47: RHAY01

Highlight

Compare

Copy