Embandizo 48

Yakobo naha Efuraimu na Manase omugisha

1Ebyo kabyabaire byahoire, bagambira Yozefu bati, “Sho murwaire.” Aho agenda n'abatabani bombili, Manase na Efuraimu. 2Bagambira Yakobo bati, “Mutabani wawe Yozefu yaija kukuleba.” Ayebangira, ashuntama aha kitanda. 3Agambira Yozefu ati, “Rushoborabyona akambonekera ahali Luzi, omu nsi ya Kanaani, yampa omugisha, 4yangambira ati, ‘Ndikuha oruzaro rungi, nkuhindure nteko y'amahanga, kandi ensi egi ndigiha baijukuru bawe abalikuruga enyuma, bagilye eirai lyona.’ 5Kandi mbwenu batabani bawe bombili ab'ozaliire Misiri, ntakakuhondeire kunu, bange; Efuraimu na Manase baraba bange, nk'okwo Rubeni na Simeoni bali bange. 6Kandi abaana ab'orakurasa baraba bawe, barayetwa amabara aga barumuna babo, babe nibo bakusikira. 7Aha rw'okuba kanabaire ninduga Padani nkajunara kubona Raheli nagwa aha muhanda omu nsi ya Kanaani, tutakagobire aha Mwiga gwa Efurati. Honene aha muhanda gugya Efurati, niyo Betelehemu, niyo namuziikire.”

8Orwo Isiraeli yaboine batabani ba Yozefu abo, abaza ati, “Aba ni bahai?” 9Yozefu amuhorora ati, “Ni batabani bange abo Ruhanga yampeleire kunu.” Isiraeli ati, “Bandetere mbahe omugisha.” 10Amaishoge gakaba gagizire ekibubi aha rw'obukuru atakishobora kubonage. Yozefu abamugobya, abanywegera ababumbatiire. 11Ashuba agambira Yozefu ati, “Tinatekelezaga kukubona, kyonkai mbwenu leba Ruhanga yambonesa n'abaana bawe.” 12Aho Yozefu abamwihya aha majwi, abandama agoba ahansi. 13Akwata abatabani bombili abo, Efuraimu omu mukonogwe gwa bulyo bwolekera omukono gwa Isiraeli ogwa bumosho, na Manase omu mukonogwe gwa bumosho bwolekera omukono gwa Isiraeli ogwa bulyo, abamugobya. 14Isiraeli aimukya omukonogwe gwa bulyo aguteka aha mutwe gwa Efuraimu ayabaire ali muto, n'omukonogwe gwa bumosho aha mutwe gwa Manase, ashobangainyie emikono, aha rw'okuba Manase niwe yabaire ali muzigaijo. 15Aha Yozefu omugisha nagamba ati,

“Ruhanga owo batata Aburahamu na Isaka bakoleraga,

atunge abaana aba omugisha.

Ruhanga anyebembeire oburora bwange bwona

kuhika kir'eki, abatunge omugisha.

16Omumalaika ayanchungwire ahali buli kabi,

ahe abaana aba omugisha.

Omuli bonene eibara lyange ligendelere ebiro byona,

n'eibara lya batata Aburahamu na Isaka;

bakanye babe mbaga omu nsi.”

17Yozefu kayaboine okwo yateka omukonogwe gwa bulyo ahali Efuraimu, kimutama; aho akwata ishe omukono agwihya aha mutwe gwa Efuraimu kuguta aha mutwe gwa Manase. 18Agambira ishe ati, “Tata tikwo, aha rw'okuba ogu niwe muzigaijo, obe niwe ota omukono gwawe gwa bulyo aha mutwegwe.” 19Kyonkai ishe ayanga, agamba ati, “Nimanya mwana wange, nimanya; na wenene baijukurube baliba ihanga lihango. Kyonkai mutowe aliba muhango kumushaga, na baijukurube baliba mahanga gangi.” 20Kir'ekyo abaha atyo omugisha nagamba ati,

“Abaisiraeli balikoza amabara ganyu

kuha banu omugisha nibagamba bati,

‘Ruhanga akushuse Efuraimu na Manase;’ ”

aba nikwo ahindura atyo Efuraimu akakulira Manase. 21Ahanyuma Isiraeli agambira Yozefu ati, “Lea, Ndi haihi kufa, kyonkai Ruhanga aliba hamoi na inywe, mara alibagarura omu nsi ya baisheinywe. 22Kandi obusoka bw'eibanga obwa Shekemu nimbuha iwe, tindikubuha barumuna bawe. Obusoka obwo nkabwihya aha Baamori, nabubaihisaho embanda yange n'obuta bwange.”

Currently Selected:

Embandizo 48: RHAY01

Highlight

Compare

Copy