Embandizo 49

Yakobo naraga abatabani

1Yakobo ayeta abatabani agamba ati, “Muhikane mbagambaire ebilibaho ebiro ebilija:

2Muhikane muhulire, inywe batabani ba Yakobo,

muhulilize Isiraeli isheinywe.

3Rubeni iwe, oba muzigaijo gwange,

mani gange mara biraba bya mbere by'amani gange.

Rwebembera omu bukuru n'omu bushobora.

4Oshusha amaizi, totebekana,

mara toligira bushobora,

aha rw'okuba okatemba ekitabo kya sho wakihagaza,

okatemba ekitabo kyange.

5Simeoni na Levi barumuna,

embanda zabo bikwato by'okwisa abantu.

6Enaama zabo tindikwija kuzitahamu,

ekisimba kyabo tindikwija kukigyamu.

Bakanigara baita abantu,

baboyera ente bazitema ebitega.

7Ekiniga kyabo nikikaraamwe, kuba nikigwara,

nikikaraamwe enshonga okuzibitana kwabo kw'obukuutu.

Ndibataishurana omuli Yakobo,

mbanaganage omuli Isiraeli.

8Yuda, barumuna bawe balikuhaisiliza,

oliniga ababisha bawe ebikya.

Barumuna bawe balikubandama omu maisho.

9Yuda aba kyana ky'entare,

mwana wange, ochoka aha bwite bwawe oshuba omu mpako.

Akateka akatebe yashuba yabyama nk'entare,

yashusha entare enkazi;

n'ohai ayakwemera kumuchwekya?

10Enkoni y'obukama teliruga hali Yuda,

anga enkoni y'omutwazi kumuruga mu maguru,

kuhika orwo mukama wayo alija;

mara wenene ogwo amahanga galimuhulira.

11Alisibika omwanagwe gw'efarasi aha muzabibu,

n'omwana gw'endogobeye aha muzabibu gurungi.

Ebijwarobye alibifuza edivai,

n'emyendoye agyogese obwamba bw'ezabibu.

12Edivai elimutukuza amaisho,

kandi amata galimweza amaino.

13Zabuloni alitura aha mwegego gw'enyanja,

aliba mwaro gw'emeli,

n'ensiye eligoba Sidoni.

14Isakari ndogobe y'amani,

ebyamire omugati y'amahyo g'entaama.

15Akabona okwo obuhumuliro buli burungi,

n'okwo ensi elikushemera.

Aho yainika eibega kwetweka,

mara yaba mwiru w'okukora emilimo y'ensika.

16Dani aliramura abantube,

aliba ruganda rumoi omu nganda za Isiraeli.

17Dani alishusha enjoka y'emipili aha muhanda,

niyo etema efarasi ekisinziro,

agikuubire akagwa agaranjukire.

18Waitu Mukama, nkulindilire k'ondokora.

19Ababisha balitabalira Gadi,

kyonkai wenene alibarashanisa abatamagye.

20Ensi ya Asheri elyeza ebyakulya bishaire,

elirugwamu ebyakulya by'abakama.

21Nafutali alishusha enjaza esibwirwe,

niyo ezara obwana burungi.

22Yozefu aliba itagi liraba,

eitagi elirabira aha nchuro,

amatagige galirandira aha rukuta.

23Abarasi b'emyambi bakamutabalira kubi,

bamurasha, bamuhutaza, bamuhwahwanisa.

24Kyonkai obutabwe buliikara bubamire,

n'emikonoye elikara egumire.

Engaro za Rushoborabyona wa Yakobo zilikugumisa,

eibara ly'Omushumba, Rwazi rwa Isiraeli lilikuha amani,

25Ruhanga wa sho alikujuna,

Rushoborabyona alikuha omugisha:

Alikuha emigisha y'omw'iguru,

n'emigisha y'okuzimu ahansi,

akuhe n'emigisha y'abaana n'amahyo g'ente.

26Emigisha ya sho eina amani

kukira emigisha y'amabanga ag'eirai n'eirai,

neshaga n'ebirungo by'enshozi ez'eirai lyona.

Emigisha egyo egye aha mutwe gwa Yozefu,

egye n'omu kahanga k'obuso bw'ogwo

ayashoroirwe omu barumuna.

27Benjamini mushega ogururukire,

bwankya nalya obwite,

bwaigoro nabegana eminyago.”

28Ezi zona nizo nganda ikumi na ibili za Isiraeli; mara ebyo nibyo ishebo yabagambire orwo yabaire nabaha omugisha; buli omoi namuha omugisha ogumusaine.

Okufa n'okuzikwakwe

29Isiraeli akaragira abatabani ati, “Inye ndi w'okufa. Munziike na batata omu mpako eli omu nsi ya Efuroni Omuhiti, 30omuli Makapela bwolekera bw'oburugaizoba bwa Maure, omu nsi ya Kanaani. Niyo mpako eyo Aburahamu yaguliraine n'ensi ahali Efuroni Omuhiti k'eba nziikoye. 31Nimwo baziikire Aburahamu na Sara mukaziwe; Isaka na Rebeka mukaziwe; mara mwonene omwo nimwo naziikire Lea. 32Ensi egyo n'empako egilimu bikagurwa aha Bahiti.” 33Yakobo kayamazire kuragira atyo abatabani, ayefunya amaguru aha kitanda, omwoyo guhwamu, afa.

Currently Selected:

Embandizo 49: RHAY01

Highlight

Compare

Copy