Embandizo 50

Okuzikwa kwa Yakobo

1Aho Yozefu agwa ishe aha buso, alira mara amunywegera. 2Aragira abairube abatambi kusiiga ishe omubazi kumwomesa. Kityo bagumusiigakwo bamwomesa. 3Okusiiga omuntu omubazi kumwomesa kwatwaraga ebiro makumi ganai. Kandi Abamisiri bakamutekera ekibi ebiro mushanju.

4Orwo ebiro by'okumutekera ekibi byahoire, Yozefu agambira omutungo gwa Farao ati, “Mbwenu munsiingire mungambilire Farao muti, 5Tata akannahiza nagamba ati, ‘Lea, Inye ndi haihi kufa. Omu nyanga yange eyo nayebaizire omuli Kanaani omwo nimwo oranziika.’ Aha rw'ekyo ninkutagiliza ngende nziike tata, ndagaruka.” 6Farao ahorora ati, “Ogende oziike sho nk'okwo yakunahiize.” 7Aho Yozefu agenda aziika ishe. Abaramata ba Farao bona, n'abami, bagenda nawe. 8Ekaye, abarumuna n'abasigaire bona ab'omutungo gwa ishe bagenda nawe. Gosheni bakasigamu abaana babo abato n'amahyo gabo g'entaama n'ag'ente. 9Kandi amagali n'ab'efarasi bagenda nawe; ekaba eli mbaga nyingi muno.

10Kabagobire aha kyano kya Atadi, buseli bwa Yorudani bachura, batongya muno. Yozefu achulira ishe ebiro mushanju. 11Abanyansi ba Kanaani kababoine abalikuchulira aha kyano kya Atadi, bagamba bati, “Emichulire egi y'Abamisiri neyeshusha.” Nikyo omwanya ogwo bagweteire Abelimisiraimu, guli buseli bwa Yorudani. 12Nikwo abatabani bamukoleire batyo okwo yabaire abaragiire: 13Bakamutwara omu nsi ya Kanaani, bamuziika omu mpako omu nsi ya Makapela bwolekera bw'oburugaizoba bwa Maure. Niyo Aburahamu yaguliraine n'ensi ahali Efuroni Omuhiti k'eba nziikoye. 14Yozefu kayabaire yaziikire ishe yagaruka Misiri, n'abarumuna na bona ababaire bagenzire nawe kumuziikisa ishe.

Yozefu namaramara abarumuna

15Barumuna Yozefu kababoine okwo ishebo yafa, bagamba bati, “Rundi Yozefu aratunoba atwehoroze ebyo twamukozire.” 16Aho bamutumaho bati, “Tataichwe atakafire akataho omuhango ogu ati, 17‘Mugambire Yozefu muti: Ninkushaba ogarulire barumuna bawe entambara yobakukoleire, kuba bakakukora kubi.’ Mbwenu nitukutagiliza ogarulire abairu ba Ruhanga wa sho entambara yabo.” Kabamugambiire batyo alira. 18Abarumuna nabo baija bamugwa omu maisho, bamugambira bati, “Lea, Tuli bairu bawe.” 19Kyonkai Yozefu abagambira ati, “Mutatiina, kuba inye tindi Ruhanga. 20Kandi inywe mukanama kunkora kubi, kyonkai Ruhanga yagendelera ekirungi, kurugwamu okurokora abantu bangi, nk'okwo bali kir'eki. 21Kityo mutatina; ndabamanya n'abaana banyu.” Nikwo yabamaramazire atyo akabagaruramu akoyo.

Okufa kwa Yozefu

22Aho Yozefu aguma atwire Misiri hamoi n'eka ya ishe. Akafa aina emyaka kikumi na ikumi. 23Akabona na baijukuru ba Efuraimu. Kandi abaana ba Makiri mutabani wa Manase akabahindura baanabe. 24Ahanyuma agambira abarumuna ati, “Inye ndi haihi kufa; kyonkai Ruhanga alibasingira abaihye omu nsi egi, abatware omu nsi eyo yaraganisize Aburahamu, Isaka na Yakobo.” 25Ashuba abanahiza okwo ka Ruhanga alibasingira atyo, batware amagufage bagaihye Misiri. 26Aho Yozefu afa, agwa Misiri, aina emyaka kikumi na ikumi. Bamusiiga omubazi bamwomesa, bamuteka omu sanduku.

Currently Selected:

Embandizo 50: RHAY01

Highlight

Compare

Copy